Read gen Romàtɔwo 15 Bible Online

Romàtɔwo 15 - gen bible

Romàtɔwo 15

¹Èdɔ do àsi ye be nyi na mi, àmè kèwo si ŋusɛ̃ lèawo be mia nɔ kpe ɖo àmè kèwo si ŋusɛ̃ mu lè òawo ŋuti. Mi mu ɖo la nɔ wɔ̀ ènu kè la jè mia ŋutɔwo mia ɖokoewo ɖèɖe nu kpò ò.

²Lè ekèa tèpea, e jè be mia dòmètɔ ɖe sia ɖe ne wɔ̀ ènu kè la jè ye havi be ŋùmè, la nyɔ na ɛ̀, eye be la tù ì ɖoa.

³Kristò cã mu ji ènu kè jènà e ji na ye ŋutɔ kpò ò. Wo ŋlɔ̀ ɛ̀ ɖɛ be: “Èzũ kè ye àmèwo zũ na wòa va lɔ mù.”

⁴Đo ènu sia ènu kè wo ŋlɔ̀ ɖɛ so gbè ɖe gbè kea, wo ŋlɔ̀ ɛ̀ ɖɛ, la sɔ fiɔ mi ènu, àleke be mia ɖo ŋùɖo to veve do ènu kudo àkɔfa kèwo mi kpɔ lè ŋɔ̀ŋlɔ̃awo mèa ji.

⁵Veve do ènu ku àkɔfa be Mawu a ne wɔ̀ ɛ̀ be mìabe ègbè ne jè ègbè ji na mìa nɔ̀nɔwo, eye mìa wɔ̀ ènu kè Yesù Kristò jro a.

⁶Àleke be mìa kpata mìa sɔ ègbè ɖèka na gogo Mawu, mia Tɔhonɔ̀ Yesù Kristò be Ètɔ.

⁷Ye ŋutia, mì xɔ̀ mìa nɔ̀nɔwo sìgbè lekè Kristò cã xɔ̀ mìa nène, na Mawu be gogo.

⁸Mù le gblɔ̃ na mì be Kristò va trɔ zũ sumɔ̃vi na àmè kèwo wo sò èvo naawo. Ne bèa ɖè Mawu be ànùkua wɔ̀wɔ[8] fiɔ, ne bèa ɖo èkpe àjɔ̀gbè kè Mawu fìã na mia tɔwoa ji,

⁹eye àmè kèwo mu nyi Yudàvi òawo cã ne na gogo Mawu, ɖo yebe ŋuzĩzĩ ku na àmèa ta, sìgbè àlekè wo ŋlɔ̀ ɛ̀ ɖɛ nènea be: “Ekèa ŋuti mù la na wò gogo lè dùkɔ̃wo dòmè eye mù la jì èhà, sɔ mlã àpo nyikɔ.”

¹⁰Wo gbà ŋlɔ̀ ɖɛ be: “Mìa, dùkɔ̃wo, mì jɔ̀jì ku Mawu be dùkɔ̃ kè wo cã a.”

¹¹Ŋɔ̀ŋlɔ̃ bu be: “Mìa dùkɔ̃wo keŋu, mì kafu Tɔhonɔ̀, eye mì na dùkɔ̃wo keŋu woa pò mlã ɛ̀!”

¹²Mawu be gblɔ̃ɖɛtɔ Ezayà cã gblɔ̃ be: “Jèse be jìjimèvi ɖe la va, àmè kè la sitè, eye be la ɖè ègbè na dùkɔ̃wo kpataa, e ye ŋuti dùkɔ̃wo la ɖoŋù ɖo.”

¹³Ŋùɖo be Mawu a, ne ɖɔ mì ku jìjɔɛ kudo fàfa fuu, ɖo mì xɔ̀ e ji sè, àleke be Gbɔ̃gbɔ̃ Kɔ̀kɔ̀ɛ a ne do mì ŋusɛ̃, ne ŋùɖo ne nɔ̀ mìa si drì.

¹⁴Nɔ̀vi nyèwo, nyè ŋutɔ mù kã ɖo e ji be mìa cã mì ɖɔ ku àdɔ̀mènyuɛ̃ kudo ènunya blibo, eye mì teŋu nɔ ɖo àfɔ̀ àfɔ̀ ji na mìa nɔ̀nɔwo.

¹⁵Gãkea, lè xoma kèa be àkpa ɖewo mèa, mù dojì ŋlɔ̀ ènu sùgbɔ ne ma sɔ ɖo ŋùku ènu ɖewo ji na mì. Mù wɔ̀ ekèa ɖo, to yebe màje jia, Mawu do èdɔ kèa àsi na mù, be ma wɔ̀.

¹⁶Èdɔa ye nyi be ma sumɔ Yesù Kristò lè àmè kèwo mu nyi Yudàvi òawo dòmè. Nène a, mù wɔ̀ sùmɔ̀-sumɔ-dɔ kèa, le do àŋɛ̀nyuɛ̃ kè so Mawu gbɔa na wo, àleke be àmè kèwo mu nyi Yudàvi ò a woa trɔ zũ vɔsa àdodoe kè ŋuti Gbɔ̃gbɔ̃ Kɔ̀kɔ̀ɛ a kɔ̀, eye be jè ŋùmè na Mawu.

¹⁷Lè ɖèka wɔ̀wɔ ku Kristò mèa, mù teŋu go lè èdɔ kè mù le wɔ̀ na Mawu a mè.

¹⁸Nyè mu la dojì la gblɔ̃ ènyà ɖekpe so ènu ɖe ŋuti, wu ènu kè Kristò wɔ̀ to ji nyè, lè ènyà kèwo mù gblɔ̃, ku èdɔ kèwo mù wɔ̀awo mè, ne àmè kèwo mu nyi Yudàvi ò a, woa sè ètonu na Mawu ò.

¹⁹Ekèa jɔ̀, to jèsìdo ku ŋùdãnu kèwo mù wɔ̀, to Gbɔ̃gbɔ̃ Kɔ̀kɔ̀ɛ be ŋusɛ̃a ji. Nène a, mù zɔ̃ to Yèruzàlɛm, yì to kaka Ilirikò kpedo, sɔ do Kristò be àŋɛ̀nyuɛ̃ a.

²⁰Àpe èjro vevea ye nyi be ma do àŋɛ̀nyuɛ̃ a lè fikè wo mu sè Kristò be nyikɔ lè kpɔ ò, ne nyè mu gbà yì tù èxɔ̀ ɖo dodoe kè àmè bu ɖo ɖɛ xoxoa ji ò.

²¹Nène a, mù le zɔ̃ ɖo ènu kè wo ŋlɔ̀ ɖɛa ji be: “Àmè kèwo wo mu do àŋɛ̀nyuɛ̃ na kpɔ òawo la kpɔ ɛ̀, eye àmè kèwo mu sè ènu ɖekpe so e ŋuti kpɔ òawo la sè e gɔ̃mè.”

²²Ènu kèa ye xe èmɔ na mù eji-eji, eye nyè mu teŋu va mìa gbɔ ò.

²³Vɔ̀a fifìa, ekè mù wu èdɔ nyèa nu lè àgo kèawo ji vɔ̀a, eye èpè fuu ye nyi ekèa kè ye mù le jro veve ɖe be ma va kpɔ mìa,

²⁴ma jro be ne mù va le yì Spanìaa, ma va kpɔ mì, ne ma xɔ̀ àlɔ̀do so mìa gbɔ, sɔ yì, wàlɛbɛ kè mù la nɔ̀ mìa gbɔ, sɔ kpɔ jìjɔɛ vi ɖe ku mìa.

²⁵Vɔ̀a, fifì yaa, mù le yì Yèruzàlɛm, ne ma sumɔ àɖèsãwo.

²⁶Màkedonìatɔwo ku Àkayìatɔwo ɖo è be yèwoa jɔ̀ ènu fàa ɖoɖa Yèruzàlɛm be àɖèsã kèwo nyi wɔ̀amènɔ̀woa.

²⁷Ènu be nyi woa ŋutɔwo ɖo be yèwoa wɔ̀ ku èjì fàa. Lè nyàwototo mèa, e jè cã be woa wɔ̀ ɛ̀. Đo, ne àmè kèwo mu nyi Yudàvi òawo kpɔ mamã lè woabe gbɔ̃gbɔ̃ mè be ènuwo mèa, woa cã wo ɖo la do wo àlɔ̀ lè xixe mè be ènuwo mè.

²⁸Ne mù wɔ̀ èdɔ kèa, sɔ ènu nana a do àsi na wo vɔ̀a, eŋuã, mù la jè èmɔ, la va to mìa gbɔ, la yì Spanìa.

²⁹Mù nya be, ne mù va ɖo mìa gbɔa, mù la sɔ Kristò be *sìtu kè sùgbɔ fuu lè àŋɛ̀nyuɛ̃ a mèa va na mì.

³⁰Vɔ̀, nɔ̀vi nyèwo, ɖo lekè mì xɔ̀ Tɔhonɔ̀ Yesù Kristò ji sè ɖo, ku lɔ̃lɔ̃ kè Gbɔ̃gbɔ̃ Kɔ̀kɔ̀ɛ a na mìa ŋutia, mù le blìbɔ̀ na mì, be mìa kpe ɖo ŋuti nyè, sɔ nɔ fãkue veve ɖe na Mawu ɖo èta nyè,

³¹ne ma gã lè màxɔ̀sètɔ kèwo lè Yudeà wo si mè, eye ne ènu nana kè mù hɛ̃ le yì Yèruzàlɛm-a, ne jè ŋùmè na àɖèsãawo.

³²Lekea, ne Mawu jro a, mù la va mìa gbɔ ku jìjɔɛ, eye mù la va ɖì ɖo e mè[9] lè mìa gbɔ.

³³Mawu kè nana fàfaa, ne nɔ̀ ku mìa kpata! * Àmèn.