Read gen Èdɔwɔ̀wɔwo 23 Bible Online

Èdɔwɔ̀wɔwo 23 - gen bible

Èdɔwɔ̀wɔwo 23

¹Paolò le ŋùkuvi ɖo èdùnyagblɔ̃tɔawo ŋuti, eye be gblɔ̃ be: “Nɔ̀viwo, mù nɔ̀ àgbè ku *jìjigbè àdodoe, lè Mawu be ŋùmè, kaka va na egbè.”

²Vɔ̀a, mawunɔ gã, Ànanìa gblɔ̃ na yebe ŋutimeawo be woa pò ènu gbɔ na Paolò!

³Paolò gblɔ̃ na ɛ̀ be: “Mawu ye la pò wò, èwò kè lè sìgbè èglìkpo kè wo sì àkalo ɣe do a nènea! Wò nɔ̀ ànyi be yèa ɖo kòjo na mù, zɔ̃ ɖo èsea ji. Èsea mu na be woa pò mù ò, vɔ̀a wò le ɖè ègbè be woa pò mù!”

⁴Yebe ŋutimeawo gblɔ̃ na Paolò be: “E! Mawu be mawunɔ gãa ye wò le zũ a?”

⁵Paolò ɖo e ŋuti be: “Nɔ̀viwo, nyè mu nya be e ye nyi mawunɔ gãa ò; ɖo wo ŋlɔ̀ ɖɛ be: 'Mù gbà gblɔ̃ ènyà kpòtoe ɖo dùkɔ̃ wòa be èga ŋuti ò.'”

⁶Ekè Paolò kpɔ be, lè èdùnyagblɔ̃haa mèa, àmè ɖewo nyi Sadusìwo, àmè ɖewo nyi Farizìwoa, e do àpa sɛ̃sɛ̃ ɖe lè kòjoɖopea be: “Nɔ̀viwo, ènyè yaa, Farizì mù nyi, eye mù nyi Farizì-vijìji. Ŋùɖo kè lè àsi nyè be àmè kukuwo la fɔ̃a, ŋuti ye wo dɔ̃ mù va kòjoɖope fikèa ɖo.”

⁷Ekè e pò nupo àlekea, ènyà dɔ̃dɔ̃ ɖo Farizì ku Sadusì kèwo lè funuawo dòmè, àleke be, àmèha a ma ɖo tèpe èvè.

⁸Sadusìwo le gblɔ̃ be àmè fɔ̃fɔ̃ so èku ɖe mu lè ò; àtikplɔtɔ ɖe mu lè ò; gbɔ̃gbɔ̃ ɖe cã mu lè ò. Farizìwo ya xɔ̀nà ènu kèawo kpata ji sè.

⁹Eye àpa dodo hòoa gbà sɛ̃ŋu ɖo e ji. Ènuŋlɔ̀tɔ[27], kèwo lè Farizìawo dòmèawo, sitè, dɔ̃ ènyà ku àdã be: “Mi mu kpɔ hùɛgbledo ɖekpe lè ŋusù kèa ŋuti ò, e teŋu nyi be gbɔ̃gbɔ̃ ɖe, àlo àtikplɔtɔ ɖe, ye pò nupo na ɛ̀.”

¹⁰Zigìdi a va le sɛ̃ŋu ɖo e ji kpe è, eye àhùaga gãa vɔ̃ be, wo la va trɛ̃ Paolò. Eŋuã ŋuti be yɔ gbãdãgbãwo, na be wo va ɖè Paolò jo lè àmèawo dòmè, kplɔ̀ ɛ̀ yì *àgbògbòa mè.

¹¹Lè èzã kè kplɔ̀ ɛ̀ do a mèa, Tɔhonɔ̀ to ɖo Paolò ji, gblɔ̃ na ɛ̀ be: “Àgbɔ̃ ne jèpò na wò; wò ɖù ɖase so ŋuti nyè lè Yèruzàlɛm fikèa, nènea ke ye wò la gbà ɖù ì so ŋuti nyè lè Romà cã.”

¹²Ekè èŋù kèa, Yudàvi ɖewo bla *èse. Wo tà ènu ɖo e ji be, ne yèwo mu wù Paolò òa, yèwo mu la ɖù ènu ɖekpe, àlo la nù èsì ò.

¹³Wo àmè kèwo bla èse kèa, wo wu àgbètɔ èkà.

¹⁴Wo yì kpɔ * mawunɔ gãa ku èdùmèmègãwo, gblɔ̃ na wo be: “Mi ɖo ègbè du, tà ènu ɖo e ji be, ne mi mu wù Paolò òa, mi mu la ɖù ènu ɖekpe ò.

¹⁵Ye ŋutia, fifìa, mìa ku èdùnyagblɔ̃haa, mì biɔ àhùaga gãa be ne kplɔ̀ Paolò va na yèwo; mì la to na ɛ̀ be yèwo jro la gbà sè ènyàa mè kito-kito. Gbɔ̀xue be la va mìa gbɔa, mia yaa, mi la nɔ̀ àlɔ̀ji, la wù ì lè èmɔa ji.”

¹⁶Vɔ̀a, Paolò be nɔ̀vi nyɔ̃nù be èvi-ŋusù ɖèka sè *èse kè wo le bla ɖo nyìnea ŋutia. E yì e gbɔ lè *àgbògbòa mè, yì fĩ tofĩ na ɛ̀.

¹⁷Paolò yɔ àhùagawo dòmètɔ ɖèka, gblɔ̃ na ɛ̀ be: “Kplɔ̀ ɖèkajɛ kèa yì àhùaga gãa gbɔ; e ɖo ènyà ɖe la to na ɛ̀.”

¹⁸Àhùagaa kplɔ̀ ɖèkajɛ a yì àhùaga gãa gbɔ, gblɔ̃ na ɛ̀ be: “Ègàmènɔ̀tɔ Paolò, ye yɔ mù, sɔ ɖèkajɛ kèa do àsi na mù be ma kplɔ̀ ɛ̀ va na wò, ɖo e jro la to ènyà ɖe na wò.”

¹⁹Àhùaga gãa le ɖèkajɛ a be àlɔ̀, kplɔ̀ ɛ̀ yì àsà mè, biɔ ɛ̀ be: “Ènyà kɛ ye wò jro la to na mù ò?”

²⁰Đèkajɛ a ɖo e ŋuti be: “Yudàviwo ɖo ègbè du, la biɔ wò be wòa kplɔ̀ Paolò va èdùnyagblɔ̃haa be ŋùkɔ̀ èsɔ̀, sìgbè wo jro la gbà sè yebe ènyàa mè àdodoe nène.

²¹Veve ɖe a, mù gbà lɔ̃ ɖo e ji na wo ò, ɖo woabe àmè sùgbɔ wu èkà la doxa na ɛ̀, la le è. Àmè kèawo gblɔ̃, tà ènu ɖo e ji, be ne yèwo mu wù Paolò òa, yèwo mu la ɖù ènu ò, yèwo mu la nù èsì cã ò. Woawo keŋu lè àlɔ̀ji fifìa. Àpo ègbèɖèɖe kpò ye wo le nɔ̀tè kpɔ.”

²²Àhùaga gãa ɖo ɖèkajɛ a ɖoɖa, do èse na ɛ̀ be: “Mù gbà to na àmè ɖe be wò ɖè èse bla kèa be ènyà na mù ò.”

²³Àhùaga gãa yɔ àhùaga èvè, eye e gblɔ̃ na wo be: “Mì bɔ̀ gbãdãgbã èkà àtɔ̃, gbãdãgbã èsɔdotɔ èkà takpo ci èwo ku gbãdãgbã kèwo hɛ̃nà èhuãa èkà àtɔ̃ ɖɛ. Mì la jo, èzã gà àsiɖèkɛ mè, la jè èmɔ yì Kayizarèa.

²⁴Mì bla àkpà na èsɔ ɖewo ɖɛ na Paolò cã, la kplɔ̀ ɛ̀ yì èdùjiɖùtɔ Felì[28] gbɔ gãgã ɖe.”

²⁵E ŋlɔ̀ xoma ɖoɖa èdùjiɖùtɔa, eye be gblɔ̃ ɖo e mè be:

²⁶“Bùbùtɔ gã, èdùjiɖùtɔ Felì, ènyè Klodìo Lisia ye ŋlɔ̀ xoma kèa ɖoɖa wò. Mù do ègbè na wò.

²⁷Ŋusù kèa kè mù ɖo ɖoɖa wòa, Yudàviwo ye le è, wo le ji la wù ì, eye nyè ku gbãdãgbã nyèwo mi yì, hlùɛ̃ ɛ̀ xɔ̀ lè woa si, ekè mù sè be Romàtɔ ye be nyia.

²⁸Ekè mù jro be ma ji gɔ̃mè na ènyàa, ne ma nya àgɔ̀ kè ŋuti wo le dohùɛ do è ɖoa, mù kplɔ̀ ɛ̀ yì woabe èdùnyagblɔ̃haa be ŋùkɔ̀.

²⁹Mù va kpɔ be, ènu kèwo ŋuti wo le dohùɛ do è ɖoa kù ɖo woabe èse ŋuti. Vɔ̀a, nyè mu kpɔ ènu ɖe lè e ŋuti kè la na be woa ɖo èku kòjo na ɛ̀, àlo woa do è ègàkpa mè ò.

³⁰Ekè wo gbà va gblɔ̃ na mù be Yudàviwo bla èse ɖo e ŋutia, mù ɖèbla ɖo è ɖoɖa wò, eye mù gblɔ̃ na àmè kèwo le dohùɛ do èawo zè ɖèka be wo ne va yɔ kòjoa lè gbɔ wò.”

³¹Gbãdãgbãawo wɔ̀ ɖo ènu kè wo gblɔ̃ na woa ji: wo kplɔ̀ Paolò yì Ãtipatrè, èzã ŋua mè.

³²Ekè èŋù kèa, gbãdãgbã kèwo zɔ̃ àfɔ̀awo, trɔ gbɔ̀ va àgbògbòa mè, eye wo tàsi àmè kèwo do èsɔawo kplɔ̀ Paolò yì èdùa mè.

³³Ekè èsɔdotɔwo yì Kayizarèaa, wo sɔ xoma a na èdùjiɖùtɔa, kplɔ̀ Paolò do àsi na ɛ̀.

³⁴Èdùjiɖùtɔa hlɛ̃ xoma a, eye be biɔ ɛ̀ àgo kè ji be soa. Ekè e sè be Kilikìatɔ ye be nyia,

³⁵e gblɔ̃ na ɛ̀ be: “Ne àmè kèwo le dohùɛ do wòawo vaa, mù la sè ènyà kè lè àsi wòa.” E ɖè ègbè be woa sɔ ɛ̀ do èdùjiɖùtɔ Herod be èfìɔsaa mè, ne woa kpɔ ɛ̀ ji.