Read gen Èdɔwɔ̀wɔwo 2 Bible Online

Èdɔwɔ̀wɔwo 2 - gen bible

Èdɔwɔ̀wɔwo 2

¹Wàlɛbɛ kè Pɛntekost be àzãa gbè va ɖoa, xɔ̀sètɔwo keŋu bɔ̀ ɖo du lè tèpe ɖe.

²Zè ɖèkaa, ègbèɖìɖi ɖe so jiŋùkusi, sìgbè àya sɛ̃sɛ̃ ɖe kè le pòa nène, ɖɔ àxue kè mè wo lèa keŋu.

³Eye wo kpɔ ènu ɖewo, kèwo lè sìgbè èzò be àɖewo nène, ma ɖo àmèawo ji àmètɔ̀ àmètɔ̀.

⁴Gbɔ̃gbɔ̃ Kɔ̀kɔ̀ɛ a ɖo woawo keŋu mè, eye wo tɔ ègbè buwo dodo sìgbè àlekè Gbɔ̃gbɔ̃ a na be woa gblɔ̃a nène.

⁵Wàlɛbɛ ŋua, Yudàvi kèwo nyi mawumewo, sùgbɔ so èdù kèwo lè ànyigbã jiawo keŋu mè va Yèruzàlɛm.

⁶Ekè wo sè zigìdi kèa, àmèwo pòzĩ va bɔ̀, eye ènyà kè àmèdɔ̃dɔ̃awo lè gblɔ̃a, wɔ̀ ŋùdã na wo ŋutɔ, ɖo àmè sia àmè lè sè ènyà ŋuawo lè ye ŋutɔ be ègbè mè.

⁷Eye e nyi ènu ɖe kè na be àvò pò wo, eye wo kã yàa, lè gblɔ̃ be: “Àmè kèwo le pò nupo ŋua woa ɖe, mu Galileatɔwo ye wo nyia?

⁸Àleke wɔ̀, mia dòmètɔ ɖè sia ɖè, lè sè woabe ènyàwo mè ɖo ye ŋutɔ de-gbe mè ò?

⁹Àmèwo lè mia dòmè so Partìa, Medìa ku Elamitò; àmè ɖewo so Mèzòpòtamìa, Yudeà ku Kapadokìa, Pɔ̃tìo, kudo Azìa.

¹⁰Àmè ɖewo so Frigìa ku Pãfilìa, Ejiptè ku Libìa be àgo kè tɛ ɖo Kirenè ŋutia; Romàtɔ kèwo lè mia dòmèawo,

¹¹Yudàviwo, ku àgbàlè kèwo trɔ zũ Yudàviwo a, Kretàtɔwo ku Arabìatɔwo, gãke mia kpata mi lè sè, eye wo le gblɔ̃ èdɔ nyuɛ̃ kèwo Mawu wɔ̀awo be ènyà na mi, lè mia ŋutɔwo mia de-gbe mè.”

¹²E wɔ̀ ŋùdã na wo keŋu, eye wo mu nya ènu kè wo la gblɔ̃ ò. Wo le biɔ woa nɔ̀nɔwo be: “Ènu kèa gɔ̃mè ɖe?”

¹³Vɔ̀ àmè ɖewo lè woa dòmè le ɖè àlɔmè lè nukplaviawo ŋuti, be: “Vɛ̃ yeye ye le mu wo.”

¹⁴Eŋuã, Petrò sitè ku yetɔ̀ woeɖèkaawo, bè kɔ ègbè yìji, pò nupo na àmèhaawo gblɔ̃ be: “Nɔ̀vi Yudàviwo, ku mì, àmè kèwo keŋu lè Yèruzàlɛm-a, mì sè ènu kèa mè, ne mìa ɖo èto ènyà kè mù la gblɔ̃a.

¹⁵Àmè kèawo mu nù àhà mu, sìgbè àlekè mì susu ìa nène ò, ɖo ŋùdekɛ̃nyɛ gà àsiɖèkɛ kpò ye lè pò fifì.

¹⁶Vɔ̀a, ènu kè gblɔ̃ɖɛtɔ Yoɛ̀l gblɔ̃a ye le jɔ̀; e ye nyi be:

¹⁷'Mawu be, lè àzã mlɛ̃awo mèa: mù la hlɛ̃ Gbɔ̃gbɔ̃ nyèa ɖo àmèwo kpata ji. Mìabe èvi-ŋusùwo ku mìabe èvi-nyɔ̃nùwo la gblɔ̃ ènyà ɖɛ, mìabe ɖèkajɛwo la kpɔ àvìmènuwo eye mìabe àmèsĩsĩwo la ku èdrɔ̃wo.

¹⁸Ɛ̃ɛ, lè àzã ŋuawo mèa, mù la hlɛ̃ Gbɔ̃gbɔ̃ nyèa ɖo sumɔ̃vi nyè ŋusùwo ku sumɔ̃vi nyè nyɔ̃nùwo ji, eye wo la trɔ gblɔ̃ɖɛtɔwo.

¹⁹Mù la na ŋùdãnuwo la ze lè jiŋùkusi hũi, eye jèsìwo la ze lè ànyigbã ji. Èhũ ku èzò kudo àzìzɔ babla la ze.

²⁰Èwè la do vìvìti, eye wètri la bìa sìgbè èhũ nène, gbɔ̀xue Tɔhonɔ̀ be àzãa la va, gogo be àzã gã ŋua!

²¹Eŋuã, àmè sia àmè kè la fã yɔ Tɔhonɔ̀ be nyikɔa, wo la hlùɛ̃ ɛ̀ gã.'”

²²“Nɔ̀vi Izràɛlviwo, mì ɖo èto ne mìa sè ènyà nyèwo: Yesù Nazarɛttɔ̀a nyi àmè kè mè Mawu ɖè yebe ŋusɛ̃ fiɔ mì lèa, to ènu jɔ̀ àsuwo, ŋùdãnuwo, ku jèsì kèwo Mawu wɔ̀ to e ji lè mìa dòmèawo ji; eye mìa ŋutɔwo mì nya ènu kèawo nyuɛ̃ ɖe.

²³Àmè kèa ye wo do àsi na mì, sɔ zɔ̃ ɖo àlekè Mawu ŋutɔ wɔ̀ ɖoɖo ɖɛ xoxoa ji, eye mì ka ɛ̀ ɖo àtisòga ŋuti, mì wù Ì, to àmè kèwo wɔ̀nà ènu màjɔ̀màjɔ̀awo ji.

²⁴Vɔ̀ Mawu ya fɔ̃ ɛ̀ so èku, ɖè è to lè èku be vevesèsewo mè, ɖo èku mu teŋu ɖù e ji, ne bèa ci èyɔ̀ mè ò.

²⁵David pò nupo so Kristò ŋuti gblɔ̃ be: 'Mù kpɔna Tɔhonɔ̀ lè àpe ŋùkɔ̀ wè sia wè, ɖo e lè àpe ɖùsi mè ne èjì mu gbà blè mù ò.

²⁶Eŋuã ŋutia, èjì jɔ̀ mù, eye àɖe nyè sò àyo. Wu ekèa, ŋutilã nyè cã la gbɔ̃jɛ̃ lè ŋùɖo mè.

²⁷Đo wò mu la gble àgbè nyèa ɖo èkuwode ò, eye wò mu la lɔ̃ be Àmè Kɔ̀kɔ̀ɛ[1] wòa ne nyì nyɔ̀ ò[2].

²⁸Èwò ye na mù jèsi àgbè-mɔwo. Ne wò lè gbɔ nyè kpòa, mù la kpɔ jìjɔɛ blibo.'”

²⁹“Nɔ̀viwo, mù jro be ma kã ɖo e ji na mì be mìa tɔgbe David ku, eye wo ɖì ì, yebe èyɔ̀doa gbà kpɔ̀tɔ̀ lè mia gbɔ kaka va na egbè.

³⁰Vɔ̀ Mawu bè gblɔ̃ɖɛtɔ be nyi, Mawu fìã àjɔ̀gbè, eye be ɖo èkpe e ji na ɛ̀ be, yè la va sɔ yebe tɔgbeyɔvi ɖe ɖo yebe àzìkpe ji, be la ɖùfìɔ kòkòkò.

³¹Kristò be fɔ̃fɔ̃ so èkua ye David kpɔ, eye be gblɔ̃ ɖɛ be: 'Wo mu gble è ɖɛ ɖo èkuwode ò, eye yebe ŋutilã mu nyì nyɔ̀ lè èyɔ̀do mè ò.'

³²Yesù kèa ye Mawu fɔ̃ so èku; mia kpata mi kpɔ ɛ̀.

³³Fifìa, kè Mawu kɔ ɛ̀ ɖo ji, eye bè yì lè Mawu be ɖùsi mèa, Mawu, Ètɔa sɔ Gbɔ̃gbɔ̃ Kɔ̀kɔ̀ɛ kè Àta fìãa, na ɛ̀. Ekèa ye be kɔ̀ ɖo mia ji, sìgbè àlekè mì le kpɔ ɛ̀, eye mì le sè èa nène.

³⁴Đo David ŋutɔ mu yì jiŋùkusi ò, gãkea, e gblɔ̃ ɖɛ be: 'Tɔhonɔ̀ gblɔ̃ na Tɔhonɔ̀ nyè be: nɔ̀ ànyi lè àpe ɖùsi mè

³⁵kaka ne ma sɔ kɛ̃tɔ wòwo wɔ̀ àpo àfɔ̀ɖojinu.'

³⁶Mìa Izràɛlviwo kpata, mì nya nyuɛ̃ ɖe be Yesù kèa, kè mì ka ɖo àtisòga ŋutia, ye Mawu ɖo Tɔhonɔ̀ ku Mɛ̀sia.”

³⁷Ekè àmèwo sè ènyà kèa, e wɔ̀ èdɔ ɖo woa ji, eye wo biɔ Petrò ku àmèdɔ̃dɔ̃ kpɔ̀tɛawo be: “Nɔ̀viwo, nukɛ ye mi ɖo la wɔ̀ ò?”

³⁸Petrò ɖo e ŋuti be: “Mì ɖɔ̀lì èdɛ̃, eye mìa na woa lè mawusi na mìa dòmètɔ ɖe sia ɖe, lè Yesù Kristò be nyikɔ mè, ne Mawu bèa sɔ mìabe èvuɛ̃wo kè mì, eye mì la xɔ̀ Gbɔ̃gbɔ̃ Kɔ̀kɔ̀ɛ kè nyi Mawu be ènu nana a.

³⁹Đo mìa ku mìabe èviwo ye Mawu fìã ɛ̀ na, kaka yì jè àmè nenè kèwo ye lè dìdìpe booawo ji, àmè kèwo Tɔhonɔ̀, miabe Mawu la yɔ va ye ŋutɔ gbɔawo.”

⁴⁰Petrò gbà gblɔ̃ ènyà buwo fuu na wo, sɔ ɖù ɖase, ne bèa do wo ŋusɛ̃. E gblɔ̃ na wo be: “Mì jo lè fifì be jìjimè vuɛ̃ kèa yomè, ne mìa gã.”

⁴¹Wo lè mawusi na àmè kèwo xɔ̀ yebe ènyà ji sèawo. Àgbètɔ sìgbè hotu ɖèka èkà wìvɔàtɔ̃ nène ye wo xɔ̀ ɖo èhabɔ̀bɔa mè gbè ŋua gbè.

⁴²Wo dona veve ènu lè *Àmèdɔ̃dɔ̃awo be ènufiɔfiɔ ku èdunɔ̀nɔ lè nɔ̀vi wɔ̀wɔ mè, eye wo lenabè na èhaa be ènu ɖùɖu ɖo dua kudo kuefã.

⁴³Vɔ̃vɔ̃ jè àmè sia àmè ji, ɖo Mawu lè wɔ̀ ŋùdãdɔwo ku jèsìwo fuu, to *Àmèdɔ̃dɔ̃awo ji.

⁴⁴Wo, àmè kèwo keŋu xɔ̀sèawo nɔ̀nà du, zãna woabe ènuwo keŋu ɖo du.

⁴⁵Wo sànà woabe ènuwo, eye wo mana ègà kè wo kpɔa lè woa nɔ̀nɔwo dòmè, ɖo àmè sia àmè be èhiã nu.

⁴⁶Wo bɔ̀nà gbè sia gbè ɖo mawuxɔa mè. Wo kɔ̀nà àdɔ̀mè, ɖùnà ènu lè àgbã ɖèka mè, lè woa nɔ̀nɔwo be àxomè ku jìjɔɛ.

⁴⁷Wo kafuna Mawu eye àmèwo keŋu kɔ̀nà èjìmè ɖo woa ŋuti. Gbè sia gbèa, Tɔhonɔ̀ nana àmè yeye kèwo be hlùɛ̃gãawo va kpèna wo.