Read gen Romàtɔwo 16 Bible Online

Romàtɔwo 16 - gen bible

Romàtɔwo 16

¹Mù jro be ma sɔ mia nɔ̀vi nyɔ̃nù Foebe, àmè kè nyi sumɔ̃vi veve ɖe lè Sãkrè be èhabɔ̀bɔa mèa do àsi na mì.

²Mì xɔ̀ ɛ̀, ekè be nyi Tɔhonɔ̀ tɔ̀a, sìgbè àlekè e jè be mìa xɔ̀ àɖèsãwoa nène. Mì na ɛ̀ àlɔ̀do ɖekpekpe kè be hiã so mìa gbɔa, ɖo ye ŋutɔ cã dona àlɔ̀ àmè sùgbɔ kèwo dòmè nyè ŋutɔ cã mù lèa.

³Mù do ègbè na Priskà ku èsrɔ̃a Akilàs, àmè kèwo bɔ̀ ɖo ŋuti nyè, mi wɔ̀ èdɔ na Yesù Kristò.

⁴Wo sɔ woabe àgbè a kè fàa ɖo èta nyè, àkpe ye jè na wo kakaka! Mu nyi ènyè ɖèɖe kpò ye le do àkpe na wo ò, vɔ̀a èhabɔ̀bɔ kèwo keŋu lè àmè kèwo mu nyi Yudàvi òawo dòmèawo cã.

⁵Mù do ègbè na èhamè kè bɔ̀nà lè woabe àxomèa cã. Mì do ègbè na Epenetò, àmè ɖève nyè kè nyi àmè cucugbã kè trɔ èjìmè, va zũ Kristòtɔ̀ lè Azìaa.

⁶Mù do ègbè na Mari, àmè kè sɔ veve do ènu wɔ̀ èdɔ lè mìa dòmèa.

⁷Mù do ègbè na Ãdronikò ku Yunìa, àpe xòmètɔ kèwo nɔ̀ gàmè ku mùawo cã. Wo nyi àmè ɖìnyiwo lè *àmèdɔ̃dɔ̃wo dòmè, eye wo nyi Kristòtɔ̀ jè ŋùkɔ̀ na mù.

⁸Mì do ègbè na Ãpliatò[10], àmè ɖève nyè kè lè èkàdodo mè ku Tɔhonɔ̀a.

⁹Mì do ègbè na Urbanɔ̀, miabe èhadɔwɔ̀tɔ lè Kristò mè ku àmè ɖève nyè, Stakis.

¹⁰Mù do ègbè na Àpelɛ̀s, àmè kè likè lè èhadodo mè ku Kristò. Mù do ègbè na Aristobulò be àxomètɔwo cã nyuɛ̃ ɖe.

¹¹Mì do ègbè na Hɛrodìɔn, xòmètɔ nyè kudo Narkisò be àxomètɔ kèwo lè èhadodo mè ku Kristò.

¹²Mù do ègbè na Trifenɔ̀ ku Trifosà, nyɔ̃nù kèwo lè do veve ènu lè Tɔhonɔ̀ be èdɔa mèawo. Mì do ègbè na Pɛrsidà ɖève nyè, nyɔ̃nù kè le jè àgbàgba le wɔ̀ èdɔ na Tɔhonɔ̀a.

¹³Mì do ègbè na Rufò[11], àmè cãcã kè lè èhadodo mè ku Tɔhonɔ̀a, ku ènɔa kè gbà nyi ènɔ̀ nyèa.

¹⁴Mì do ègbè na Asɛ̃kritò, Flɛgò, Hɛrmès, Patrobàs, Hɛrmàn, ku nɔ̀vi kèwo ye lè woa gbɔawo.

¹⁵Mù do ègbè na Fìlolɔgò ku Yulìa, Nerea ku nɔ̀via nyɔ̃nù, Olimpà[12] kudo àɖèsãme bu kèwo keŋu lè woa gbɔawo.

¹⁶Mì do ègbè na mìa nɔ̀nɔwo eye mì kpla àsi èkɔ̀ na mìa nɔ̀nɔwo; ku lɔ̃lɔ̃ kɔ̀kɔ̀ɛ be jèsì[13]. Kristò be èhabɔ̀bɔawo keŋu do ègbè ɖoɖa mì.

¹⁷Nɔ̀viwo, mù le ɖo àfɔ̀ àfɔ̀ ji na mì be mìa kpɔ mìa ɖokoewo ji nyuɛ̃ ɖe, ɖo àmè kèwo hɛ̃nà màmawo ku àfɔ̀klɛ̃wo va àmè dòmè, eye wo sinatè ɖo ènu kè wo fiɔ mìa ŋutiawo ŋuti. Mì zɛ̃ na wo.

¹⁸Đo mu nyi Tɔhonɔ̀ Yesù Kristò ye àmè kèawo le sumɔ ò, vɔ̀ bòhũa, woa ŋutɔ be pòdowo ye wo le sumɔ. Wo sɔna ènyà viviwo kafuna àmèwo, eye wo blènà àmè kèwo ye mu susuna èvuɛ̃ ɖe òawo.

¹⁹Vɔ̀a, àmè sia àmè nya àlekè mìa yaa, mì le ɖo èto àŋɛ̀nyuɛ̃ a, Ekèa ŋuti ye mù kpɔna jìjɔɛ ɖo mìa ŋuti. Ènu kè mù le jro na mìa ye nyi be mìa nya ènu lè ènu nyuɛ̃ wɔ̀wɔ mè. Vɔ̀a, lè ènu vuɛ̃ wɔ̀wɔ mèa, mìa nyi àmè kɔ̀kɔ̀ɛwo.

²⁰Mawu kè nana fàfaa, la gbã Satana gudu-gudu ɖo mìabe àfɔ̀wo gɔ̃mè sɔ̀sɔɛ ɖe. Mia Tɔhonɔ̀ Yesù be màje ne nɔ̀ ku mì.

²¹Timòteo, àpe èhadɔwɔ̀tɔa do ègbè ɖoɖa mì; nènea ke ye Lukìɔs, Jasɔ̀n ku Sosipatrɔ̀s, àmè kèwo nyi xòmè nyèwoa, cã do ègbè ɖoɖa mì.

²²Ènyè Tɛrtìo[14], àmè kè ŋlɔ̀ Paolò be xoma kèa lè Tɔhonɔ̀ mèa, mù do ègbè na mì, sìgbè mìa nɔ̀vi Kristòtɔ̀ ɖèka nène.

²³Gayò, àmè kè gbɔ mù zɛ̃ a, ekè be àxomè èhabɔ̀bɔ mènɔ̀tɔwo bɔ̀nà lèa, do ègbè ɖoɖa mì. Erastò, èdùa be ègàjikpɔtɔa ku mia nɔ̀vi ŋusù Kartɔ̀s le do ègbè ɖoɖa mì. [

²⁴Mia Tɔhonɔ̀ Yesù be màje ne nɔ̀ ku mìa kpata * Àmèn[15].]

²⁵Mawu, Àmè kè teŋu do mì ŋusɛ̃, zɔ̃ ɖo àŋɛ̀nyuɛ̃ kè mù le do ku Yesù Kristò be Ènyà Nyuɛ̃a jia, zɔ̃ ɖo àmlìmànu wawla kè lè so xoxo xòxòa be ɖèɖèfiɔ ji,

²⁶kè ze fifìa to gblɔ̃ɖɛtɔwo be ŋɔ̀ŋlɔ̃wo ji, zɔ̃ ɖo Mawu kòkòɖàbìa be ɖoɖo kè wo na dùkɔ̃ kèwo mu jèsi Mawu òa, àleke be woa ɖo xɔ̀sè be ètonu sèsea.

²⁷Mawu, ènunyatɔ ɖèka kpò gogo jè na, to Yesù Kristò ji, so màvɔ yì màvɔ mè. * Àmèn.