Read gen Èdɔwɔ̀wɔwo 28 Bible Online

Èdɔwɔ̀wɔwo 28 - gen bible

Èdɔwɔ̀wɔwo 28

¹Ekè mi gã vɔ̀a, mi sè be ètɔ̀dòmèkɔ̃ɛ̃ kèa, Maltà ye wo yɔna ɛ̀.

²Èdùa mètɔwo wɔ̀ àdɔ̀mènyuɛ̃ na mi ŋutɔ. Ekè èji le jà, eye àvìvɔ cã le wɔ̀a, wo do èzò gã ɖe, eye wo yɔ mia kpata be mia va pu ì.

³Paolò bɔ̀ ànakè pupu ɖewo la sɔ do èzòa mè, vɔ̀a, kpɔɖa, jàkpàtà ɖe to lè ànakè wuiwlia mè, va xasa ɖo yebe àlɔ̀ ŋuti, kè èzòa gblɔ̀ do èa.

⁴Ekè èdùa mètɔwo kpɔ èdãa xasa ɖo àlɔ̀ na ɛ̀a, wo gblɔ̃ lè woa nɔ̀nɔwo dòmè be: “Kòkòkòa, àmè kèa èhlɔ̃dãtɔ[34] ye be nyi; ɖo ekè e gã lè àpù si gãkea, èhlɔ̃ biɔbiɔ vòdua kpɔ̀tɔ̀ lè e yomè.”

⁵Paolò hũhũ èdãa ɖo èzòa mè, ekè ènu ɖekpe mu wɔ̀ ɛ̀ ò.

⁶Àmèawo le nɔ̀tè be e la tɔ tɛ̃tɛ̃, àlo la jè ànyi, la ku zè ɖèka. Vɔ̀a, ekè wo nɔ̀tè kaka, ènu ɖe mu wɔ̀ ɛ̀ òa, wo trɔ sùsu gblɔ̃ be: “Vòdu ye be nyi.”

⁷Èdùa mè be èga kè wo yɔna be Publìo, ɖo ànyigbã ɖe lè tèpe kèa. E xɔ̀ mi àmèjro, eye be kpɔ mia ji ŋutɔ, mi nɔ̀ yebe àxomè ŋùkèkè ètɔ̃.

⁸Publìo be ètɔ ci àba ji, ɖoa, àvìvɔ le wɔ̀ ɛ̀, eye e lè dè sìkpĩ. Paolò yì kpɔ ɛ̀, fãkue, eye e sɔ àlɔ̀ ɖo e ji, dà èdɔ̀a na ɛ̀.

⁹Ekèa yomè ye èdɔ̀nɔ̀ kèwo kpɔ̀tɔ̀ lè èdùa mèawo va kpɔ Paolò, eye e dà èdɔ̀ na woawo cã.

¹⁰Wo do vivi mia ŋuti, to èmɔ vòvòvò nu, eye ekè mi le ɖo èhũa mèa, wo na mi ènu kèwo keŋu hiã miawo na èmɔ zɔ̃zɔ̃ a.

¹¹Wètri ètɔ̃ ye mi wɔ̀ lè èdù ŋua mè, gbɔ̀xue mi va ɖo èhũ ɖe kè va nɔ̀ funu, àvìvɔ hùenua. E so Àlɛ̀ksãdrìa, eye wo ɖo nyikɔ na ɛ̀ be: “Vènàvi vòduwo[35]” kè nyi Diɔskuròa.

¹²Mi va ɖo Sirakusà, eye mi nɔ̀ funua, ŋùkèkè ètɔ̃.

¹³Ekè mi jo lè funua, èhũa to àpùa nu kaka yì ɖo Regìo. Ekè èŋù kèa, àpùgo yaa tɔ pòpo eye ŋùkèkè àtɔ̃gɔ̃a gbèa, mi va ɖo Puzɔ̀l.

¹⁴Mi kpɔ mia nɔ̀vi lè Kristò mè kèwo lè funuawo, eye wo biɔ so mia si be mia nɔ̀ yèwo gbɔ ŋùkèkè adrɛ̃, eye mi nɔ̀ woa gbɔ. Fikèa ye mi so lè, yì Romà.

¹⁵Mia nɔ̀vi lè Kristò mè kèwo lè Romàawo sè be mi gbãnà, eye wo va dogò mi lè èmɔ ji. Àmè ɖewo va nɔ̀tè kpɔ mi lè Àmèjrozɛ̃pe Etɔ̃awo be ŋùkɔ̀. Àmè ɖewo ya, va dogò mi lè Apìo. Ekè Paolò kpɔ woa, e do àkpe na Mawu, eye àgbɔ̃ jèpò na ɛ̀.

¹⁶Ekè mi ɖo Romàa, Wo ɖè èmɔ na Paolò be ne nɔ̀ ye ɖokoe si. Wo ɖo gbãdãgbã ɖèka na ɛ̀ be, ne nɔ ɖia ɛ̀.

¹⁷Ŋùkèkè ètɔ̃gɔ̃a gbèa, Paolò yɔ Yudàvi kèwo lè funuawo be àmègãwo va ye ɖokoe gbɔ. Ekè wo bɔ̀a, e gblɔ̃ na wo be: “Nɔ̀viwo, nyè mu jè àgɔ̀ ɖe do miabe dùkɔ̃a ò. Nyè mu dà lè mia tɔgbewo be èkɔ̀dowo ji ò, gãke wo le mù do ègàkpamè lè Yèruzàlɛm, sɔ mù do àsi na Romàtɔwo.

¹⁸Ekè Romàtɔwo kù ènyàa gɔ̃mè kakaa, wo mu kpɔ ènu kè ŋuti wo la ɖo èku kòjo na mù ɖo ò, eye wo jro be yèwoa tàsi mù.

¹⁹Vɔ̀a, Yudàviwo gbe. Ekèa ŋutia, mù kpɔ be e lè na mù kpò be ma yɔ kòjo gã lè Romà-Fìɔgãa gbɔ. Mu nyi be ènyà ɖe lè àsi nyè ne ma sɔ ɖo dùkɔ̃ nyèa ŋuti ye ò.

²⁰Ènu kèa ŋuti ye mù biɔ be ma kpɔ mì, ne ma pò nupo ku mì. Lè nyàwo toto mèa, àmè kè Izràɛl be dùkɔ̃a lè ŋùɖo mè na a ŋuti ye wo do mù kɔ̀sɔ̀kɔsɔ kèawo ɖo.”

²¹Wo ɖo e ŋuti na ɛ̀ be: “Miawo yaa, mi mu xɔ̀ xoma ɖe so Yudeà so ŋuti wò ò, mia nɔ̀vi ɖe mu so funua va jè àpo èhùɛ, àlo va gblɔ̃ àpo ènyà vuɛ̃ ɖe na mi ò.

²²Gãkea, mi jro la sè àlekè wò le sùsua so wò ŋutɔ gbɔ wò, ɖo mi nya so èha kèa ŋuti be, wo sitè ɖo e ŋuti lè àfi sia àfi.”

²³E ɖo àzã, ku wo, eye wo sùgbɔ ɖo e ji va yì kpɔ ɛ̀ lè àxue kè mè be lèa mè. So ŋùdekɛ̃nyɛ kaka na fìɛ̃sia, e ɖè ènumè na wo. E gblɔ̃ Mawu be fìɔɖùɖu be ènyà na wo. E sɔ Mosè be èseawo ku gblɔ̃ɖɛtɔwo be xomawo sɔ pò nupo na wo, e hlɔ̃, le na be woa xɔ̀sè be ènu kè yè le gblɔ̃ so Yesù ŋutia nyi nyàwo.

²⁴Àmè ɖewo lè woa dòmè, kpɔ be ènyàa nyi nyàwo, eye wo xɔ̀ e ji sè. Àmè ɖewo mu xɔ̀ ɛ̀ sè ò.

²⁵Wàlɛbɛ kè wo la joa, ègbè mu lè èdu na wo ò, eye Paolò gblɔ̃ kpò na wo be: “Ènyà kè Gbɔ̃gbɔ̃ Kɔ̀kɔ̀ɛ a gblɔ̃ na mia tɔgbewo, to gblɔ̃ɖɛtɔ Ezayà jia nyi nyàwo

²⁶be: 'Yì dùkɔ̃ kèa gbɔ, ne wòa gblɔ̃ na ɛ̀ be mì la sè kito-kito, gãke mì mu la ŋɔjè e mè ò, mì la kpɔ ènu àdodoe, gãke mì mu la jèsi ì ò.

²⁷Đo dùkɔ̃ kèa be èjì trì; wo tu woabe ètowo, eye wo miɔ̃ woabe ŋùkuwo, ne woabe ŋùkuwo mu gbà kpɔ ènu ò, ne woabe ètowo mu gbà sè ènu ò, ne wo mu gbà ŋɔjè ènu mè, ne wo mu gbà trɔ va gbɔ nyè, ne ma dà èdɔ̀ na wo ò. Mawu ye gblɔ̃ ɛ̀.'

²⁸Ye ŋutia mì nya be, wo sɔ Mawu be àmèhlùɛ̃gãa be àŋɛ̀a ɖoɖa àmè kèwo mu nyi Yudàvi òawo, àmè kèawo la ɖo èto è.” [

²⁹Ekè e gblɔ̃ ekèa vɔ̀a, Yudàviawo jo ku ènyà dɔ̃dɔ̃ fuu lè woa nɔ̀nɔwo dòmè[36].]

³⁰Paolò nɔ̀ àxue kè ye ŋutɔ xayàa mè, èpè èvè blibo, eye be xɔ̀nà àmè kèwo keŋu vana e gbɔawo.

³¹E dona Mawu be fìɔɖùɖu be àŋɛ̀a, eye be fiɔna ènu so Tɔhonɔ̀ Yesù Kristò ŋuti ku èjì ɖèɖe, eye àmè ɖekpe mu xe èmɔ na ɛ̀ ò.