Read gen Romàtɔwo 13 Bible Online

Romàtɔwo 13 - gen bible

Romàtɔwo 13

¹E jè be àmè sia àmè ne bɔ̀bɔ̀ èta na jiɖùɖuwo, ɖo jiɖùɖu ɖekpe mu lè, kè mu so Mawu gbɔ ò. Jiɖùɖu kèwo ye lèa, Mawu ŋutɔ ye ɖo wo ànyi.

²Ye ŋutia, ne àmè ɖe sitè ɖo jiɖùɖu ŋutia, e sitè ɖo ènu kè Mawu ɖoa ànyi a ŋuti. Àmè kèwo la wɔ̀ ekèa, woa ŋutɔwo le hɛ̃ hùɛgbledo va woa ɖokoewo ji.

³Àmè kèwo wɔ̀nà ènu nyuɛ̃awo mu vɔ̃na kòjoɖotɔwo ò, vɔ̀a èvuɛ̃wɔ̀tɔwo ye vɔ̃na èjiɖùɖuwo. Wò jro be èjiɖùɖu mu gbà do ŋɔji[7] na wò òa? Eŋuã wɔ̀ ènu nyuɛ̃, ne woa kafu wò.

⁴Jiɖùɖu nyi Mawu be sumɔ̃vi kè la na wòa wɔ̀ ènu nyuɛ̃. Vɔ̀a, ne wò wɔ̀nà ènu vuɛ̃ a, eŋuã, vɔ̃ ɛ̀. Đo a, mu nyi gbalo ye wo na ɛ̀ ŋusɛ̃ be ne dɔ̃ èto na àmè ò. Mawu be sumɔ̃vi be nyi, ne bèa nɔ dɔ̃ èto na ènuvuɛ̃wɔ̀tɔwo, ne bèa sɔ ɖè Mawu be àdɔ̀mèze fiɔ.

⁵Ekèa ŋuti ye e jè be àmè ne bɔ̀bɔ̀ ye ɖokoe na jiɖùɖu, mu nyi ne Mawu mu gbà do àdɔ̀mèze ɖo e ŋuti ɖèɖe kpò ò, vɔ̀ bòhũa, ɖo, ekè àmè be jìjigbè na be nya ènu kè jè ne bèa wɔ̀a cã ŋuti.

⁶Susu kèa ŋuti cã ye mì tuna ètaci ɖo, ɖo jiɖùtɔ kèwo kpɔna àleke be ènyà gbɔa, Mawu be sumɔ̃viwo ye wo nyi.

⁷Ènu sia ènu kè e jè be mìa sɔ na àmèa, mì sɔ ɛ̀ na ɛ̀. Àmè kè e jè be woa tu ètaci na a, mì tu ì na ɛ̀. Àmè kè e jè be woa jɔ̀ èdɛ̃-ga na a, mì jɔ̀ ɛ̀ na ɛ̀. Àmè kè e jè be woa sia, mì si ì. Àmè kè e jè be woa na bùbua, mì sɔ bùbu na ɛ̀.

⁸Mì mu gbà ɖù èfɛ̃ do àmè ɖekpe ò, ne mu nyi lɔ̃lɔ̃ na mìa nɔ̀nɔwo be èfɛ̃ kpò mìa ɖù do mìa nɔ̀nɔwo. Đo a, àmè kè lɔ̃ yebe èhavia, wɔ̀ ɖo èsea ji.

⁹Èse kèwo Mawu do be: “Mù gbà wɔ̀ gbòlò ò. Mù gbà wù àmè ò. Mù gbà fìfĩ ò. Mù gbà bìaŋù ɖo èha wòvi be ènu ŋuti ò”, sɔ kpe ɖo èse buwo keŋu ŋutia, wo bɔ̀ wo ɖodu lè *èse kèa mè be: “Wò la lɔ̃ èha wòvi sìgbè wò ŋutɔ ɖokoe wò nène.”

¹⁰Lɔ̃lɔ̃ mu wɔ̀nà èvuɛ̃ ɖo àmè èhavi ŋuti ò; ye ŋutia èsea kpata ji wɔ̀wɔ ye nyi lɔ̃lɔ̃.

¹¹Fifìa mì nya hùenu veve kè mè mi lèa. Gàmè sù ne mìa fɔ̃ so àlɔ̃ mè, ɖo Mawu be hlùɛ̃gã lili fifìa wu wàlɛbɛ kè mi xɔ̀sè troloa.

¹²Èzã va yì vɔ̀; èŋù le kè. Mì na mia tɔtè ènu kèwo mi wɔ̀nà lè vìvìti mèawo wɔ̀wɔ, ne mia sɔ kɔ̀kɔ̀ɛ mè be àhùawɔ̀nuwo kpla.

¹³Mì na mia nɔ̀ àgbè nyuɛ̃, sìgbè àmè kèwo le zɔ̃ lè kɔ̀kɔ̀ɛ mèawo nène. Mì mu gbà na mia nɔ̀ ɖù ènusu, àlo mia nɔ nù àhà mu ò. Mì mu gbà na mia nɔ wɔ̀ *àhasì ku gbòlò, àlo mia nɔ wɔ̀ àjrè, la nɔ hùãŋu ò.

¹⁴Vɔ̀a, mì na mia sɔ Tɔhonɔ̀ Yesù Kristò be nɔ̀nɔmè do sìgbè àwù nène, eye mì mu gbà nɔ lebè na ŋutilã kaka ne mìa va nɔ wɔ̀ yebe ènu jro àmèwo ò.