Read gen Romàtɔwo 4 Bible Online

Romàtɔwo 4 - gen bible

Romàtɔwo 4

¹Eŋuã, nukɛ ye mi la gblɔ̃ so Abràham, mia tɔgbea ŋuti ò? Nukɛ ye be kpɔ xɔ̀, zɔ̃ ɖo ŋutilã ji ò?

²Ne e nyi be Mawu bù Abràham be e lè jɔ̀jɔɛ, to èdɔ kè be wɔ̀a jia, eŋuã, e ɖo ènu kè be la sɔ kã àdã a, vɔ̀a, mu nyi lè Mawu be ŋùmè ò.

³Lè nyàwototo mèa, leke ye Mawunyaa gblɔ̃ ò? E be: “Abràham xɔ̀ Mawu ji sè, ye ŋuti Mawu bù ì be e lè jɔ̀jɔɛ.”

⁴Ne àmè ɖe wɔ̀ èdɔ, eye wo tu èfɛ̃ na ɛ̀a, wo mu bùnà èfɛ̃tua sìgbè àdɔ̀mènyuɛ̃ nène ò, vɔ̀ bòhũ sìgbè ènu kè nyi àmè ŋutɔ tɔ̀, eye wo sɔ na ɛ̀a nène.

⁵Vɔ̀a, ne àmè kè mu wɔ̀nà èdɔ ɖekpe ò, vɔ̀ gãkea, xɔ̀nà Mawu kè bùnà èvuɛ̃wɔ̀tɔ be e lè jɔ̀jɔɛa ji sè a, eŋuã, yebe xɔ̀sè ŋuti ye wo bù ì be e lè jɔ̀jɔɛ ɖo.

⁶Nène a ye David cã gblɔ̃ be àmè kè Mawu kpɔ be e lè jɔ̀jɔɛ, sĩ vɔ̀, mu nyi ɖo ènu ɖe kè be wɔ̀a ŋuti òa, nyi sìtume. E gblɔ̃ be:

⁷“Sìtu ɖèɖe ye e nyi na àmè kèwo Mawu ŋutɔ sɔ woabe àgɔ̀wo kè, eye e tutu woabe èvuɛ̃wo joa!

⁸Sìtu ɖèɖe ye e nyi na àmè kè Tɔhonɔ̀ mu bù yebe èvuɛ̃ na òa.”

⁹Sìtunya ŋua, àmè kèwo wo sò èvo naawo ɖèɖe tɔ̀ kpò be nyia? Àlo, e lè na àmè kèwo wo mu sò èvo na òawo cã? Mi gblɔ̃ be: “Wo bù Abràham be e lè jɔ̀jɔɛ, ɖo yebe xɔ̀sèa ŋuti.”

¹⁰Vɔ̀ nɔ̀nɔmè kɛ mè be nɔ̀ gbɔ̀xue wo bù ì be e lè jɔ̀jɔɛ ò? Wàlɛbɛ kè wo sò èvo na ɛ̀a ye à, àlo wàlɛbɛ kè wo mu kpɔ sò e ò? Aò, wàlɛbɛ ŋuaa, wo mu kpɔ sò è na ɛ̀ hàɖe ò.

¹¹E yomè gbɔ̀xue wo va sò èvo na Abràham, sìgbè jèsìdo nène, la sɔ ɖo èkpe e ji be, Mawu bù ì be e lè jɔ̀jɔɛ, ɖo yebe xɔ̀sè ŋuti, wàlɛbɛ kè wo mu sò èvo na ɛ̀ ŋutɔ cã ò a. Nène a, Abràham gbà trɔ zũ àmè kèwo xɔ̀sè, vɔ̀ wo mu sò èvo na wo òawo cã be ètɔ, ne woa bù wo be wo lè jɔ̀jɔɛ.

¹²Nène a ke ye be gbà nyi ètɔ na àmè kèwo wo sò èvo naawo cã. Mu nyi kè wo sò èvo na woa ɖèɖe ŋuti kpò ò. Vɔ̀ bòhũa, ɖo kè wo sò èvo na wo, eye wo gbà nɔ̀ àgbè lè xɔ̀sè mè, sìgbè lekè mia tɔgbe Abràham nɔ̀ àgbè, gbɔ̀xue wo va sò èvo na ɛ̀a nènea ŋuti.

¹³Mawu fìã àjɔ̀gbè na Abràham kudo yebe jìjimèviwo, be yè la sɔ xixea wɔ̀ ècrɔ̃nu na wo. Mu nyi be ekè Abràham wɔ̀ ɖo èsea jia ŋuti ye Mawu fìã àjɔ̀gbè kèa na ɛ̀ ɖo ò, vɔ̀ bòhũ, ekè be xɔ̀sè, eye Mawu bù ì be e lè jɔ̀jɔɛa ŋuti ye.

¹⁴Ne, e nyi be àmè kèwo wɔ̀nà ɖo èsea jiawo kpò ye la xɔ̀ ènu kè Mawu fìãa, eŋuã, xɔ̀sèa trɔ zũ ènu gbalo, eye àjɔ̀gbè fìãfìãa cã mu gbà lè ye tèpe ò.

¹⁵Đo, èsea ye hɛ̃nà Mawu be àdɔ̀mèze vana. Vɔ̀a, àfi kè *èse mù lè òa, èse ji dàda cã mù nɔ̀nà funua ò.

¹⁶Nène a, to xɔ̀sè ji ye wo nyina ècrɔ̃ɖùtɔ, àleke be, to màje jia, àjɔ̀gbè fìãfìã ne jè na Abràham be jìjimèviwo kpata, mu nyi na àmè kèwo le wɔ̀ ɖo èsea jiawo kpò ò, vɔ̀a na àmè kèwo be yèwo ɖo Abràham, mia kpata mia tɔ be xɔ̀sèa.

¹⁷Vɔ̀a, wo ŋlɔ̀ ɛ̀ ɖɛ be: “Mù sɔ wò ɖo ètɔ na dùkɔ̃ fuuwo.” E nyi mia tɔ, lè Mawu kè ji be xɔ̀sèa be ŋùmè, Mawu kè gbɔ̀nà àgbè àmè kukuwo, eye be yɔna ènu kèwo mu lè sã òawo, va ànyi.

¹⁸Ekè ŋùɖo ɖekpe mu gbà lè ò cã a, Abràham ya gbà ɖo ŋùɖo lè xɔ̀sè mè, eye be zũ dùkɔ̃ fuuwo be ètɔ kòkòkò, sìgbè àlekè wo gblɔ̃ ɛ̀ na ɛ̀a nène be: “Nène a ye jìjimèvi wòwo la sùgbɔ ɖehòmèkua yeŋu!”

¹⁹Togbɔ be e nya be yebe ŋutilã gbɔjɔ, wàlɛbɛ kè be xɔ̀ sìgbè èpè èkà èvè takpo nène, eye Sarà be àdɔ̀ cã ku vɔ̀ gãkea, mu gbɔjɔ lè xɔ̀sè mè ò.

²⁰Mu do àɖìka lè ye ɖokoe mè, so ènu kè Mawu fìã na ɛ̀a ŋuti, ne bèa va nyi be mu xɔ̀ Mawu ji sè ò. Vɔ̀ bòhũa, yebe xɔ̀sè gbà lo goŋu-goŋu kpe è, eye be kafu Mawu.

²¹E kã ɖo e ji nyuɛ̃ ɖe be Mawu la wɔ̀ ɖo yebe àjɔ̀gbè fìãfìã ji màgblà-màgblà.

²²Đo yebe xɔ̀sè ŋutia, Mawu bù ì be e lè jɔ̀jɔɛ.

²³Ekè wo gblɔ̃ be: “Mawu bù ì be e lè jɔ̀jɔɛa”, mu nyi Abràham ɖèka ŋuti kpò wo gblɔ̃ ɛ̀ ɖo ò.

²⁴Wo gblɔ̃ ɛ̀ ɖo miawo cã mia ŋuti. Mi, àmè kèwo xɔ̀ Mawu, àmè kè fɔ̃ Yesù, mia Tɔhonɔ̀ so àmè kukuwo dòmèa ji sèawo. Nène a ke, wo la bù miawo cã be mi lè jɔ̀jɔɛ.

²⁵Miabe ènuvuɛ̃wo ŋuti ye wo wù ì ɖo, eye Mawu fɔ̃ ɛ̀ ɖo àgbè, àleke be woa bù mi be mi lè jɔ̀jɔɛ.