Read gen Romàtɔwo 2 Bible Online

Romàtɔwo 2 - gen bible

Romàtɔwo 2

¹Ye ŋutia, tàflacɛ ɖekpe mu lè àsi wò ò, èwò, àmè ɖekpekpe àmè kè wò nyi, le ɖo kòjoa. Wàlɛbɛ kè wò le ɖo kòjo na àmè bua, wò le gblehùɛ do ɖokoe wò; ɖoa, èwò kè le ɖo kòjoa, wò ŋutɔ wò gbà wɔ̀nà ènu kè ŋuti wò le dohùɛ do àmè bu ɖoa.

²Co, mi nya be Mawu be kòjoɖoɖoa, zɔ̃nà ɖo nyàwo ji, ɖo àmè kèwo wɔ̀nà àleke be ènuawo ŋuti.

³Èwò, àmè kè le ɖo kòjo na ènu kèawo wɔ̀tɔwo, vɔ̀, wò ŋutɔ wò gbà wɔ̀nà ènu kèawo kea, ɖe ye wò le susu be yè la teŋu si lè Mawu be kòjoɖoɖoa nua?

⁴Àlo, wò le dovlo yebe àdɔ̀mènyuɛ̃ wɔ̀wɔ be gbɔsùsua, yebe èjì gbɔ̃ɖɛ ku yebe àmè hɛ̃hɛ̃ blɛ̀wua be ɖɔɖɔa? Wò mu nya be Mawu be àdɔ̀mènyuɛ̃ wɔ̀wɔa ye le kplɔ̀ wò le yì èdɛ̃ɖɔ̀li mè òa?

⁵To àpo èjì tìtri ku àpo èdɛ̃màɖɔ̀li jia, wò le bɔ̀ àdɔ̀mèze be àdɔ̀kùnu ɖɛ na ɖokoe wò, na gbè kè gbè Mawu la ɖo kòjo jɔ̀jɔɛ lè yebe àdɔ̀mèze be àzãa gbè.

⁶E la ɖo e tèpe na àmè sia àmè, zɔ̃ ɖo ènu kè àmè sia àmè wɔ̀a ji.

⁷Àmè kèwo do veve ènu, wɔ̀ ènyuɛ̃, eye wo ji gogo, bùbua, wo la xɔ̀ àgbè kòkòɖàbìa.

⁸Vɔ̀a, àmè kèwo sinatè ɖo Mawu ŋuti, eye wo mu sènà ètonu na nyàwo a ò, vɔ̀ bòhũa, wo lɔ̃nà ènuvuɛ̃ wɔ̀wɔa, Mawu la sɔ èjìbibi dɔ̃ èto na wo sɛ̃sɛ̃ ɖe.

⁹Àmè kèwo kpata sɔ èvuɛ̃ ɖo èdɔa, wo la ɖù àyà, eye wo la sè veve: cucugbãa, Yudàviwo, e yomè a, àmè kèwo mu nyi Yudàvi òawo.

¹⁰Vɔ̀a, gogo, bùbu ku fàfa la nyi ènunyuɛ̃ wɔ̀tɔwo kpata tɔ̀, Yudàviwo cucugbãa, e yomè a, àmè kèwo mu nyi Yudàvi òawo.

¹¹Đo a, Mawu mu dɔ̃na àmè ɖekpe ji ò.

¹²Àmè kèwo kpata Mosè be èsea mu bla ò, eye wo wɔ̀ èvuɛ̃a, wo la crɔ̃, èsea mà nɔ̀ e mè. Vɔ̀ àmè kèwo kpata lè *èse kèa gɔ̃mè, eye wo wɔ̀ èvuɛ̃a, èse kèa ye wo la sɔ ɖo kòjo na wo.

¹³Đo mu nyi àmè kèwo ɖona èto, sènà èseawo ye lè jɔ̀jɔɛ lè Mawu be ŋùku mè ò, vɔ̀a, àmè kèwo wɔ̀nà ɖo èsea jiawo bòhũ ye lè jɔ̀jɔɛ lè Mawu be ŋùmè.

¹⁴Đo ne àgbàlè kèwo si èse mu lè òawo wɔ̀nà ɖo èsea ji, so kaka jɔ̀jɔ̀mè kea, àmè kèawo, kèwo si èse mu lè òawo le nyi *èse dodo na woa ɖokoewo.

¹⁵Lekè wo wɔ̀nà ɖo èse ji ɖoa ɖènà ɛ̀ fiɔ be Mawu ŋlɔ̀ èsea ɖo woabe èjìwo mè. Nène a ke ye woabe *jìjigbè cã ɖùnà ɖase na wo so ekèa ŋuti, ɖo gà ɖewo mèa, woabe susu donahùɛ do wo, eye gà buwo mè cã a, e kpɔna wo be wo lè jɔ̀jɔɛ.

¹⁶Ènu kè àŋɛ̀nyuɛ̃ nyèa le fiɔa ye nyi àlekè bè la va nɔ̀, lè àzã ŋua gbè, wàlɛbɛ kè Mawu la ɖo kòjo na àgbètɔwo be bèbemè-nuwo, to Yesù Kristò jia.

¹⁷Vɔ̀a, èwò yaa, ne wò yɔna ɖokoe wò be Yudàvi, eye wò donajì ɖo èsea ŋuti, eye wò sɔ Mawu wò le yigòa,

¹⁸èwò kè nya Mawu be èjro, eye wò nya ènu kè nyi nyuɛ̃, sìgbè lekè wò kpla ɛ̀ so èsea mèa nènea,

¹⁹èwò kè kpɔna ɖokoe wò be yè nyi ŋùvìnɔ̀wo be kplɔ̀tɔ, kudo kɔ̀kɔ̀ɛ na àmè kèwo lè vìvìti mè woa,

²⁰èwò kè sɔ ɖokoe wò wɔ̀ àmèmànyanuwo be hɛ̃tɔ kudo àmè kèwo mu kpɔ sĩ òawo be ènufiɔtɔ, ɖo, wò nya nyuɛ̃ ɖe be ènunya ku nyàwo ɖèɖe sɔ̃ŋu ye lè èsea mèa,

²¹nukɛ jɔ̀ ye èwò, àmè kè fiɔna ènu àmè buwoa, wò mu la teŋu fiɔ ènu ɖokoe wò ò? Wò do àŋɛ̀a be wo mu gbà fìfĩ ò, vɔ̀ wò ŋutɔ wò le fìfĩ.

²²Wò gblɔ̃ be wo mu gbà wɔ̀ *àhasì ò, co, wò ŋutɔ wò le wɔ̀ àhasì. Vòduwo be ènu jina ŋɔ na wò, vɔ̀ wò fĩnà vòdukpa mènuwo.

²³Èwò, kè kãna àdã be yè wɔ̀nà ɖo èsea jia, èwò ke ye gbà dànà èsea ji, sɔ donavlo Mawu.

²⁴Mawunyaa gblɔ̃ ɛ̀ nènea pɛpɛ be: “Mìa Yudàviwo be ènuwɔ̀wɔ ŋuti ye, àmè kèwo mu nyi Yudàvi òawo gblɔ̃nà bùsu-nyawo ɖo Mawu ŋuti ɖo.”

²⁵Đo ne wò wɔ̀nà ɖo èsea jia, eŋuã àlè lè àpo *èvosòso sìgbè Yudàvi nènea mè. Vɔ̀ ne wò mu wɔ̀nà ɖo èsea ji òa, eŋuãa, wò trɔ sìgbè àmè mà nyi Yudàvi, kè wo mu sò èvo na òa nène.

²⁶Ne e nyi be àmè kè wo mu sò èvo na òa, wɔ̀nà ɖo èsea be ɖoɖowo jia, ɖe ye Mawu mu la teŋu sɔ yebe èvo mà soa, sɔ wɔ̀ èvosòso na ɛ̀ òa?

²⁷Fifìa àmè kè wo mu sò èvo na, lè ŋutilã mè ò, vɔ̀ be wɔ̀nà ɖo èsea jia, la gblehùɛ do èwò, kè wo sò èvo na, vɔ̀ wò gbà dànà èse kè wo ŋlɔ̀ do àsi na wòa jia.

²⁸Đo mu nyi àmè kè nyi Yudàvi lè ŋùkutaa, ye nyi Yudàvi ò. Eye mu nyi ŋutilã mè be jèsìdo kè wo kpɔnaa, ye nyi *èvosòso ò.

²⁹Vɔ̀ bòhũa, àmè kè nyi Yudàvi lè ye ɖokoe mè, eye e sò èvo na ye ŋutɔ be èjìa ye nyi Yudàvi àdodoe, eye èvosòso kèa hati so Mawu be Gbɔ̃gbɔ̃ a gbɔ, eye mu so èse, kè wo ŋlɔ̀ ɖɛa mè ò. Mawu ye kafuna nènemea, mu nyi àgbètɔwo ye ò.