Read gen Èdɔwɔ̀wɔwo 21 Bible Online

Èdɔwɔ̀wɔwo 21 - gen bible

Èdɔwɔ̀wɔwo 21

¹Ekè mi klã jo lè woa gbɔa, mi ɖo ètɔ̀jihũ ɖota Kɔs zè ɖèka. Yebe èŋù kè gbèa, mi va Rodò, eye so funua, mi va Patarà.

²Mi kpɔ ètɔ̀jihũ ɖe le yì Foenikè eye mi ɖo e mè jo.

³Ekè mi kpɔ Kiprò ɖoɖaa, mi tàsi ètɔ̀dòmèkɔ̃ɛ̃ kèa ɖo èmìɔ̃ mè lɔ̀ge, eye mi yì Sirìa. Mi va lìɔ èhũa ɖo Tirò, ɖo, funua ye ètɔ̀jihũa ɖo la ɖè àgbã ɖo.

⁴Mi kè ɖo àmè kèwo xɔ̀ Yesù ji sèawo ŋuti lè funua, eye mi nɔ̀ woa gbɔ ŋùkèkè adrɛ̃. Gbɔ̃gbɔ̃ Kɔ̀kɔ̀ɛ be ŋusɛ̃ ɖè ènu kè lètè kpɔ Paolòa fiɔ wo, eye wo gblɔ̃ na Paolò be mu gbà yì Yèruzàlɛm ò.

⁵Vɔ̀a, ekè miabe gàmè sùa, mi so jè èmɔ, eye àmèwo keŋu kplɔ̀ mi, woa ku woa srɔ̃wo kudo woabe èviwo keŋu va ɖo mi ɖo kaka èdùa godo. Ekè mi ɖo àpùtaa, mi jè èklò, fãkue.

⁶Eŋuã yomè a, mi sìa mia nɔ̀nɔwo. Mi ɖo ètɔ̀jihũa mè, eye woawo yaa, wo trɔ yì woabe àxuewo mè.

⁷Ekè mi jo lè Tiròa, Tolemayì ye mi va lìɔ èhũa ɖo, eye miabe àpùji-mɔzɔ̃zɔ̃a wu e nu lè funua. Mi do ègbè na mia nɔ̀viwo lè xɔ̀sè mè, eye mi nɔ̀ woa gbɔ gbè ŋua gbè.

⁸Yebe èŋù kè gbèa, mi yì Kayizarèa, lè Filipò, àŋɛ̀nyuɛ̃dotɔa be àxomè, eye mi nɔ̀ funua. Filipò kèa lè àmè adrɛ̃ kèwo wo cã lè Yèruzàlɛm a dòmè.

⁹Tùgbɛ̀jɛ le àlɔ̀ji, kè mu nya ŋusù ò a, ènè lè e si, eye wo ɖona Mawu be ègbè.

¹⁰Wàlɛbɛ kè mi nɔ̀ funu ŋùkèkè sùgbɔa, gblɔ̃ɖɛtɔ ɖe kè be nyikɔ nyi Agabòs-a so Yudeà va.

¹¹E va kpɔ mi, eye e sɔ Paolò be ègojiblanu bla ye ŋutɔ be àfɔ̀ ku àlɔ̀wo, eye be gblɔ̃ be: “Ènyà kè Gbɔ̃gbɔ̃ Kɔ̀kɔ̀ɛ a gblɔ̃a ye nyi ekè: àmè kè tɔ̀ ye nyi ègojiblanu kèa, àlekè Yudàviwo la bla ɛ̀ lè Yèruzàlɛm, eye wo la do è àsi na àmè kèwo mu nyi Yudàvi òawo ɖo-a, ye nyi ekèa.”

¹²Ekè mi sè nènea, mia ku èdùa mè tɔwo mi ɖè kuku na Paolò be mu gbà yì Yèruzàlɛm ò.

¹³E ɖo e ŋuti be: “Nukɛ ŋuti ye mì le fã àvi, sɔ le gbã èjì na mù nènea ɖo ò? Mu nyi ne woa bla mù ɖèɖe kpò ye mù sɔ̀gbè na ò; vɔ̀a, mù gbà sɔ̀gbè ne ma ku lè Yèruzàlɛm ɖo Tɔhonɔ̀ Yesù be nyikɔa ta.”

¹⁴Ekè mi mu la teŋu gblɔ̃ ènyà ɖe sɔ tɔ ɛ̀ tè òa, mi ɖè àsi lè e ŋuti, eye mi gblɔ̃ be: “Tɔhonɔ̀ be jro ne va e mè.”

¹⁵Ekè mi nɔ̀ funua ŋùkèkè vi ɖe a, mi jràɖo ɖota Yèruzàlɛm.

¹⁶*Nukplavi kèwo lè Kayizarèaawo dòmètɔ ɖewo yì ku mi. Wo kplɔ̀ mi yì nukplavi xoxoawo dòmètɔ ɖèka kè wo yɔna be Nasɔ̀n, kè so Kipròa be àxomè.

¹⁷Ekè mi va Yèruzàlɛm-a, mia nɔ̀viwo lè Kristò mè xɔ̀ mi ku jìjɔɛ.

¹⁸Ekè èŋù kèa, mia ku Paolò mi yì Yakobò be àxomè, àfi kè èhamèmègãwo kpata bɔ̀ ɖoa.

¹⁹Paolò do ègbè na wo, eye e gblɔ̃ ènu kèwo keŋu Mawu wɔ̀, to yebe sumɔ̃vi-dɔa ji, lè àmè kèwo mu nyi Yudàvi òawo dòmèa, na wo kito-kito.

²⁰Ekè wo sè ènyà kèawoa, woawo keŋu, wo na gogo Mawu, gblɔ̃ na Paolò be: “Nɔ̀vi, wò ŋutɔ, wò lè kpɔa? Yudàvi èkà èwì vɔ àtɔ̃ ku eji vɔwo ye trɔ xɔ̀sètɔwo. Wo le Mosè be èsea ɖo àsi sɛ̃sɛ̃ ɖe.

²¹Vɔ̀a, wo va gblɔ̃ na wo be: wò lè fiɔ ènu Yudàvi kèwo ye lè àmè kèwo mu nyi Yudàvi òawo dòmè, be woa ɖè àsi lè Mosè be èsea ŋuti; be wo mu gbà sò èvo na woabe èviwo ò; wo mu gbà nyì mia tɔgbewo be èkɔ̀doawo cã ò.

²²Àleke mi la wɔ̀ fifì ò? Đo, wo la nya kpò ye be wò va.

²³Ye ŋutia, wɔ̀ ɖo ènu kè mi la to na wòa ji. Ŋusù ènè lè mia dòmè, kèwo kã àtãŋu na Mawu.

²⁴Kplɔ̀ wo, ne wò ku wo, mìa yì lè mìa ɖokoewo ɖì. Wò la tu ègà kèwo keŋu mì la zã lè funua, ne woa teŋu lũ èta. Nène a, àmè sia àmè la nya be, ènu kè wo sè so ŋuti wòa, mu nyi nyàwo ò, eye wo la kpɔ be wò cã wò le wɔ̀ ɖo Mosè be èseawo ji.

²⁵Sɔ kù ɖo àmè kèwo mu nyi Yudàviwo ò, vɔ̀a, wo xɔ̀ Yesù ji sèawo ŋutia, mi ŋlɔ̀ ènu kè mi bɔ̀ gblɔ̃a ɖoɖa wo, be wo mu gbà ɖù ènu kè wo sɔ savɔ na vòduwo ò. Wo mu gbà ɖù èhũ ò. Wo mu gbà ɖù èlã kè mè èhũ cia ò. Wo mu gbà wɔ̀ gbòlò ò.”

²⁶Paolò kplɔ̀ ŋusù ènèawo, eye ekè èŋù kèa, e lè ye ɖokoe ɖì ku wo, eye e ɖo mawuxɔa mè. Funua, e gblɔ̃ gbè kè gbè ye, ne lèlèɖìa wu e ŋua, wo la savɔ ɖo woa dòmètɔ ɖè sia ɖè taa.

²⁷Wàlɛbɛ kè ŋùkèkè adrɛ̃awo le wu e nua, Yudàvi kèwo so Azìa vaawo dòmètɔ ɖewo kpɔ Paolò lè mawuxɔa mè. Wo tɔ̀zĩ àmèha bliboa, eye wo le Paolò.

²⁸Wo do àpa be: “Izràɛlviwo, mì va xɔ̀ na mi! Ŋusù kè sitè ɖo Izràɛl be dùkɔ̃a, ku Mosè be èsea, kudo mawuxɔ kèa ŋuti, to yebe ènufiɔfiɔ mè to àfi sia àfia ye nyi ekèa! E gbà kplɔ̀ Grikwo ŋutɔ cã ɖo mawuxɔa mè, le gble èkɔ̀do na Tèpe Kɔ̀kɔ̀ɛ kèa!”

²⁹Wo gblɔ̃ nènea, ɖo wo kpɔ Paolò ku Trofimɔ̀, Efesòtɔa, lè èdùa mè sã, eye wo susu be Paolò kplɔ̀ ɛ̀ va mawuxɔa mè.

³⁰Èdùa keŋu pòzĩ, eye àmèwo kpata pu dù to va le Paolò, eye wo dɔ̃ ɛ̀ to lè mawuxɔa mè, tu èhɔ̃awo zè ɖèka.

³¹Ekè wo le trɔ do è ne woa wù ìa, àmè ɖe va gblɔ̃ na Romàtɔwo be àhùaga gãa be: “Yèruzàlɛm be èdùa keŋu tɔ̀zĩ.”

³²Zè ɖèkaa, e ɖè gbãdãgbã ku àhùaga ɖewo bɔ̀ ɖo ye ɖokoe ŋuti, eye wo sidù yì tèpea. Ekè àmè kèwo le pò Paolòa kpɔ àhùaga gãa ku gbãdãgbãwoa, wo tɔtè Paolò pòpo.

³³Àhùaga gãa zɔ̃ gogo Paolò, le è, ɖè ègbè be woa do è kɔ̀sɔ̀kɔsɔ èvè. E yomè a, e biɔ àmè kè Paolò nyia, ku ènu kè be wɔ̀a sè.

³⁴Vɔ̀a, àmèha a le do àpa, le gblɔ̃ ènyàwo hòo. Ne àmè ɖewo gblɔ̃ ènyà ɖe a, àmè buwo cã la gblɔ̃ ènyà bu. Ekè àhùagaa mu le kpɔ èta na ènyàa lè hũnyàhũnyà kèa mè òa, e ɖè ègbè be wo ne kplɔ̀ Paolò yì ɖo *àgbògbòa mè.

³⁵Wàlɛbɛ kè Paolò va ɖo àcrɔkpeawo gbɔa, gbãdãgbãwo kɔkɔ ɛ̀, ɖo àmèha a be àdã wɔ̀wɔa ŋuti,

³⁶eye àmèawo keŋu kplɔ̀ ɛ̀ do hòo, le do àpa be: “Mì wù ì!”

³⁷Ekè wo kplɔ̀ Paolò la ɖo *àgbògbòa mèa, e biɔ àhùaga gãa be: “Mù ɖè kuku, wò ɖè èmɔ be ma gblɔ̃ ènyà ɖe na wòa?” Àhùaga gãa biɔ ɛ̀ be: “Wò sè Grikgbea?

³⁸Eŋuã, mu nyi èwò ye nyi Ejiptètɔ ŋua kè na èzĩ tɔ̀ lè àzã kèawo mè eye wò kplɔ̀ èhlɔ̃dãtɔ hotu èvè sɔ̃ŋu yì zògbè ji òa?”

³⁹Paolò ɖo e ŋuti na ɛ̀ be: “Ènyèa? Yudàvi ye mù nyi; wo jì mù lè Tarsò, lè Kilikìa-nyigbã ji, èdù xɔ̀ àsì mè-vi mù nyi. Mù ɖè kuku, na mù ègbè, ne ma pò nupo na dùkɔ̃a.”

⁴⁰Àhùaga gãa na ɛ̀ ègbè, eye Paolò tɔtè ɖo àcrɔkpeawo ji, mì àsi na dùkɔ̃a, eye àmè sia àmè zĩ tototo. Paolò pò nupo na wo lè Aram-gbe mè, be: