Read gen Èdɔwɔ̀wɔwo 7 Bible Online

Èdɔwɔ̀wɔwo 7 - gen bible

Èdɔwɔ̀wɔwo 7

¹Mawunɔ gãa biɔ Stefanɔ̀ be: “Ènu nyi nène nyàwo a?”

²Stefanɔ̀ ɖo e ŋuti be: “Nɔ̀vi nyèwo ku ètɔ nyèwo, mi ɖo èto mù. Gbɔ̀xue mia tɔgbe Abràham la hũ yì nɔ̀ Haràn-a, gogo be Mawu a, ɖè ye ɖokoe fiɔ ɛ̀ lè Mezopotamìa.

³E gblɔ̃ na ɛ̀ be: 'Hũ jo lè àpo èdù ku xòmè wòa mè, ne wòa yì ànyigbã kè mù la fiɔ àsi na wòa ji.'

⁴Nène a, Abràham hũ jo lè Kaldea-nyigbã ji, va yì sò àxue ɖo Haràn. Lè ètɔa be èku yomè a, Mawu na be gbà hũ jo lè funua, va ànyigbã kè ji mi lè fifìa ji.

⁵Mawu mu na ɛ̀ ànyigbãa be àkpa ɖekpe lè èdù kèa mè ò. Ànyigbã àlɔ̀gba ɖèka tètè mu nyi ye tɔ̀ ò. Gãkea, Mawu fìã na ɛ̀ be yè la sɔ ànyigbãa na ɛ̀, eye e la va nyi yebe jìjimèvi tɔ̀, co, Abràham mu jì èvi ɖekpe, wàlɛbɛ ŋua ò.

⁶Mawu gbà gblɔ̃ na ɛ̀ be: 'Jìjimèvi wòwo la yì ci àmè bu be èdù mè eye wo la sɔ wo wɔ̀ kluvi; wo la do àyà na wo èpè èkà èwo.

⁷Vɔ̀a, mù la sò kòjo na dùkɔ̃ kè mè wo la nyi kluviwo lèa. E yomè a, wo la to jo lè ànyigbãa ji, la va sɛ̃ mù lè tèpe kèa.'

⁸Eye Mawu ɖù èzò ku ì, be sɔ èvo sòso sɔ ɖo èzòɖùɖu ŋua be jèsìdo. Eŋuã ŋuti ye wàlɛbɛ kè Abràham jì Izàk-a, e sò èvo na ɛ̀ lè ŋùkèkè ènyigɔ̃a gbè. Ekè Izàk cã jì Yakɔb-a, e sò èvo na ɛ̀, eye Yakɔb cã sò èvo na mia tɔgbe-tɔ̀gbè woèvèawo.”

⁹“Mia tɔgbe ŋuawo hùãŋu woa nɔ̀vi Yozɛ̀f, sɔ ɛ̀ yì sà, eye wo kplɔ̀ ɛ̀ yì Ejiptè. Vɔ̀a, Mawu nɔ̀ kudo è,

¹⁰eye be ɖè è to lè yebe ènuxàxawo keŋu mè. E na ɛ̀ màje ku ènunya, eye be na be yebe ènu jè Ejiptè be èfìɔ, Faraɔ̀n be ŋùmè, eye be sɔ̀ ɛ̀ ɖo èdùjiɖùtɔ ɖo Ejiptè-dùa ku yebe àxuedoa nu.

¹¹Àdɔ̀ ɖe to lè Ejiptè ku Kanàn-nyigbãwo keŋu ji. Àmèwo keŋu jè àyà gã ɖe mè, eye mia tɔgbè-tɔ̀gbèwo mu kpɔ ènu ɖekpe la ɖù ò.

¹²Ekè Yakɔb sè be *èlù lè Ejiptè a, e dɔ̃ mia tɔgbewo ɖoɖa funua. Cucugbãa, wo yì, gbà gbɔ̀.

¹³Zè èvègɔ̃a, ekè be dɔ̃ wo ɖoɖaa, Yozɛ̀f ɖè ye ɖokoe fiɔ nɔ̀viawo, eye Ejiptè be èfìɔ gãa cã jèsi Yozɛ̀f be xòmètɔ ŋutɔŋutɔwo.

¹⁴Yozɛ̀f dɔ̃ wo ɖoɖa be woa yì kplɔ̀ yè tɔ, Yakɔb ku yèbe xòmèa keŋu, va na yè. Wo la sù àgbètɔ èkà takpo ci woeàtɔ̃.

¹⁵Yakɔb jè èmɔ yì Ejiptè. Funua ye be ku lè, eye funua ke ye mia tɔgbe-tɔ̀gbèwo cã ku lè.

¹⁶Wo sɔ woabe àmèti kukuawo yì Sikɛ̀m, eye wo ɖì wo ɖo èyɔ̀do kè Abràham sɔ klòsalò-ga plè lè Hɛrmɔ̀n[5] be èviwo sia mè, lè Sikɛ̀m.”

¹⁷“Ekè hùenu kè Mawu ɖo be yèa wɔ̀ ɖo àjɔ̀gbè kè yè fìã na Abràham jia va le gogoa, Izràɛl be dùkɔ̃a le jì ɖo e ji, le sùgbɔ ɖo e ji lè Ejiptè,

¹⁸kaka yì jè Ejiptè be èfìɔ bu kè mu nya Yozɛ̀f be hùenu òa ji.

¹⁹Èfìɔ kèa, wɔ̀ àyè flù miabe xòmèa, do àyà na mia tɔgbewo ɖehòmèku, na be wo ne nɔ sɔ woabe vifɛ̃ hũkɔ̃ɛ̃wo to, ne woa nɔ wù wo.

²⁰Lè hùe ŋua nu ye wo jì Mosè, eye yebe ènu jè Mawu be ŋùmè. Wo kpɔ ɛ̀ ji lè ètɔa be àxomè, wètri ètɔ̃.

²¹Eŋuã yomè a, wo va ɖè è to, sɔ ɛ̀ yì ɖo ètɔ̀ to, eye Ejiptè be èfìɔgãa be èvi-nyɔ̃nù va fɔ̀ ɛ̀, hɛ̃ ɛ̀ sìgbè ye ŋutɔ be èvi nène.

²²Funua ye be xɔ̀ Ejiptètɔwo be ènunya keŋu lè, eye be sɛ̃ŋu lè ènyà gbɔ̃gblɔ̃ ku ènuwɔ̀na mè.

²³Wàlɛbɛ kè Mosè ɖo èpè èkàa, nɔ̀via Izràɛlviwo be ènu va susu mè na ɛ̀ eye, be yì ji wo kpɔ.

²⁴E kpɔ Ejiptètɔ ɖe le wɔ̀ fùnya fùnya ku Izràɛlvi ɖe.

²⁵E bù be yè nɔ̀viawo la sè e gɔ̃mè be Mawu ye dɔ̃ yè ɖoɖa be yèa va hlùɛ̃ wo gã. Vɔ̀ wo mu sè e gɔ̃mè ò.

²⁶Yebe èŋù kè gbèa, e kpɔ Izràɛlvi èvè ɖewo le dà èkɔ̃, eye e jro la ɖa wo; e gblɔ̃ be: 'Èxlɔ̃ nyèwo, nɔ̀vi ye mì nyi.'

²⁷Àmè kè le wɔ̀ fùnya fùnya ku yebe èvègɔ̃a, tùtù ì, gblɔ̃ be: 'Àmè kɛ ye ɖo wò èga, àlo kòjoɖotɔ ɖo mia nu ò?

²⁸Wò ji be yèa wù nyè cã, sìgbè lekè wò wù Ejiptè ŋusùa èsɔ̀a nènea?'

²⁹Ekè Mosè sè ènyà kèa, e si, yì ci èdù kè wo yɔna be Madìan-a mè, eye be jì ŋusùvi èvè, lè funu.”

³⁰“Lè èpè èkà yomè a, Mawu be àtikplɔtɔ ɖe va to ɖo e ji lè Sinai-Toa be gbegbà ji, lè àve mumu ɖe kè le bìzòa mè.

³¹Ekè Mosè kpɔ ènu kèa, e wɔ̀ ŋùdã do è ŋutɔ, eye e jro la dɔ̃ gogo è, la kpɔ ɛ̀ nyuɛ̃ ɖe. Vɔ̀a, Tɔhonɔ̀ be ègbè ɖì na ɛ̀ be:

³²'Ènyè ye nyi tɔgbe wòwo be Mawu: Abràham, Izàk ku Yakɔb be Mawu.' Mosè tɔ hũhũ tìtìtì eye mu gbà xà kpɔ ɛ̀ ke ò.

³³Eye Tɔhonɔ̀ gblɔ̃ na ɛ̀ be: 'Đè àpo àfɔ̀kpawo lè àfɔ̀, ɖoa, ànyigbã kè ji wò tɔtè ɖoa, nyi ànyigbã kɔ̀kɔ̀ɛ.

³⁴Mù kpɔ àlekè wo le do àyà na dùkɔ̃ nyèa, lè Ejiptè ɖoa keŋu-keŋu. Mù sè woabe àlenana, eye mù ɖì va ne ma hlùɛ̃ ɛ̀ gã. Fifìa, va, ma dɔ̃ wò ɖoɖa Ejiptè.'”

³⁵“Mosè ŋua kè wo gbe, be: 'Àmè kɛ ye ɖo wò èga, àlo kòjoɖotɔ ɖo mia nu mà?' E ye Mawu va dɔ̃ ɖoɖa wo; na ɛ̀ ŋusɛ̃, to yebe àtikplɔtɔ kè ze ɖo è, lè àve mumu kè le bìzòa mèa ji, ne bèa ɖù èga ɖo woa nu, ne bèa hlùɛ̃ wo gã.

³⁶Mosè ŋua ye kplɔ̀ Izràɛlviwo to jo lè Ejiptè, to ŋùdãdɔ ku jèsì kèwo be ɖèfiɔ lè èdù ŋua mè, ku plãŋùpòfɛ̃ be àpù nu, kudo zògbè ji, èpè èkà sɔ̃ŋu.

³⁷Mosè ŋua ye gblɔ̃ na Izràɛlviwo be: 'Mawu la dɔ̃ yebe gblɔ̃ɖɛtɔ ɖe, sìgbè ènyè nène, ɖoɖa mì. E la to so mìabe dùkɔ̃a mè.'

³⁸E ye nɔ̀ ku Izràɛl be èhabɔ̀bɔa, wàlɛbɛ kè wo nɔ̀ zògbè jia. Mosè ŋua ye nɔ̀ mia tɔgbewo ku Mawu be àtikplɔtɔa dòmè, wàlɛbɛ kè be le pò nupo kudo è lè Sinai-to jia, eye be xɔ̀ Mawu be ègbèdoàsi kè lè tɛ̀gbɛ̀a va na mi.

³⁹Vɔ̀a, mia tɔgbewo gbe be yèwo mu la ɖo èto è ò. Wo gbe yebe ènyà, eye wo jro la trɔ yì Ejiptè.

⁴⁰Ènu ŋua ŋuti ye wo gblɔ̃ na Arɔ̀n be: 'Wɔ̀ vòdu bu kèwo la kplɔ̀ miawo na mi, ɖo Mosè ŋua, kè kplɔ̀ mi to lè Ejiptè a, mi mu nya ènu kè jɔ̀ ɖo e ji ò.'

⁴¹Eye wo wɔ̀ vòdu kè ɖo ènyìvi be nɔ̀nɔmè, eye wo savɔ na ɛ̀. Wo kpɔ jìjɔɛ, do vìvi ènu kè woa ŋutɔwo wo sɔ àlɔ̀ wɔ̀a ŋuti.

⁴²Ekèa ŋutia, Mawu trɔ lè woa yomè, gble wo ɖɛ, eye wo sumɔ èwè ku wètri, kudo wètriviwo, sìgbè lekè yebe gblɔ̃ɖɛtɔwo ŋlɔ̀ ɛ̀ ɖɛa nène be: 'Oò Izràɛl dùkɔ̃! Ekè mì nɔ̀ zògbè ji, èpè èkàa ɖe, ènyè ye mì wù èlãwo na a? Vɔsa kɛ ye mì wɔ̀ na mù kpɔ ò?

⁴³Mu nyi vòdu kè wo yɔna be Mɔ̀lɔk be gòxɔ ku wètrivi kè wo yɔna be Romfàa[6] be nɔ̀nɔmè ye mì wɔ̀, kɔkɔ, eye mì sumɔ òa? Eŋuã ŋutia, mù la sɔ mì so mìabe èdù mè, yì Babɛ̀l godo.'”

⁴⁴“Đase be gòxɔa nɔ̀ mia tɔgbewo dòmè lè zògbèa ji: àmè kè pònà nu na Mosè a ɖo è na Mosè be, ne wɔ̀ ɛ̀ ɖo nɔ̀nɔmè kè be kpɔa ji.

⁴⁵Ekè mia tɔgbewo ku Yosùa xɔ̀ ɛ̀a, wo hɛ̃ ɛ̀ va ɖo dùkɔ̃ kèwo Mawu nyà lè mia tɔgbewo be ŋùkɔ̀awo be ànyigbã ji, kaka va na David be hùenuwo.

⁴⁶Àmè kèa jè ŋùmè na Mawu, eye be ɖè kuku be, yèa ɖo nɔ̀pe ɖe na Yakɔb be Mawu a.

⁴⁷Vɔ̀a, èfìɔ Salomɔ̀n ye va tù èxɔ̀ ŋua na Mawu.

⁴⁸Gãkea, Mawu kè lè jiŋùkusi hũia, mu nɔ̀nà tèpe kè wo sɔ àgbètɔ be àlɔ̀ jràɖo a ò. Sìgbè lekè gblɔ̃ɖɛtɔa gblɔ̃ nène be:

⁴⁹'Tɔhonɔ̀ gblɔ̃ be: jiŋùkusi ye nyi àpe èfìɔzìkpe, eye ànyigbã nyi àpe àfɔ̀ɖojinu. Èxɔ̀ kɛ ye mì la teŋu tù na mù ò? Àlo àfikɛ ye la teŋu nyi jɛ̃gbɔ̃pe nyè ò?

⁵⁰Mu nyi ènyè ye wɔ̀ ènu kèawo keŋu òa?'”

⁵¹“Mìa, èkɔ̀ lìalìatɔ, ètotrìtɔ kèawo, mì gbà le trì èjì, le sitè ɖo Gbɔ̃gbɔ̃ Kɔ̀kɔ̀ɛ a ŋuti kpò ye! Ènu kè mìa tɔgbewo wɔ̀ va yìa, ye tututu mìawo cã, mì le wɔ̀!

⁵²Gblɔ̃ɖɛtɔ kɛ yomè ye mìa tɔgbewo mu tĩ ò? Wo wù àmè kèwo va do Àmè Jɔ̀jɔɛa be vava be àŋɛ̀a. Àmè Jɔ̀jɔɛ ŋua ye mìawo cã mì sà, eye mì wù fifìa.

⁵³Mì, àmè kèwo xɔ̀ èsea, to Mawu be àtikplɔtɔwo jia, mìawo bòhũ ye gbe be yèwo mu la wɔ̀ ɖo *èse ŋua ji ò.”

⁵⁴Ekè èdùnyagblɔ̃tɔwo sè ènyà kè Stefanɔ̀ gblɔ̃a, wo do àdɔ̀mèze, eye wo ɖù àɖuklui ɖo e ŋuti.

⁵⁵Gbɔ̃gbɔ̃ Kɔ̀kɔ̀ɛ a ɖɔ Stefanɔ̀ tãŋu. E ɖè ŋùkuvi kpɔ jiŋùkusi ɖoɖa, be kpɔ Mawu be gogo, eye Yesù nɔ̀tè lè ɖùsi mè na Mawu;

⁵⁶E gblɔ̃ be: “Mì kpɔ ɖa! Mù kpɔ jiŋùkusi lè hũhũ, ye mù kpɔ Àgbètɔ be Èvia nɔ̀tè lè Mawu be ɖùsi mè.”

⁵⁷Ekè wo sè ènyà kèa, woa kpata wo do àpa sɛ̃sɛ̃ ɖe, sɔ àlɔ̀ tu èto, eye wo dri ɖo e ji zè ɖèka.

⁵⁸Wo dɔ̃ ɛ̀ yì èdùa godo, eye wo pò è èkpe, be ku. Đàsèfoawo ɖè woabe àwùwo dà ɖo ɖèkajɛ ɖe kè be nyikɔ nyi Saolòa gbɔ.

⁵⁹Wàlɛbɛ kè wo lè pò èkpe Stefanɔ̀a, Stefanɔ̀ fãkue gblɔ̃ be: “Tɔhonɔ̀ Yesù, xɔ̀ gbɔ̃gbɔ̃ nyèa.”

⁶⁰Eŋuã yomè a, e jè èklò do àpa sɛ̃sɛ̃ ɖe be: “Tɔhonɔ̀ mù gbà ɖo èvuɛ̃ kèa tèpe na wo ò.” Ekè be gblɔ̃ ekèa vɔ̀a, e ku.