Read gen Romàtɔwo 5 Bible Online

Romàtɔwo 5 - gen bible

Romàtɔwo 5

¹Fifìa, ekè wo ɖè kunù na mi, to xɔ̀sè mèa, ŋuti fàfa va mia kudo Mawu dòmè, to mia Tɔhonɔ̀ Yesù Kristò ji.

²E ye ji mi to, kpɔ èmɔnu, to xɔ̀sè mè, ɖo màje kè mè mi lè fifìa, eye mi le yigò lè Mawu be gogoa be ŋùɖo mè.

³Wu ekèa, mi gbà yinagò lè èfũwo mè cã, ɖo, mi nya be èfũ nana mi kplana vevedonu;

⁴vevedonu nana ànùkua lè vevesèse mè; ànùkua lè vevesèse mè hɛ̃nà ŋùɖo vana;

⁵eye ŋùɖo mu dona ŋùkpɛ̃ àmè ò, ɖo Mawu kɔ̀ yebe lɔ̃lɔ̃ ɖo miabe èjìwo mè, to Gbɔ̃gbɔ̃ Kɔ̀kɔ̀ɛ kè be na mia ji.

⁶Nyàwo, wàlɛbɛ kè hɔ̃hlɔ̃ ɖekpe mu lè mia si òa, Kristò ku ɖo mi, àmè màvɔ̃ Mawuwo ta, lè hùenu kè Mawu ɖo ɖɛa ji.

⁷Đo e la sɛ̃ŋu ŋutɔ be àmè ɖe ne lɔ̃ be yèa ku ɖo àmè jɔ̀jɔɛ ta. Èta mu nyɔ òa, àmè ɖe la dojì, la ku ɖo àdɔ̀mènyuɛ̃wɔ̀tɔ ta.

⁸Vɔ̀a, èmɔ kèa ji ye Mawu ya to, ɖè lɔ̃lɔ̃ kè be ɖo na mia fiɔ: mi kpɔ̀tɔ̀ nyi èvuɛ̃wɔ̀tɔwo, gãke Kristò ku ɖo mia ta.

⁹To yebe vɔsa jia, e sɔ mi wɔ̀ àmè jɔ̀jɔɛwo lè Mawu be ŋùkɔ̀. Wu nènea, e la hlùɛ̃ mi gã so Mawu be àdɔ̀mèzea mè.

¹⁰Đo, ne, wàlɛbɛ kè mi nyi Mawu be kɛ̃tɔwoa, ye Èvia be èku va jrà mia dòmè ɖoa, sɔ wu ekèa, kè wo jrà mia dòmè ɖo vɔ̀a, Mawu la gbà sɔ Èvia be àgbè la hlùɛ̃ mi gã.

¹¹Gbà sɔ wua, mi le yigò lè Mawu mè, to mia Tɔhonɔ̀ Yesù Kristò, àmè kè va jrà mia kudo Mawu dòmè ɖo fifìa ji.

¹²Ekèa ŋuti ye, sìgbè leke ènuvuɛ̃ to àmè ɖèka ji, va xixea mè, eye to ènuvuɛ̃ mèa, èku vaa, nènea, èku va àmèwo kpata ji, ɖo, àmè sia àmè wɔ̀ èvuɛ̃.

¹³Lè nyàwototo mèa, ènuvuɛ̃ lè xixea mè, keŋu gbɔ̀xue Mosè be èsea va. Ne èse mu lè òa, wo mu bùnà ènu ɖekpe be e nyi ènuvuɛ̃ ò,

¹⁴co gãke, so Adàm ji, kaka va Mosè jia, èku ɖùfìɔ. Èku be ŋusɛ̃ jè àmè kèwo mu wɔ̀ ènuvuɛ̃ sìgbè Adàm kè dà Mawu be èsea ji òa cã ji. Adàm nyi àmè kè gbãnà a be ŋùfɛ̃.

¹⁵Vɔ̀ àgɔ̀jèjea mu sɔ̀ ku màje kè Mawu nana ò. Đo, ne, to àmè ɖèka be àgɔ̀jèje mèa, àmè sùgbɔ kua, Mawu be màje, màje kè be na mi to àmè ɖèka kè le nyi Yesù Kristò jia, kɔ̀ ɖo àmè sùgbɔ ji.

¹⁶Eye Mawu be ènu nana a, mu lè sìgbè ènu kè àmè ɖèka be ènuvuɛ̃ hɛ̃ vaa nène ò. Nyàwo ye, so àmè ɖèka be ènuvuɛ̃ mèa, kòjoɖoɖoa, trɔ zũ hùɛgbledo; vɔ̀, so àmè sùgbɔ be àgɔ̀jèje mèa, màje be ènu nana a, trɔ zũ kunù ɖèɖe.

¹⁷Đo, ne to àmè ɖèka ji, to àmè ɖèka pɛɛ be ènuvuɛ̃ jia, èku va ɖùfìɔa, wu nènea, to Yesù Kristò ɖèka jia, àmè kèwo kpata xɔ̀ màje kudo jɔ̀jɔɛnyinyi be ènu nana lè gbɔsùsu mèawo la ɖùfìɔ lè àgbè mè, to Yesù Kristò ɖèka ŋua ke ji.

¹⁸Ye ŋuti fifìa, ne to àmè ɖèka be àgɔ̀jèje mè, hùɛgbledo va àmè sia àmè jia, nènea ke ye, to àmè ɖèka be jɔ̀jɔɛwɔ̀wɔ jia, àmè sia àmè kpɔ kunù ɖèɖe kè nana àgbè a.

¹⁹Nène a ke ye, sìgbè àlekè, to àmè ɖèka be èto tìtri mèa, àmè sùgbɔ trɔ zũ ènuvuɛ̃wɔ̀tɔwoa, nènea ke ye, to àmè ɖèka be ètonu sèse mèa, àmè sùgbɔ trɔ zũ àmè jɔ̀jɔɛwo.

²⁰Èsea ya va, ne ènuvuɛ̃ wɔ̀wɔ ne yì e ji. Vɔ̀a, àfi kè ye èvuɛ̃ wɔ̀wɔ lè yì e ji lèa, màje gbà sùnàgbɔ wu,

²¹àleke be, sìgbè àlekè èvuɛ̃ wɔ̀wɔ ɖùfìɔ na èkua, nènea ke, to jɔ̀jɔɛwɔ̀wɔ mèa, màje ɖùfìɔ na àgbè mà-vɔ, to mia Tɔhonɔ̀ Yesù Kristò ji.