Read gen Èdɔwɔ̀wɔwo 20 Bible Online

Èdɔwɔ̀wɔwo 20 - gen bible

Èdɔwɔ̀wɔwo 20

¹Ekè èzĩ tɔ̀tɔa va ɖoɖaa, Paolò yɔ àmè kèwo ye xɔ̀ Yesù ji sèawo bɔ̀. E do wo ŋusɛ̃, eye be gblɔ̃ na wo be yèa yì ne yèa va, eye be jè èmɔ ɖo èta Màkedonìa.

²E to funua be àgowo ji, pò nupo sùgbɔ, sɔ do ŋusɛ̃ àmè kèwo xɔ̀ Yesù ji sèawo. E yomè a, e va ɖo Grik-nyigbã ji.

³E nɔ̀ funua, wètri ètɔ̃. Wàlɛbɛ kè be le jràɖo, la ɖo ètɔ̀jihũ yì Sirìaa, e sè be Yudàviwo le doxa na yè. Ekèa ŋutia, e ɖo è be yèa trɔ yì to Màkedonìa.

⁴Àmè kèwo yì ɖo èawo ye nyi: Sopatà, Bereatɔ kè nyi Pirò be èvia; Aristarkò ku Sekundò so Tɛsalonikà; Gayò, Dɛrbètɔ ku Timòteo, Tikikò ku Trofimɔ̀ so Azìa.

⁵Àmè kèawo yì jè ŋùkɔ̀, le nɔ̀tè kpɔ mi lè Troa.

⁶Ekè wo ɖù kpɔ̃nɔ àkpiti be àzãa vɔ̀a, mia yaa, mi ɖo ètɔ̀jihũ so Fìlipì, ŋùkèkè àtɔ̃ yomè a, mi va tù wo lè Troa, eye mi nɔ̀ funua, ŋùkèkè adrɛ̃.

⁷Lè kuasiɖaa be ŋùkèkè cucugbã gbèa, mi bɔ̀ la ɖù ènu. Ekè, èŋù kèa, Paolò ɖo la joa, e le pò nupo na nɔ̀vi kèwo xɔ̀ Yesù ji sèawo, kaka èzã ma ɖo èvè[24].

⁸Kãligbɛ̃ sùgbɔ lè sìsi, lè èxɔ̀ kè mè mi bɔ̀ lè, lè àsãŋu jia mè.

⁹Đèkajɛ ɖe, kè be nyikɔ nyi Etikòa, nɔ̀ ànyi ɖo flɛsɛ̀ nu. Ŋusù kèa, tɔ àlɔ̃ dɔ̃dɔ̃, wàlɛbɛ kè Paolò be nupoa le dìdìa. Àlɔ̃ va mu ì keŋu-keŋu, eye be gɛ̃ so àsãŋu ètɔ̃gɔ̃a ji, eye yebe kuku kpò wo va sɔ.

¹⁰Paolò ɖì yì ànyigbã, fã ɛ̀, kɔ ɛ̀ ɖo yebe àbɔwo mè, gblɔ̃ be: “Mì mu gbà kpà àbòbo ò, ɖo e kpɔ̀tɔ̀ lè àgbè[25].”

¹¹Ekèa yomè a, Paolò trɔ yì àsãŋua ji, eye e kã kpɔ̃nɔ ɖù. E gbà pò nupo na wo kaka èŋù kè. Ekèa yomè a, e jo.

¹²Àmèwo kplɔ̀ ɖèkajɛ a va, eye e lè àgbè. Ènu kèa do ŋusɛ̃ gã ɖe àmèwo keŋu.

¹³Mia yaa, mi jè ŋùkɔ̀ na Paolò, ɖo ètɔ̀jihũa mè, eye mi jè èmɔ ɖo èta Asɔ̀s. Funua ye ye ŋutɔ be yèa to àfɔ̀mɔ va, ne mia xɔ̀ ye ɖo ètɔ̀jihũa mè lè.

¹⁴Ekè mi va dogò lè Asɔ̀s-a, e ɖo ètɔ̀jihũa ku mi, va Mitilɛ̀n.

¹⁵Mi hɔ̃ so funua eye, kè èŋù kèa, mi va Kiò be ŋùkɔ̀. Ŋùkèkè ètɔ̃gɔ̃a gbèa, mi va Samɔ̀, eye ŋùkèkè kè kplɔ̀ e ŋua do a gbèa, mi va ɖo Miletò, wàlɛbɛ kè mi to Trogilìo vɔ̀a.

¹⁶Paolò ɖo è be yèa to Efesò ŋuti, ne yè mu gbà gũ gàmè lè Azìa ò. E le hlùɛ̃ do be, ne yè teŋuã, yèa ɖo Yèruzàlɛm, lè Yudàviwo be àzã kè wo yɔna be Pɛ̀ntekost-a gbè.

¹⁷Paolò dɔ̃ àmè so Miletò, ne woa yì yɔ Efesò be èhamèmègãwo va.

¹⁸Ekè wo vaa, e gblɔ̃ na wo be: “Mì nya àlekè mù nɔ̀ lè mìa dòmè, so gbè kè gbè mù va Azìaa.

¹⁹Mù sumɔ Tɔhonɔ̀, lè ɖokoe bɔ̀bɔ mè. Mù sumɔ ɛ̀ ku àɖàsì, eye mù sumɔ ɛ̀ lè tètèkpɔ kèwo kpe mù lè Yudàvi kèwo doxa na mùawo si.

²⁰Ènu kè la nyi àlè na mìa, nyè mu wla ɖekpe do mì ò: mù gblɔ̃ wo keŋu na mì, eye mù fiɔ wo keŋu mì, àgbãŋùgbà, àlo lè mìabe àxuewo mè.

²¹Đase ɖùɖu nyèa le yɔ Grikwo be woa trɔ lè woabe èvuɛ̃wo yomè, ne woa va Mawu gbɔ, ne woa xɔ̀ Yesù, mia Tɔhonɔ̀ ji sè.

²²Kpɔɖa! Fifìa, kè mù nyi Gbɔ̃gbɔ̃ Kɔ̀kɔ̀ɛ a be kluvi vɔ̀a, mù le yì Yèruzàlɛm. Nyè mu nya ènu kè la kpe mù lè funua ò.

²³Ènu kè kpò mù nyaa ye nyi be, Gbɔ̃gbɔ̃ Kɔ̀kɔ̀ɛ a gblɔ̃nà na mù be, lè èdù ɖè sia ɖè mèa, ègàkpa mè yìyi ku àyàɖùɖu sùgbɔ lètè le kpɔ mù.

²⁴Vɔ̀a, nyè mu bù àgbè nyèa, be e nyi ènu xɔ̀ àsi ɖekpe na nyè ŋutɔ ò. Ènu kè kpò lè veve ɖe na mùa ye nyi be ma wu èmɔ zɔ̃zɔ̃ ku èdɔ kè Tɔhonɔ̀ Yesù ɖo na mùa nu. Èdɔ kèa ye nyi be ma ɖù ɖase so Mawu be màje be àŋɛ̀nyuɛ̃ a ŋuti.”

²⁵“Mù nɔ̀ mìa keŋu dòmè, do Mawu be fìɔɖùɖu be àŋɛ̀a na mì. Fifìa, kpɔɖa, mìa dòmètɔ ɖekpe mu la gbà kpɔ mù ò.

²⁶Eŋuã ŋuti ye, mù le to na mì egbèa be, ne mìa dòmètɔ ɖe crɔ̃a, mu gbà kã mù ò!

²⁷Đo mù ɖè Mawu be ɖoɖo bliboa fiɔ mì. Nyè mu wla ɖekpe do mì ò.

²⁸Mì kpɔ mìa ɖokoewo ji, eye mì kpɔ Mawu be èhabɔ̀bɔ kè nu Gbɔ̃gbɔ̃ Kɔ̀kɔ̀ɛ sɔ mì ɖoa ji, ne mìa fiɔ èmɔ èhamèvi kèwo Mawu xɔ̀ to ye ŋutɔ Èvia be èku jiawo.

²⁹Mù nya be, ne mù jo vɔ̀a, àmè nyràhũ sìgbè gbètewo nène la va gɛ̃ ɖo mìa dòmè, eye wo mu la kpɔ ɖomè na èhamèviwo ò.

³⁰Đo, lè mìa ŋutɔwo mìa dòmèa, àmè ɖewo la sitè, la tɔ ènu kèwo mu sɔ̀gbè ku àŋɛ̀nyuɛ̃ a ò a, fiɔfiɔ, eye àmè sùgbɔ la kpàsà wo do, lè àmè kèwo xɔ̀ Yesù ji sèawo dòmè.

³¹Ye ŋutia, mì nɔ̀ ŋùsa, ne mìa ɖoŋù be, èpè ètɔ̃ sɔ̃ŋua, èzã kudo kedèa, nyè mu dokpò ènufiɔfiɔ mìa dòmètɔ ɖekpe, ku àɖàsì ò.”

³²“Fifìa, mù sɔ mì do àsi na Mawu, tàsi mì na yebe màje be ènyà kè ɖo ŋusɛ̃, la tù mì ɖo, eye be la na mì ènunyuɛ̃ kè be sɔ ɖo ànyi na àmè kèwo keŋu nyi ye tɔ̀awo be ècrɔ̃nu.

³³Nyè mu bìaŋù ɖo àmè ɖe be ègà ŋuti, ɖo àmè ɖe be sìka ŋuti, àlo ɖo àmè ɖe be àvɔ ŋuti ò.

³⁴Mìa ŋutɔwo, mì nya be èdɔ kè nyè ŋutɔ mù sɔ àlɔ̀ nyèwo wɔ̀a ye hɛ̃ mù, eye be hɛ̃ àmè kèwo bɔ̀ ɖo ŋuti nyèawo.

³⁵Mù fiɔ mì, to ènuwo keŋu mè be, nène ye wo la wɔ̀ èdɔ ɖo, ne woa teŋu do àlɔ̀ wɔ̀amènɔ̀wo, ne mìa ɖoŋù, la do àlɔ̀ àmè, ɖo ènyà kèwo Tɔhonɔ̀ Yesù ŋutɔ gblɔ̃a ji be: 'Ènu na àmè dona jìjɔɛ wu ènu xɔ̀ lè àmè si.'”

³⁶Ekè Paolò gblɔ̃ ènyà kèawo vɔ̀a, ɛ̀ jè èklò kudo woawo keŋu, eye wo fãkue.

³⁷Woawo keŋu fã àvi, kpla àsi èkɔ̀ na Paolò.

³⁸Àkpɔ̃ ɖo lãmè na wo ŋutɔ, ɖo, e gblɔ̃ na wo be, wo mu gbà la kpɔ yè ke ò, eye wo yì ɖo è ɖo kaka ètɔ̀jihũa gbɔ.