Read gen Èdɔwɔ̀wɔwo 4 Bible Online

Èdɔwɔ̀wɔwo 4 - gen bible

Èdɔwɔ̀wɔwo 4

¹Ekè Petrò ku Yòhanɛ̀s lè pò nupo na dùkɔ̃a, mawunɔwo, mawuxɔa ji kpɔtɔwo be ègawo ku sɛ̃sɛ̃ha kè wo yɔna be Sadusiawo dòmètɔ ɖewo zɔ̃ va woa gbɔ.

²Àdɔ̀mè le ve wo, ɖoa, Petrò ku Yòhanɛ̀s le fiɔ ènu dùkɔ̃a, eye wo le do fɔ̃fɔ̃ so èku be àŋɛ̀a so Yesù ŋuti.

³Wo na wo le wo do ègàkpa mè, eye wo nɔ̀ funu, èŋù kè, ɖoa, èwè le ɖoxɔ̀ wàlɛbɛ ŋua.

⁴Gãkea, àmè kèwo ye sè ènyà kè àmèdɔ̃dɔ̃awo gblɔ̃a, sùgbɔ xɔ̀sè. Eye àmè kèwo xɔ̀sèawo be hɛ̃hlɛ̃mè la sù hotu èvè èkà èwì vɔ àtɔ̃.

⁵Ekè èŋù kèa, Yudàviwo be ègawo, èdùmèmègãwo ku ènuŋlɔ̀tɔwo va bɔ̀ lè Yèruzàlɛm.

⁶*Mawunɔ gã Hanà nɔ̀ bɔ̀bɔ ŋua mè ku Kayafà, Yòhanɛ̀s ku Àlɛ̀ksãdrò, kudo àmè kèwo ye do xòmè ku mawunɔ gãwo.

⁷Wo na, wo kplɔ̀ Petrò ku Yòhanɛ̀s va woabe ŋùkɔ̀, eye wo biɔ wo be: “Ŋusɛ̃ kɛ ye mì sɔ le wɔ̀ ènu kèawo ò? Àlo àmè kɛ be nyikɔ mè ye mì lè wɔ̀ ènu kèa lè ò?”

⁸Wàlɛbɛ ŋuaa, Gbɔ̃gbɔ̃ Kɔ̀kɔ̀ɛ a ɖɔ Petrò tãŋu, eye be ɖo e ŋuti na wo be:

⁹“Ègawo ku èdùmèmègãwo, egbèa, wo le biɔ mi ènyà so ènyuɛ̃ kè mi wɔ̀ na kpòtɛ̃ ɖe a ŋuti, la nya àlekè ŋusù kèa wɔ̀, kpɔ lãmèsɛ̃a.

¹⁰Eŋuã, mìa kpata mì sè, ne Izràɛl be dùkɔ̃a keŋu ne nya be Yesù Kristò, Nazarɛttɔ̀a, àmè kè mì ka ɖo àtisòga ŋuti, eye Mawu fɔ̃ ɛ̀ so àmè kukuwo dòmèa, be nyikɔ mè ye àmè kèa kpɔ lãmèsɛ̃ lè, eye be lètè lè mìabe ŋùkumè lè fikèa.

¹¹Yesù kèa be ènyà ye wo gblɔ̃ ɖo Mawunya xoma a mè be: 'Èkpe kè mìa, èxɔ̀tùtɔwo mì gbea, e ye trɔ zũ koŋùjikpe.'

¹²Ye ɖèka kpò ye la teŋu hlùɛ̃ àmè gã; ɖo, lè xixea keŋu mèa, Mawu mu gbà na àmè bu lè àgbètɔwo dòmè, lè àfi ɖekpe, kè ji mi la to, la kpɔ hlùɛ̃gã ò.”

¹³Àmè kèwo lè èdùnyagblɔ̃haa mèawo kpɔ be Petrò ku Yòhanɛ̀s nyi àmè bɛɖɛɛ[3] ɖewo kpò. Wo mu nya xoma cã ò, vɔ̀a, lekè wo dojì le gblɔ̃ ènyà ɖoa, nyi ènu ɖe kè wɔ̀ ŋùdã na wo ŋutɔ. Wo kpɔ, jèsi be wo, àmè kèwo nɔ̀ ku Yesùa be dòmètɔwo ye wo nyi.

¹⁴Vɔ̀, ekè wo kpɔ àmè kè wo dà èdɔ̀ na a nɔ̀tè lè woa gbɔa, wo mu gbà nya ènyà ɖe la gblɔ̃ so e ŋuti ò.

¹⁵Wo na be, woa to lè èdùnyagblɔ̃ha be èxɔ̀a mè, eye wo le ènyàa kpɔ, lè woa nɔ̀nɔwo dòmè.

¹⁶Wo gblɔ̃ be: “Nukɛ mi la wɔ̀ kudo àmè kèawo ò? Đo ènu kè Mawu wɔ̀ to woa ji fifìa, àmè kèwo keŋu lè Yèruzàlɛm awo kpɔ be woawo ye wɔ̀ ɛ̀, eye mi mu teŋu gbe ò.

¹⁷Vɔ̀a, ne ènyàa mu gbà gbãkpe ɖo e ji lè èdùa mè òa, mi la tɛ̃ ŋùkuvi do wo, la do *èse na wo be, wo mu gbà pò nupo na àmè ɖekpe lè Yesù be nyikɔ mè ke ò.”

¹⁸Nène a, wo yɔ Petrò ku Yòhanɛ̀s va, do *èse na wo sɛ̃sɛ̃ ɖe be wo mu gbà kpɔ èmɔ la pò nupo, àlo la fiɔ ènu lè Yesù be nyikɔ mè gbèɖe ke ò.

¹⁹Vɔ̀ Petrò ku Yòhanɛ̀s ɖo e ŋuti na wo be: “Mìa ŋutɔwo mì bù e ŋuti kpɔ be, ekɛ ye sɔ̀gbè lè Mawu be ŋùmè be mia wɔ̀ ò? Mia sè ègbè na mì, àlo na Mawu a?

²⁰Miawo yaa, ènu kè mi kpɔ, eye mi sè a, mi mu la teŋu dokpò nupo pòpo so e ŋuti gbèɖe ò.”

²¹Àmè kèwo lè èdùnyagblɔ̃haa mèawo trɔ tɛ̃ ŋùkuvi do wo, eye wo ɖè àsi lè woa ŋuti. Wo mu nya àlekè wo la gblehùɛ do wo ò, ɖo dùkɔ̃a ŋuti. Đo àmè sia àmè lè na gogo Mawu ɖo ènu kè jɔ̀ ŋua ŋuti.

²²Ŋusù kè wo dà èdɔ̀ na, ŋùdãtɔ̀ lekea, xɔ̀ wu èpè èkà.

²³Ekè wo ɖè àsi lè Petrò ku Yòhanɛ̀s ŋutia, wo trɔ yì woa tɔ̀wo gbɔ, eye wo to ènu kèwo keŋu * mawunɔ gãwo ku èdùmèmègãwo gblɔ̃a na wo.

²⁴Ekè woa tɔ̀wo sè ènyàa, woawo keŋu gblɔ̃ ku ègbè ɖèka na Mawu be: “Àpetɔ! Èwò ye ɖo jiŋùkusi ku ànyigbã, àpù ku ènu kèwo keŋu lè e mèawo!

²⁵Èwò ye, to Gbɔ̃gbɔ̃ Kɔ̀kɔ̀ɛ a jia, na mia tɔgbe David gblɔ̃ be: 'Nukɛ ŋuti àgbàlèwo lè jè àgla, eye dùkɔ̃wo lè ɖè susu gbalo ɖo ò?

²⁶Ànyigbã ji be èfìɔwo bla àkpà, eye èdùjiɖùtɔwo bɔ̀, le ɖè àɖàŋù, ɖo Tɔhonɔ̀ ku yebe àmè sì àmì na ŋuti.'

²⁷Ɛ̃ɛ, Herod ku Pɔ̃tìo Pilatò bɔ̀, lè èdù kèa mè ku àgbàlèwo, kudo Izràɛlviwo ɖo Yesù sumɔ̃vi kɔ̀kɔ̀ɛ wòa, àmè kè wò do àmì èta na a ŋuti.

²⁸Wo wɔ̀ ɖo ènu kè wò ŋutɔ wò jro, eye wò ɖo ɖɛ, sã xoxo, to àpo ŋusɛ̃ mèa kpata ji.

²⁹Fifìa, Tɔhonɔ̀, kpɔ vɔ̃vɔ̃ kè wo le do na mia ɖa, ne wòa do mi ŋusɛ̃, mi, àpo sumɔ̃viwo, ne mia do àpo àŋɛ̀a ku èjì ɖèɖe.

³⁰Drɛ̃ àlɔ̀ ne wòa dà èdɔ̀ na àmèwo, eye ne mia sɔ sumɔ̃vi wò kɔ̀kɔ̀ɛ, Yesù be nyikɔ wɔ̀ ŋùdãdɔwo ku jèsìwo.”

³¹Ekè wo fãkue vɔ̀a, tèpe kè wo bɔ̀ lèa hũhũ. Gbɔ̃gbɔ̃ Kɔ̀kɔ̀ɛ a ɖɔ woa keŋu tãŋu, eye wo gblɔ̃ Mawu be ènyàa ku èjì ɖèɖe.

³²Xɔ̀sètɔawo keŋu ɖo èjro ɖèka, ku susu ɖèka, eye àmè ɖekpe mu gbà sɔna ènu kè nyi ye tɔ̀a, sɔ yɔna be yè tɔ̀ ò. Ènu kè lè àmèwo si ɖèka ɖèkaa, trɔ zũ àmè sia àmè tɔ̀.

³³*Àmèdɔ̃dɔ̃awo ɖù ɖase ku ŋusɛ̃ blibo be Tɔhonɔ̀ Yesù fɔ̃ so àmè kukuwo dòmè nyàwo, eye Mawu tu sì na wo fuu.

³⁴Ènu ɖe mu dɛ̃ àmè ɖe lè woa dòmè ò, ɖo àmè kèwo si ànyigbã àlo àxuewo lèawo, sànà wo, eye wo hɛ̃nà woabe ègàa

³⁵va nana *àmèdɔ̃dɔ̃awo. Wo mana ègàa na àmè sia àmè sìgbè àlekè e hiãa nène.

³⁶Nène a, Levì ɖe kè tɔ Yozɛ̀f, àmè kè wo jì lè Kiprò, eye àmèdɔ̃dɔ̃awo ɖo nyikɔ na be Barnabas, (e gɔ̃mè ye nyi “ŋusɛ̃doamètɔ”)

³⁷sà yebe ànyigbã, eye be hɛ̃ ègàa va na àmèdɔ̃dɔ̃awo.