Read gen Èdɔwɔ̀wɔwo 24 Bible Online

Èdɔwɔ̀wɔwo 24 - gen bible

Èdɔwɔ̀wɔwo 24

¹Ŋùkèkè àtɔ̃ yomè a, mawunɔ gã Ànanìa ku èdùmèmègã ɖewo, kudo ènyànuɖètɔ kè wo yɔna be Tɛrtulòa va Kayizarèa, va jè Paolò be èhùɛ na èdùjiɖùtɔa.

²Èdùjiɖùtɔa yɔ Paolò va, eye Tɛrtulò sɔ ènyà le dohùɛ do Paolò be: “To ji wò, Felì ɖìnyi, ye mi kpɔ fàfa sùgbɔ ku ènujràɖowo, so àpo èbèlele na dùkɔ̃ kèa mè.

³Mi nya ènu kèawo keŋu na wò, wè sia wè, lè àfi sia àfi, eye mi lè do yebe àkpe na wò ŋutɔ.

⁴Gãkea, ne nyè mu gbà le wò ɖɛ, dìdì òa, mù le ɖè kuku na wò, be wòa ɖo èto mi vi ɖe ku àpo àdɔ̀mènyuɛ̃a.

⁵Ŋusù kèa, mi kpɔ be èdɔ̀ vuɛ̃ ɖe ye be nyi. E dona èzĩ tɔ̀tɔ Yudàvi kèwo lè xixe bliboa mèawo mè. Nazarɛttɔwo be sɛ̃sɛ̃haa be èga ye be nyi.

⁶E gbà jro la gble èkɔ̀do na mawuxɔa ŋutɔ cã, eye mi le è. [Mi jro la ɖo kòjo na ɛ̀, zɔ̃ ɖo mia ŋutɔwo, miabe èsea ji.

⁷Vɔ̀a, àhùaga gã, Lizìa xɔ̀ ɛ̀ lè mia si ku ŋusɛ̃,

⁸eye be gblɔ̃ be àmè kèwo le dohùɛ do èawo ne va jè èhùɛa na wò.] Ne wò ŋutɔ, wò biɔ ɛ̀ ènyàa, wò la kpɔ be ènu kèwo keŋu ŋuti mi le dohùɛ do è ɖoawo nyi nyàwo.”

⁹Yudàviwo lɔ̃ ɖo ènu kè Tɛrtulò gblɔ̃a ji be ènu nyi nènea nyàwo.

¹⁰Èdùjiɖùtɔa sɔ ènyàa na Paolò, eye be xɔ̀ ènyàa gblɔ̃ be: “Mù nya be wò le ɖo kòjo lè dùkɔ̃ kèa mè fifìa, e wɔ̀ èpè sùgbɔ. Eŋuã ŋuti ye mù ɖè èjì, la gblɔ̃ ènyà, la sɔ ɖè kunù na ɖokoe nyè.

¹¹Mù yì, ne ma sumɔ Tɔhonɔ̀ lè Yèruzàlɛm fifìa, mu wu ŋùkèkè woèvè ò. Wò ŋutɔ, wò teŋu ji e gɔ̃mè kpɔ.

¹²Wo mu kpɔ mù, mù le dɔ̃ ènyà ku àmè ɖekpe lè mawuxɔa mè ò. Wo mu kpɔ mù, mù le tɔ̀zĩ àmèha a lè bɔ̀bɔ̀peawo loo, àlo lè àfi bu lè èdùa mè ò.

¹³Ènu kè be èhùɛ wo le do do mù fifìa, wo mu teŋu gblɔ̃ ènyà ɖe kè wo la sɔ ɖè è fiɔ wò be nyàwo ye be nyi ò.

¹⁴Mù xɔ̀ ɖo e ji na wo be, Mawu kè mia tɔgbewo sumɔnaa ye mù le sumɔ, to èmɔ yeye kè wo gblɔ̃ be mu sɔ̀gbè òa ji. Vɔ̀a, ènu kèwo wo ŋlɔ̀ ɖo Èse Xoma mè, ku ènu kèwo gblɔ̃ɖɛtɔwo gblɔ̃a, mù xɔ̀ wo keŋu sè.

¹⁵Mù ɖo ŋùɖo ɖo Mawu ŋuti, sìgbè lekè woawo ŋutɔ cã, wo ɖo ŋùɖo ɖo e ŋutia nène. Mawu la va fɔ̃ ènu nyuɛ̃wɔ̀tɔwo ku ènu bàɖàwɔ̀tɔwo so èkuwode, ɖo àgbè.

¹⁶Ekèa ŋuti ye nyè cã, mù hlùɛ̃nà do, veve ɖe be ma ɖo *jìjigbè àdodoe lè Mawu ku àgbètɔwo be ŋùku mè.”

¹⁷“Kè mù yì xɔ̀ èpè ɖewo lè ègbe ji yomè a, mù gbà trɔ va Yèruzàlɛm, mù hɛ̃ ènu nana va, ne ma na àpe dùkɔ̃a, ku ne ma savɔ na Mawu.

¹⁸Ènu kèa ye mù le wɔ̀ lè mawuxɔa mè, wàlɛbɛ kè Yudàviwo va kpɔ mùa. Mù lè ɖokoe nyè ɖì, àmèha ɖe mu nɔ̀ funua ò. Èzĩtɔ̀tɔ ɖe mu nɔ̀ ànyi ò.

¹⁹Vɔ̀a, ne Yudàvi kèwo so Azìaawo ye kpɔ ènu ɖe la gblɔ̃ so ŋuti nyèa, woawo ye la va gbɔ wò, la jè àpe èhùɛ na wò.

²⁰Àlo àmè kèwo lè fikèa fifìawo, woawo yaa, wo ne gblɔ̃ àgɔ̀ kè wo kpɔ mù, mù jè, wàlɛbɛ kè mù nɔ̀tè lè èdùnyagblɔ̃haa be ŋùkɔ̀a.

²¹Ènyà ɖèka kpò mù do àpa, gblɔ̃ lè woa dòmè be: 'Àmè kukuwo be fɔ̃fɔ̃ so èku ŋuti ye wo yɔ mù kòjo egbèa lè mìabe ŋùkɔ̀!'”

²²Ekè Felì mɔnu jè sɛ̃sɛ̃ kèa ŋuti nyuɛ̃ ɖe a, e dɔ̃ kòjoɖo-zãa yì ŋùkɔ̀, gblɔ̃ na wo be: “Ne àhùaga gã Lizìa vaa, mù la le mìabe ènyàa kpɔ.”

²³E gblɔ̃ na àhùagaa be, ne kpɔ Paolò ji, ne na ɛ̀ vòvò, eye ne na be yebe èxlɔ̃wo woa va nɔ do è àlɔ̀.

²⁴Ŋùkèkè ɖewo yomè a, Felì ku èsrɔ̃a Drusilà, kè nyi Yudàvia va. E dɔ̃ wo yɔ Paolò va, eye e ɖo èto ènyà kè Paolò gblɔ̃ so Yesù Kristò be xɔ̀sèa ŋutia.

²⁵Vɔ̀a, ekè Paolò be ènyàa le kù ɖo jɔ̀jɔɛ wɔ̀wɔ, àgbè nyuɛ̃ zãzã, àmè ɖokoe ji ɖùɖu ku Mawu be kòjoɖoɖo na àgbètɔwo ŋutia, vɔ̃vɔ̃ jè Felì ji, eye be gblɔ̃ na Paolò be: “Jo yì gbɔ̀xue, ne mù va kpɔ vòvoa, mù la gbà yɔ wò.”

²⁶E le kpɔ èmɔ cã be Paolò la na yè ègà; eŋuã ŋuti ye be dɔ̃na wo yɔna ɛ̀ va eji-eji, eye be kãna àseŋu ku ì ɖo.

²⁷Èpè èvè yomè a, Pɔrkìo Fɛstò va ɖɔ̀lì Felì. Ekè Felì jro be yèa jè Yudàviwo be ŋùmè a, e tàsi Paolò ɖo ègàkpaa mè.