Read gen Èdɔwɔ̀wɔwo 25 Bible Online

Èdɔwɔ̀wɔwo 25 - gen bible

Èdɔwɔ̀wɔwo 25

¹Ekè Fɛstò va Kayizarèa, ŋùkèkè ètɔ̃gɔ̃a gbèa, e so funua yì Yèruzàlɛm.

²Mawunɔ gãa ku Yudàviwo be àmègãawo bɔ̀, eye wo yì jè Paolò be èhùɛ na Fɛstò,

³eye wo biɔ ɛ̀ be, ne kpe ɖo yèwo ŋuti, ne bèa na woa kplɔ̀ Paolò va Yèruzàlɛm. Wo gblɔ̃ nènea, ɖo wo bla *èse ne woa wù ì, lè èmɔ ji.

⁴Vɔ̀a, Fɛstò ɖo e ŋuti be Paolò lè ègàkpa mè lè Kayizarèa, be yè ŋutɔ yè la yì funua, sɔ̀sɔɛ ɖe kèa.

⁵E gbà gblɔ̃ be: “Ne ŋusù kèa jè àgɔ̀ ɖe a, mìabe àmègãwo ne kplɔ̀ mù do yì Kayizarèa, ne woa yì dohùɛ do è.”

⁶Fɛstò mu nɔ̀ woa gbɔ, wu ŋùkèkè ènyi, àlo èwo ò. Kè be trɔ yì Kayizarèaa, e nɔ̀ ànyi, yebe èŋù kè gbè, lè kòjoɖopea, eye be na wo kplɔ̀ Paolò va.

⁷Ekè Paolò vaa, Yudàvi kèwo so Yèruzàlɛm awo va pòxla do è, sɔ ènyà sɛ̃sɛ̃ sùgbɔ ɖo e ŋuti. Vɔ̀a, wo mu teŋu ɖè è fiɔ be nyàwo ye ènyàawo nyi ò.

⁸Paolò ɖè kunù na ye ɖokoe be: “Nyè mu dà lè Yudàviwo be èsea ji, àlo gble èkɔ̀do na mawuxɔa, àlo jè àgɔ̀ ɖe do Romà-Fìɔgãa ò.”

⁹Ekè Fɛstò jro be, yèa jè Yudàviwo be ŋùmè a, e biɔ Paolò be: “Wò jro la yì Yèruzàlɛm, ne woa ɖo kòjo na wò ɖo ènu kèawo ŋuti lè àpe ŋùku mèa?”

¹⁰Paolò ɖo e ŋuti be: “Romà-Fìɔgãa be kòjoɖopea be ŋùkɔ̀ ye mù lè, ekèa ŋuti ye Romà-Fìɔgãa be ŋùkɔ̀ ye wo la ɖo kòjo na mù lè. Nyè mu wɔ̀ ènu ɖe na Yudàviwo ò, sìgbè lekè wò ŋutɔ, wò mɔ̀nu jè e ŋuti nyuɛ̃ ɖe a nène.

¹¹Ne mù jè àgɔ̀ nyàwo, eye ne mù wɔ̀ ènuvuɛ̃ ɖe kè jè na èkua, nyè mu gbe be ma ku ò. Vɔ̀a, ne èhùɛ kè àmèwo lè do do mùa, mu nyi nyàwo òa, àmè ɖekpe mu kpɔ èmɔ, la ɖè àsi lè ŋuti nyè na wo ò. Ye ŋutia, mù sɔ ènyà nyèa do àsi na Romà-Fìɔgãa.”

¹²Fɛstò ku yebe àgbònùglawo yì èkpavi, eye wo va gblɔ̃ na Paolò be: “Wò sɔ ènyà wòa na Romà-Fìɔgãa, ye ŋutia, wò la yì Romà-Fìɔgãa gbɔ.”

¹³Ekè ŋùkèkè ɖewo va yìa, èfìɔ *Agripà ku Berenikè va Kayizarèa, ne woa do ègbè na Fɛstò.

¹⁴Ekè wo nɔ̀ èdùa mè funua, ŋùkèkè sùgbɔa, Fɛstò kã Paolò be ènyàa ta na èfìɔa. E gblɔ̃ na ɛ̀ be: “Ŋusù ɖe lè fikèa. Èdùjiɖùtɔ Felì ye gble è ɖo ègàkpa mè.

¹⁵Wàlɛbɛ kè mù yì Yèruzàlɛm-a, mawunɔ gãwo ku Yudàviwo be èdùmèmègãwo va jè yebe èhùɛ na mù, eye wo biɔ be ma gblehùɛ do è.

¹⁶Mù ɖo e ŋuti na wo be, gbɔ̀xue Romàtɔwo la sɔ àmè ɖe do àsia, àmè kèwo lè dohùɛ do èawo ɖo la jè yebe èhùɛ lè àmèa ŋutɔ be ŋùkɔ̀, ne bèa kpɔ èmɔ, la ɖè kunù na ye ɖokoe.

¹⁷Wo kplɔ̀ mù do va fikèa, eye nyè mu nɔ̀tè ò, yebe èŋù kè gbè kpòa mù nɔ̀ ànyi lè kòjoɖopea, na be woa kplɔ̀ ŋusùa va.

¹⁸Àmè kèwo le dohùɛ do èawo sitè ɖo e ŋuti. Vɔ̀a, àgɔ̀ kèwo mù susu be wo la gblɔ̃ be e jè a, wo mu gblɔ̃ yebe ɖekpe ò.

¹⁹Ènu ɖe kpò wo le dɔ̃ kudo è. Wo le dɔ̃ ènyà ku ì, so woa ŋutɔ woabe sɛ̃sɛ̃, ku ŋusù ɖe kè wo yɔna be Yesùa ŋuti. Ŋusù kèa ku. Vɔ̀a, Paolò be e kpɔ̀tɔ̀ lè àgbè.

²⁰Ekè nyè mu nya àlekè mù la gblɔ̃ ènyà kèawo ɖo òa, mù biɔ Paolò be e jro la yì Yèruzàlɛm, ne woa ɖo kòjoa na ɛ̀ lè funu màa.

²¹Vɔ̀a, Paolò yɔ kòjo gã: e biɔ be woa kpɔ yè ji, kaka na wàlɛbɛ kè Romà-Fìɔgãa la na ègbèta ɖe so yèbe ènyàa ŋuti. Eŋuã ŋuti, mù na ègbè be wo ne kpɔ ɛ ji, kaka na wàlɛbɛ kè mù la ɖo è ɖoɖa èfìɔgãa be ŋùkɔ̀a.”

²²*Agripà gblɔ̃ na Fɛstò be: “Nyè ŋutɔ mù jro la sè ŋusùa be ènu mè-gbè.” Fɛstò ɖo e ŋuti na ɛ̀ be: “Èsɔ̀a, wò la sè yebe ènyàa.”

²³Ekè èŋù kèa, Agripà ku Berenikè bɔ̀ àhùagawo kudo èdùmè-hùɛ̃yiwo, kplɔ̀ wo ɖo kòjoɖopea mè ku yɛyì. Fɛstò ɖè ègbè be woa kplɔ̀ Paolò va.

²⁴E yomè a, Fɛstò gblɔ̃ be: “Èfìɔ Agripà, ku mì, àmè kèwo keŋu lè fikèa, mì kpɔ ŋusù kèa. Yudàviwo keŋu jè yebe èhùɛ na mù lè Yèruzàlɛm, kaka va fikèa, le do àpa be mu gbà nɔ̀ àgbè ò.

²⁵Nyè yaa, nyè mu kpɔ be e jè àgɔ̀ ɖe ne woa wù ì ò. Vɔ̀a, ekè ye ŋutɔ yɔ kòjogã lè Romà-Fìɔgã gbɔa, ènu ŋua ŋuti ye mù ɖo è be ma ɖo è ɖoɖa e gbɔ.

²⁶Ekè nyè mu ɖo ènyà àdodoe ɖe la ŋlɔ̀ so e ŋuti ɖoɖa Èfìɔgã òa, ye ŋuti ye mù yɔ ɛ̀ va mìabe ŋùkɔ̀, vevetɔa, èwò èfìɔ Agripà be ŋùkɔ̀, ne wòa biɔ ɛ̀ ènyà sè, àleke be ma kpɔ ènyà ɖe ŋlɔ̀ ɖoɖa.

²⁷Đo mù kpɔ be, mu sɔ̀gbè be woa ɖo ègàmènɔ̀tɔ ɖoɖa àmè, kè wo mu la gblɔ̃ ènu kè be wɔ̀ tututua bɔ̀ ɖo e ŋuti ò.”