Read gen Èdɔwɔ̀wɔwo 26 Bible Online

Èdɔwɔ̀wɔwo 26 - gen bible

Èdɔwɔ̀wɔwo 26

¹*Agripà gblɔ̃ na Paolò be: “Ne wò ɖo ènyà ɖe la gblɔ̃, la sɔ ɖè kunù na ɖokoe wòa, gblɔ̃ ɛ̀; mù ɖè èmɔ na wò.” Paolò kɔ àlɔ̀ yìji, xɔ̀ ènyàa, ɖè kunù na ye ɖokoe be:

²“Èfìɔ *Agripà, e jɔ̀jì na mù ŋutɔ, be, ɖo ènu kè be èhùɛ ye Yudàviwo le do do mù ŋutia, mù la teŋu gblɔ̃ ènyà, sɔ ɖè kunù na ɖokoe nyè lè àpo ŋùkɔ̀, egbè,

³ɖo wò mɔ̀nu jè Yudàviwo be èhùɛdodo ŋuti nyuɛ̃ ɖe, eye wò nya ènu kè wo dɔ̃nà ku woa nɔ̀nɔwo. Ye ŋutia mù ɖè kuku be wòa gbɔ̃ èjì ɖɛ blɛ̀wù, ne wòa sè ènyà nyèwo.”

⁴“Àlekè mù zã àgbè nyè ɖo, so àpe ɖèkajɛ mè, àlekè mù nɔ̀ àpe dùkɔ̃a dòmè ɖo, so wàlɛbɛ kè wo jì mùa, àlekè mù nɔ̀ Yèruzàlɛm ŋutɔ cã ɖoa, Yudàviwo keŋu nya ɛ̀.

⁵Wo nya mù fifìa, e dìdì, eye, ne wo jro a, wo la teŋu ɖù ɖase be mù nɔ̀ sɛ̃sɛ̃ha kè sɛ̃ŋu wu kpɔ̀tɛawo keŋuã mè. Sɛ̃sɛ̃ha kèa ye nyi Farizìwo tɔ̀.

⁶Ne wo le ɖo kòjo na mù egbèa, àjɔ̀gbè kè Mawu fìã na mia tɔgbewo, eye mù lè ŋùɖo mè na a, ŋuti ye.

⁷Miabe kɔ̀ta woèvèawo cã ɖo ŋùɖo la kpɔ àjɔ̀gbè kèa be e mè vava, ekèa ŋuti ye wo sɛ̃nà Mawu ku vevedonu, èzã ku kedè, Èfìɔ bùbùtɔ! Ŋùɖo kèa ŋuti ye Yudàviwo le dohùɛ do mù ɖo.

⁸Nukɛ ŋuti ye mì susu be e nyi ènu kè wo mu la teŋu xɔ̀sè ò, be Mawu la fɔ̃ àmè kukuwo ò?

⁹Nyè ŋutɔ mù susu sãa be mù la wɔ̀ ènu sia ènu kè lè xixea mè, sɔ gũ èta na Yesù Nazarɛttɔ̀a be nyikɔ.

¹⁰Ènu kèa ye mù wɔ̀ lè Yèruzàlɛm. Mù xɔ̀ àcɛ̀ lè * mawunɔ gãwo si, lènà àmè sùgbɔ kèwo xɔ̀ Yesù ji sèawo do ègà, eye wàlɛbɛ kè wo le wù woa, mù lɔ̃nà ɖo e ji.

¹¹Eji-ejia, mù dɔ̃nà èto na wo, to bɔ̀bɔ̀pewo keŋu; mù zĩna woa ji, ne woa gblɔ̃ bùsu-nya ɖo Yesù be nyikɔ ŋuti. Mù crì woabe ènyà gbɔ, eye mù yìnà kaka èdù buwo mè ŋutɔ cã, yì dona àyà na wo.”

¹²“Èdɔ kèa ŋuti ye mù jè èmɔ le yì Damaskò ɖo, ku * mawunɔ gãwo be àcɛ̀, ku ŋusɛ̃.

¹³Èfìɔ bùbùtɔ èmɔa ji ye mù lè, le yì, eye sìgbè dɔ̃ŋùkusu, gà woèvè mè nènea, kɛ̃klɛ̃ ɖe so jiŋùkusi, klɛ̃ wu èwè be kɛ̃klɛ̃, va klɛ̃ pòxla nyè ku àmè kèwo le zɔ̃ èmɔ kudo mùawo,

¹⁴eye mi jè ànyi. Mù sè ègbè ɖe, kè le gblɔ̃ na mù lè Aràmgbe mè be: 'Saolò! Saolò! Nukɛ ŋuti wò le tĩ yo nyè mè ɖo ò? E la sɛ̃ŋu na wò be wòa tù àfɔ̀ èhũa nu[29]!'

¹⁵Mù biɔ sè be: 'Èwò àmè kɛ ye ò, Tɔhonɔ̀?' Tɔhonɔ̀ ɖo e ŋuti na mù be: 'Ènyè Yesù, kè yomè wò le tĩa ye.

¹⁶Vɔ̀a, sitè, ne wòa tɔtè! Ènu kè ŋuti mù ze ɖo ji wò ɖoa ye nyi ekèa: mù la sɔ wò wɔ̀ àpe sumɔ̃vi. Wò la nyi àpe ɖàsèfo, eye wò la ɖè gbèfã ènu kèwo wò kpɔ fifìa ku ènu kèwo mù la gbà ɖè fiɔ wòawo na àmèwo.

¹⁷Mù la hlùɛ̃ wò gã lè Yudàviwo ku àmè kèwo mu nyi Yudàvi òawo be dùkɔ̃ kèwo mè mù la dɔ̃ wò ɖoɖaawo si.

¹⁸Mù dɔ̃ wò ɖoɖa, ne wòa hũ ŋùkuvi na wo, ne wòa kplɔ̀ wo so vìvìti mè, va kɔ̀kɔ̀ɛ mè, la ɖè wo so Satana be ŋusɛ̃ gɔ̃mè va Mawu gbɔ, àleke be woa xɔ̀ èvuɛ̃wo be sɔsɔkè, ne woa kpɔ nɔ̀pe lè àɖèsãmewo dòmè, la ɖù ècrɔ̃, ne wo xɔ̀ ji nyè sè a.'”

¹⁹“So gà ŋua mèa, èfìɔ Agripà, ekè ènu nyi nènea, nyè mu ku èto ɖo ènu kèwo Mawu sɔ fiɔ mùawo ŋuti ò.

²⁰Vɔ̀a, mù tɔ e ji, yì gblɔ̃ mawunyaa na Dàmaskòtɔwo ku Yèruzàlɛmtɔwo, gbɔ̀xue mù trɔ va yì gblɔ̃ ɛ̀ na àmè kèwo lè Yudeà be àgowo keŋu ji, kudo àmè kèwo mu nyi Yudàvi òawo, mù gblɔ̃ na wo be wo ne ɖɔ̀lì èdɛ̃, ne woa trɔ va Mawu gbɔ, ne woa wɔ̀ èdɔ kèwo sɔ̀ ku èdɛ̃ ɖɔ̀lìa.

²¹Ekèa ŋuti ye Yudàviwo le mù to lè mawuxɔa mè, eye wo jro la wù mù ɖo.

²²Mawu do mù àlɔ̀ eye mù kpɔ̀tɔ̀ lè àgbè kaka va na egbè, eye mù le ɖù àŋɛ̀nyuɛ̃ a be ɖase lè àgbètɔwo keŋu be ŋùkɔ̀, ɖèviwo ku àmègãxowo. Nyè mu gblɔ̃nà ènu ɖe kè tovò na ekèwo gblɔ̃ɖɛtɔwo ku Mosè, wo gblɔ̃ be wo la va jɔ̀awo ò. E ye nyi be:

²³Kristò la kpe èfũ; e ye la nyi àmè cucugbã kè la fɔ̃ so èkua, eye e la do kɔ̀kɔ̀ɛ be hlùɛ̃gãa be àŋɛ̀a na mia Yudàviwo ku àmè kèwo mu nyi Yudàvi òawo.”

²⁴Ekè Paolò ɖè kunù na ye ɖokoe àlekea, Fɛstò gblɔ̃ sɛ̃sɛ̃ ɖe be: “Paolò, wò jè àɖàhùa ye à? Àpo xoma nyanya sùgbɔa le gble èta gbɔ na wò!”

²⁵Paolò ɖo e ŋuti na ɛ̀ be: “Bùbùtɔ Fɛstò, nyè mu lè jè àɖàhùa ò. Ènyà kè mù le gblɔ̃a nyi nyàwo eye be sɔ̀gbè.

²⁶Èfìɔ kè mù le pò nupo na ku kãkã ɖo e jia cã nya ènu kèawo nyuɛ̃ ɖe, eye mù xɔ̀sè be, mu dã ènu kèawo dòmètɔ ɖe ò, ɖo wo mu jɔ̀ lè wawla mè ò.

²⁷Èfìɔ Agripà! Wò xɔ̀ ènyà kèwo gblɔ̃ɖɛtɔwo gblɔ̃a ji sè a? Mù kã ɖo e ji be wò xɔ̀ wo ji sè.”

²⁸Èfìɔ Agripà gblɔ̃ na Paolò be: “E kpɔ̀tɔ̀ vi ɖe ne, to àpo ènyà mè ɖèɖe jia, ma trɔ zũ Kristòtɔ̀ trolo!”

²⁹Eye Paolò gblɔ̃ be: “Mawu ne jro be, ne e kpɔ̀tɔ̀ vi ɖe àlo sùgbɔa, mu gbà nyi èwò ɖèka kpò ò, vɔ̀a àmè kèwo keŋu le sè ègbè nyè egbèawo cã, woawo keŋu, woa trɔ zũ àmè kè ŋùkumè mù nyi egbèa, ɖe kpò wo mu la do mì kɔ̀sɔ̀kɔsɔ lekea ò.”

³⁰Agripà ku Fɛstò kudo Berenikè gbàkudo àmè kèwo keŋu nɔ̀ ànyi ku woawo sitè.

³¹Ekè wo jo lè funua, wo le ènyàa kpɔ, lè woa ŋutɔwo dòmè be: “Ŋusù kèa mu wɔ̀ ènu ɖe, kè biɔ be woa ɖo èku kòjo na ɛ̀ ò, àlo woa do è ègàkpa mè ò.”

³²Agripà gblɔ̃ na Fɛstò be: “Ne ɖe ye ŋusù kèa mu yɔ kòjo gã lè Romà-Fiɔgãa gbɔ òa, wo kè ɖè àsi lè e ŋuti.”