Read gen Èdɔwɔ̀wɔwo 9 Bible Online

Èdɔwɔ̀wɔwo 9 - gen bible

Èdɔwɔ̀wɔwo 9

¹Saolò[11] kpɔ̀tɔ̀ lè do ŋùklɛ̃ na Tɔhonɔ̀ be nukplaviwo, eye be le wù wo. E yì kpɔ * mawunɔ gãa,

²be ne ŋlɔ̀ xoma na yè, ne yèa sɔ yì bɔ̀bɔ̀pe kèwo ye lè Dàmaskòa, be ne yè kpɔ àmè kèwo lè sɛ̃sɛ̃ yeyea mèawo, ŋusù àlo nyɔ̃nùa, yèa le wo, la do wo kɔ̀sɔ̀kɔsɔ va Yèruzàlɛm.

³Wàlɛbɛ kè Saolò zɔ̃ èmɔa, le gogo Dàmaskòa, ze ɖèkaa, kɛ̃klɛ̃ ɖe so jiŋùkusi, klɛ̃ pòxla do è.

⁴Saolò jè ànyi. E sè ègbè ɖe kè le biɔ ɛ̀ be: “Saolò, Saolò! Nukɛ ŋuti wò le tĩ yo nyè mè ɖo ò?”

⁵Saolò biɔ sè be: “Àmè kɛ ye wò nyi ò, Tɔhonɔ̀?” Ègbèa ɖo e ŋuti na ɛ̀ be: “Ènyè Yesù, kè yomè wò le tĩa ye.

⁶Fifìa, sitè, ne wòa yì èdùa mè; wo la gblɔ̃ ènu kè wò ɖo la wɔ̀a na wò.”

⁷Àmè kèwo lè zɔ̃ èmɔ kudo è le yì èdùa mèawo, nɔ̀tè; woabe ènuwo ku. Wo sè ègbèa be ɖìɖi, vɔ̀ wo mu kpɔ àmè kè le pò nupoa ò.

⁸Saolò sitè lè ànyigbã, yebe ŋùkuviwo lè hũhũ, co gãkea, mu le kpɔ ènu ɖekpe ò. Wo le yebe àlɔ̀tinu, kplɔ̀ ɛ̀ yì Damaskò.

⁹E nɔ̀ ènu màkpɔ ŋùkèkè ètɔ̃. Mu ɖù ènu, kaka la nù èsì ò.

¹⁰Yesù be *nukplavi ɖe kè wo yɔna be Ànanìa a nɔ̀ Damaskò. Tɔhonɔ̀ yɔ ɛ̀ lè àvì mè be: “Ànanìa!” Eye be tɔ̀ na ɛ̀ be: “Ènyè ye nyi ekèa, Tɔhonɔ̀.”

¹¹Tɔhonɔ̀ gblɔ̃ na ɛ̀ be: “So, ne wòa le èmɔ kè wo yɔna be Èmɔ Jɔ̀jɔɛa, ne wòa yì Yudà be àxomè; Wòa biɔ Tarsò ŋusù kè wo yɔna be Saolòa ta. E le fãkue fifì,

¹²eye e kpɔ ŋusù ɖe kè wo yɔna be Ànanìa a lè àvì mè, va e gbɔ, sɔ àlɔ̀ ɖo e ji ne bèa gbà kpɔ ènu.”

¹³Ànanìa ɖo e ŋuti be: “Tɔhonɔ̀, mù sè ŋusù kèa be ŋutinya lè àmè sùgbɔ nu. Wo gblɔ̃ èhũnyrãnu kèwo keŋu be wɔ̀ ɖo àpo àmèwo ŋuti lè Yèruzàlɛm a.

¹⁴Fikè kè be va fifìa, e xɔ̀ àcɛ̀ so * mawunɔ gã kèwo lè Yèruzàlɛm awo gbɔ, be yèa le àmè kèwo keŋu fãnà yɔna nyikɔ wò lè fikèawo.”

¹⁵Tɔhonɔ̀ gblɔ̃ na ɛ̀ be: “Gbe yì kpò, ɖo ŋusù kèa, mù cã ɛ̀, ne bèa nyi èdɔwɔ̀nu kè la sɔ nyikɔ nyè yì àmè kèwo mu nyi Yudàvi òawo, èfìɔwo ku Izràɛl dùkɔ̃a be ŋùkɔ̀.

¹⁶Đo mù la ɖè èfũ kèwo e la kpe ɖo nyikɔ nyè taa fiɔ ɛ̀.”

¹⁷Ànanìa so, eye be yì àxuea mè. E sɔ àlɔ̀ ɖo Saolò ji, gblɔ̃ na ɛ̀ be: “Saolò, nɔ̀vi nyè! Tɔhonɔ̀ Yesù, kè ɖè ye ɖokoe fiɔ wò lè èmɔ ji, wàlɛbɛ kè wò gbãnà a, ye dɔ̃ mù ɖoɖa, ne wòa gbà kpɔ ènu, eye wòa xɔ̀ Gbɔ̃gbɔ̃ Kɔ̀kɔ̀ɛ a.”

¹⁸Zè ɖèkaa, ènu ɖe kè lè sìgbè èlãcro nènea gɛ̃ so Saolò be ŋùkuviwo ji, eye be gbà le kpɔ ènu. E sitè, eye wo lè mawusi na ɛ̀.

¹⁹E yomè a, e ɖù ènu eye be gbà kpɔ ŋusɛ̃. Saolò nɔ̀ Yesù be *nukplavi kèwo lè Damaskòawo gbɔ, ŋùkèkè ɖewo.

²⁰Zè ɖèkaa, e yì bɔ̀bɔ̀pewo, le do Yesù be àŋɛ̀a na àmèwo be Yesù ye nyi Mawu be Èvia.

²¹Àmè kèwo keŋu sè ènyà kè be le toawo kã yàa, eye wo gblɔ̃ be: “Mu nyi ŋusù kè tĩna àmè kèwo le fã yɔ Yesùa yomè lè Yèruzàlɛm-a ye nyi ekèa? Mu nyi sùsu ŋua ke ŋuti ye be va fikèa ɖo be yèa va le wo, la kplɔ̀ wo yì mawunɔ gãwo gbɔ òa?”

²²Ŋusɛ̃ kè Saolò sɔ le do àŋɛ̀nyuɛ̃ a le yì e ji, eye Yudàvi kèwo lè Damaskòawo mu gbà kpɔ ènyà ɖe la gblɔ̃ so yebe àŋɛ̀dodoa ŋuti ò, ɖoa, e ɖèfiɔ tututu be Yesù ye nyi Kristò.

²³Ekè àzã va le jè àzã jia, Yudàvi ŋuawo wɔ̀ ɖoɖo be yèwoa wù Saolò.

²⁴Saolò sè woabe ɖoɖo a, be wo va ɖiana èdùa be àgbowo ŋutɔ cã, èzã ku kedèa, àleke be, ne e la toa, woa teŋu kpɔ èmɔ, la wù ì.

²⁵Eŋuã ŋutia, nukplaviawo sɔ ɛ̀ do àjàfi mè, èzã mè, to èglìkpa ta, ɖiɖi ì ɖo èglìkpaa godo ɖo ànyi, eye be jo.

²⁶Ekè Saolò va ɖo Yèruzàlɛm-a, e jro be yèa ɖo nukplaviawo dòmè. Vɔ̀a nukplaviawo keŋu le vɔ̃ ɛ̀, ɖo wo mu xɔ̀sè be Kristò be nukplavi ye cã nyi ò.

²⁷Eye Barnabas va kplɔ̀ Saolò yì *àmèdɔ̃dɔ̃awo gbɔ. E gblɔ̃ lekè Saolò kpɔ Tɔhonɔ̀ lè èmɔa ji ɖoa na wo; e gbà gblɔ̃ lekè Tɔhonɔ̀ pò nupo na ɛ̀, ku lekè ye ŋutɔ dojì, gblɔ̃ Mawunya lè dùkɔ̃a be ŋùmè àgbãŋùgbà, lè Damaskò, lè Yesù be nyikɔ mè ɖoa na wo.

²⁸So wàlɛbɛ ŋua, wo xɔ̀ Saolò, bè le yì, le gbɔ̀, dojì le gblɔ̃ Mawunya àvò màsa, lè Tɔhonɔ̀ be nyikɔ mè, lè Yèruzàlɛm.

²⁹E jrò ènyà mè ku Yudàvi kèwo dona Grikgbeawo cã, vɔ̀a, wo trɔ ɖo e ŋuti, eye wo ji be yèwoa wù ì.

³⁰Ekè nɔ̀viawo sè èa, wo kplɔ̀ ɛ̀ yì Kayizarèa, eye so funua, wo ɖo è ɖoɖa Tarsò.

³¹Àmè kèwo xɔ̀ Yesù ji sèawo be èhabɔ̀bɔ kèwo lè Yudeà, Galilea ku Samarìaawo kpɔ gbɔ̃jɛ̃, eye wo likè, le nɔ̀ àgbè ɖo Tɔhonɔ̀ be ènyàa ji, eye wo sùgbɔ ɖo e ji, ɖo Gbɔ̃gbɔ̃ Kɔ̀kɔ̀ɛ a na be woabe àgbɔ̃ jèpo.

³²Petrò le to èdùwo keŋu mè, eye e yì xɔ̀sètɔ kèwo lè Lidàawo gbɔ gbè ɖèka.

³³E kpɔ ŋusù ɖe kè wo yɔna be Enea-a lè funua. Ŋusù kèa, kplibɔ, eye e nɔ̀ èdɔ̀ba ji, èpè ènyi sɔ̃ŋu.

³⁴Petrò gblɔ̃ na ɛ̀ be: “Eneà, Yesù Kristò dà èdɔ̀ na wò. Sitè ne wò ŋutɔ wòa jrà àba wòa ɖo.” Eneà sitè zè ɖèka.

³⁵Lidàtɔwo keŋu ku Sarɔ̀n be àgojitɔwo kpɔ ŋusù kèa, eye wo xɔ̀ Tɔhonɔ̀ ji sè.

³⁶Nyɔ̃nù ɖe lè Yesù be nukplaviwo dòmè, lè Jope be èdùa mè; wo yɔna ɛ̀ be Tabità. Nyikɔ kèa nyi “Dɔrkas”, lè Grikgbe mè; e gɔ̃mè ye nyi “Èzĩ.” E nyi nyɔ̃nù àdɔ̀mènyuɛ̃wɔ̀tɔ ɖe. E dona àlɔ̀ wɔ̀amènɔ̀wo ŋutɔ.

³⁷Wàlɛbɛ ŋua, e jè èdɔ̀, eye be ku. Ekè wo lè èsì na yebe àmètia vɔ̀a, wo ɖo è àba ji lè èxɔ̀ ɖe mè, lè àsãŋu ji.

³⁸Ekè Yesù be nukplavi kèwo lè Jopeawo sè be Petrò lè Lidà, eye Lidà mu dìdì lè Jope gbɔ òa, wo dɔ̃ àmè èvè ɖoɖa ɛ̀, ne woa yì gblɔ̃ na ɛ̀ be, ne kèɖì va kpɔ yèwo.

³⁹Ekè Petrò sè àŋɛ̀ kèa troloa, e sitè, kplɔ̀ wo do zè ɖèka. Ekè wo va Jopea, wo kplɔ̀ ɛ̀ yì èxɔ̀a mè, lè àsãŋua ji. Ekè Petrò ɖo èxɔ̀a mèa, àsukusiwo keŋu tɔtè lè Petrò be ŋùkɔ̀, lè fã àvi, sɔ àwù ku àvɔ kèwo Dɔrkas tɔ̃, wàlɛbɛ kè be lè woa dòmèa fiɔ ɛ̀.

⁴⁰Petrò ɖè àmèwo keŋu to, e jè èklò, fãkue, eye e trɔ kpã ŋùkɔ̀ àmè kukua, gblɔ̃ be: “Tabità, fɔ̃!” Tabità hũ ŋùkuvi. Ekè be kpɔ Petròa, e fɔ̃, nɔ̀ ànyi.

⁴¹Petrò le yebe àlɔ̀, sɔ ɛ̀ sitè, eye e yɔ àɖèsãwo ku àsukusiawo va, sɔ ɛ̀ fiɔ wo àgbè-àgbè.

⁴²Jopetɔwo sè ènu kèawo, eye àmè sùgbɔ xɔ̀ Tɔhonɔ̀ ji sè.

⁴³Petrò nɔ̀ Jope funu, lè àgbàzedɔwɔ̀tɔ kè wo yɔna be Simɔ̀n-a be àxomè dìdi ɖe.