Read gen Romàtɔwo 11 Bible Online

Romàtɔwo 11 - gen bible

Romàtɔwo 11

¹Eŋuã, mù la biɔ sè be: Mawu ɖè àsi lè yebe dùkɔ̃a ŋuti keŋu-keŋu ye à? Gbèɖe! Nyè ŋutɔ cã Izràɛlvi mù nyi, le nyi Abràham be jìjimèvi, eye mù so Bɛnyamìn be kɔ̀taa mè.

²Mawu mu ɖè àsi lè yebe dùkɔ̃ kè ye ŋutɔ cã ɖɛa ŋuti ò. Àlo mì mu nya ènyà kè Ŋɔ̀ŋlɔ̃awo gblɔ̃ so Èli ŋuti, àlekè be na àle na Mawu so Izràɛl ŋuti òa?

³E be: “Tɔhonɔ̀, wo wù gblɔ̃ɖɛtɔ wòawo, eye wo gbã vɔsakpe wòawo gudu-gudu. Ènyè ɖèka kpò ye kpɔ̀tɔ̀, eye wo ji be yèwoa wù ènyè cã.”

⁴Vɔ̀a, àleke ye Mawu ɖo e ŋuti na ɛ̀ ɖo ò? E be: “Nyè ŋutɔ mù gble àmè hotu ètɔ̃ èkà èwì vɔ àtɔ̃ (7000) kèwo mu do ènu gũ na vòdu Baal òawo ɖɛ na ɖokoe nyè.”

⁵Nène a ke, lè fifì be hùenu cã a, àmè ɖewo gbà kpɔ̀tɔ̀, kèwo Mawu ku ŋuzĩzĩ na fàa, eye be cã wo dà ɖɛ.

⁶Ne màje ji ye be toa, eŋuã mu nyi èdɔwɔ̀wɔwo ŋuti ye ò. Ne mu nyi nène òa, màje mu gbà la nyi màje ò.

⁷Eŋuã, ɖè ye Izràɛl be dùkɔ̃a mu kpɔ ènu kè be le jia xɔ̀ òa? Àmè vi kèwo Mawu cãawo kpò ye kpɔ ɛ̀. Yudàvi kpɔ̀tɛawoa, e na woabe èjì trì,

⁸sìgbè lekè wo ŋlɔ̀ ɛ̀ ɖɛa nène be: “Mawu na wo àlɔ̃ dɔ̃dɔ̃ be gbɔ̃gbɔ̃, ŋùkuviwo ne wo mu gbà kpɔ ènu ò, eye ètowo ne wo mu gbà sè ènu ò, kaka va na egbè.”

⁹David gblɔ̃ be: “Na woabe ènu ɖùɖua ne trɔ zũ èmɔ̀ tetre, ne zũ èdɔ̀lele, ku àfɔ̀klɛ̃ kudo ètodɔ̃ jɔ̀jɔɛ na wo.

¹⁰Na woabe ŋùkuviwo ji ne cɔ̃, àleke be wo mu gbà teŋu kpɔ ènu ò, eye woabe àyàɖùɖuwo ne nɔ̀ yì e ji, ne woa xa gòbàa.”

¹¹Eye mù le biɔ be: eŋuã, ekè Izràɛlviwo klɛ̃ ènu, jè ànyia, wo la crɔ̃ gbidi-gbidi ye à? Gbèɖe! Ekè wo wɔ̀ èvuɛ̃a, Mawu xɔ̀ dùkɔ̃ buwo, àleke be Izràɛlviwo woa hùãŋu dùkɔ̃ kèawo.

¹²Vɔ̀ ne woabe àgɔ̀jèje trɔ zũ àdɔ̀kùnu na xixea, eye àlekè wo trɔ lè Mawu yomè a cã trɔ zũ àdɔ̀kùnu na dùkɔ̃ buwoa, eŋuã àdɔ̀kùnu kɛ ŋùmè e la nyi, ne wo trɔ gbɔ̀ va hlùɛ̃gãa gbɔ ò!

¹³Fifìa, mì, àmè kèwo mu nyi Yudàvi òawo ye mù le gblɔ̃ ènyà kèa na. Ekè e nyi be dùkɔ̃ buwo be *àmèdɔ̃dɔ̃ ye mù nyia, mù wɔ̀nà èglo ɖo àpe sumɔ̃vi-dɔa ŋuti.

¹⁴Èta mu nyɔ òa, to ekèa be wɔ̀wɔ mèa, mù la do ŋuhuã lãmè na Yudàviwo, àleke be Mawu la hlùɛ̃ woa dòmètɔ ɖewo gã.

¹⁵Đo, ekè Mawu ɖè àsi lè woa ŋutia, ɖèkawɔ̀wɔ va xixea mè. Vɔ̀, ne Mawu gbìgbɔ̀ xɔ̀ woa ɖe? Mu nyi ɖe ye be la nɔ̀ kpò sìgbè fɔ̃fɔ̃ so èku nènea?

¹⁶Ne ènukuyàya cucugbãa lè kɔ̀kɔ̀ɛa, eŋuã mawɛ kè wo la sɔ wɔ̀a cã la nɔ̀ kɔ̀kɔ̀ɛ. Nène a ke ye, ne àti be èkè lè kɔ̀kɔ̀ɛa, eŋuã yebe àlɔ̀zɛ̃awo cã la nɔ̀ kɔ̀kɔ̀ɛ.

¹⁷Ne wo sò àlɔ̀zɛ̃ ɖewo joa, èwò kè nyi ègbemè be àmìti kè wo sɔ tɛ ɖo woa tèpe, eye wò do xòmè ku àmìtia be èkè kudo èsìa,

¹⁸mù gbà yigò ɖo àlɔ̀zɛ̃awo ji ò. Ne wò jo le yigòa, ɖoŋù be mu nyi èwò ye dro èkèa ɖo èta ò, vɔ̀a èkèa ye dro wò ya.

¹⁹Èta mu nyɔ òa, wò la gblɔ̃ be: “Wo sò àlɔ̀zɛ̃awo jo, ne woa sɔ mù tɛ ɖo woa tèpe.”

²⁰E lè nènea nyàwo. Wo sò wo jo, ɖo wo mu xɔ̀sè ò. Èwò yaa, wò xɔ̀sè, ye ŋuti ye wò lè tèpe kèa ɖo. Ye ŋutia, mu jè be wòa kɔ ɖokoe wò yìji ò, vɔ̀a bòhũa, e jè be wòa nɔ vɔ̃.

²¹Đo ne Mawu mu kpɔ ɖo e mè na Yudàvi kèwo lè sìgbè àlɔ̀zɛ̃ kèwo jɔ̀ kudo àtia nène òa, eŋuã mu la kpɔ ɖo e mè na èwò cã ò.

²²Kpɔ àlekè Mawu wɔ̀nà àdɔ̀mènyuɛ̃ kudo àlekè yebe àlɔ̀ sɛ̃naŋu ɖo àmè jia ɖa! Yebe àlɔ̀ sɛ̃naŋu ɖo àmè kèwo jè ànyia ŋuti, vɔ̀a e wɔ̀ àdɔ̀mènyuɛ̃ na èwò ya, kaka kè àpo ènuwɔ̀na la nɔ na be ne gbà nɔ wɔ̀ àdɔ̀mènyuɛ̃ na wò kòkòkòa. Ne mu nyi nène òa, wo la sò wò cã jo.

²³Woawo cã, ne wo mu ci màxɔ̀sè mè òa, wo la gbìgbɔ̀ sɔ wo tɛ ɖo àtia ŋuti; ɖo Mawu ɖo ŋusɛ̃ la gbà sɔ wo tɛ ɖo e ŋuti.

²⁴Ne wo sò wò lè àmìti kè nyi ègbemètɔ̀ so jɔ̀jɔ̀mè a ŋuti, eye wo sɔ wò tɛ ɖo àmìti nyuɛ̃, kè mu jɔ̀ ku wò òa ŋutia, leke ye àmè kèwo nyi jɔ̀jɔ̀mè tɔ̀awo sɔsɔ tɛ ɖo woa ŋutɔ woabe àmìtia ŋuti la nɔ̀ bɔ̀bɔɛ ɖo ò?

²⁵Nɔ̀viwo, nyè mu jro be àmlìmànu kèa, ne nɔ̀ mànya mè na mì ò, ne mì mu gbà bù mìa ɖokoewo ènunyatɔwo ò. Ekèa ye nyi be, Izràɛl be dùkɔ̃a be àkpa ɖe la trì èjì, kaka sɔ na wàlɛbɛ kè dùkɔ̃ kèwo mu nyi Yudàvi òawo keŋu-keŋu la va Mawu gbɔ.

²⁶Ne ekèa jɔ̀ vɔ̀a, eŋuã, wo la hlùɛ̃ Izràɛl be dùkɔ̃ bliboa cã gã, ɖoa Ŋɔ̀ŋlɔ̃awo gblɔ̃ be: “Hlùɛ̃tɔa la so Ziɔ̀n va, eye e la ɖè Mawu màvɔ̃ ɖe sia ɖe jo lè Yakɔb be xòmèa mè.

²⁷Ekèa la nyi èzò kè mù la ɖù kudo wo, ne mù ɖè woabe èvuɛ̃wo joa.”

²⁸Sɔ kù ɖo àŋɛ̀nyuɛ̃ a ŋutia, Yudàviwo zũ Mawu be kɛ̃tɔwo ɖo mia ŋuti. Vɔ̀a, sɔ kù ɖo lekè wo cã wo ɖɛa ŋutia, wo nyi àmè ɖèvewo, ɖo woa tɔgbewo ŋuti.

²⁹Đo a, Mawu be ènu nanawo ku lekè be yɔna àmè ɖoa nɔ̀nà ànyi kakaka, eye wo mu trɔna ò.

³⁰Sãa mì mu sè ètonu na Mawu ò, vɔ̀ fifìa Mawu ku ŋuzĩzĩ na mì, ɖo Yudàviwo mu ɖo èto ò.

³¹Nène a kea, ekè wo ku ŋuzĩzĩ na mìa, fifìa, Yudàviwo cã mu sè ètonu na Mawu ò, àleke be Mawu la ku ŋuzĩzĩ na woawo cã, sìgbè lekè be ku ŋuzĩzĩ na mìawo cã-a nène.

³²Đo, ekè àmèwo keŋu gbe be yèwo mu la sè ètonu na Mawu òa, Mawu wɔ̀, wo zũ sìgbè ègàmènɔ̀tɔwo nène, àleke be woa teŋu ku ŋuzĩzĩ na àmè sia àmè.

³³Oò! Mawu be àdɔ̀kùnuwo sùgbɔ loò! Yebe ènunya ku àɖàŋù gòglò loò! Àmè ɖe la teŋu kpɔ ènyà ɖe la gblɔ̃ na Mawu so yebe kòjoɖoɖowo ŋutia? Àmè ɖekpe mu la teŋu sè yebe ɖoɖowo gɔ̃mè ò!

³⁴Ŋɔ̀ŋlɔ̃awo gblɔ̃ be: “Àmè kɛ ye sè Tɔhonɔ̀ be susu gɔ̃mè ò? Àmè kɛ ye la teŋu ɖo àɖàŋù na ɛ̀ ò?

³⁵Àmè kɛ ye na ɛ̀ ènu jè ŋùkɔ̀, ne bèa va ɖo e tèpe ò?”

³⁶E ye wɔ̀ ènuwo keŋu, e ye na ènuwo keŋu lè, eye ènuwo keŋu nyi e tɔ̀. Gogo na Mawu kaka sɔ yì! * Àmèn.