Read gen Romàtɔwo 7 Bible Online

Romàtɔwo 7 - gen bible

Romàtɔwo 7

¹Nɔ̀viwo, mù le pò nupo na mì, ɖo mì nya èsea, mì mu nya be: wàlɛbɛ kè àgbètɔ lè àgbè a kpò ye èsea ɖo ŋusɛ̃ ɖo e jia?

²Nène a ke ye *èse blana nyɔ̃nù kè ɖè ŋusùa ɖo èsrɔ̃aa ŋuti, kaka kè be gbe lè àgbè kpòa. Vɔ̀a, ne ŋusùa kua, èse kè bla nyɔ̃nùa be èkàa cã sò.

³Ye ŋuti, ne wàlɛbɛ kè ŋusùa lè àgbè a, nyɔ̃nùa le yì ŋusù bu gbɔa, wo la yɔ ɛ̀ be gbòlòwɔ̀tɔ. Vɔ̀ ne èsrɔ̃a kua, e vò lè èsea si. Eye, ne e trɔ zũ àmè bu be èsrɔ̃a, mu wɔ̀ gbòlò ò.

⁴Nɔ̀vi nyèwo, nènea ke ye mìawo cã, mì ku lè èsea mè, to Kristò be ŋutilãa ji, ne mìa trɔ zũ àmè bu, àmè kè fɔ̃ so àmè kùkuwo dòmèa tɔ̀, ne mìa sɛ̃ èku na Mawu.

⁵Nyàwo be nyi be, wàlɛbɛ kè mi nɔ̀ àgbè lè ŋutilã mèa, èvuɛ̃wo be èjrowo sɔna èsea wɔ̀nà èdɔ lè miabe ŋutinuwo mè, àleke be mi sɛ̃naku na èku.

⁶Vɔ̀ fifìa, ekè mi ku lè ènu kè le mi goŋu ɖo ègà mè sãa mè vɔ̀a, wo ɖè mi to lè èsea si mè, àleke be, fifìa, mi le sumɔ lè àgbè yeye kè Gbɔ̃gbɔ̃ a na a mè, mu gbà nyi lè ŋɔ̀ŋlɔ̃ xoxo kè lè xoma a mèa mè ò.

⁷Eŋuã, leke mi la jo gblɔ̃ ò? Èsea ɖe, èvuɛ̃ ye be jo nyia? Gbèɖe! Vɔ̀a, èsea ji kpò ye mù jèsi èvuɛ̃ to. Nène a ye nyè mu la jèsi ŋùbia, ne èsea mu gblɔ̃ be: “Èwò, mù gbà bìaŋù ò!”

⁸Èmɔ kèa ji èsea to, hɛ̃ ŋùbia vòvòwo va ɖo mè nyè, to *èse dodo ji. Đo a, èse mà nɔ̀ ànyia, èvuɛ̃ nyi ènu kuku.

⁹Sãa, mù nɔ̀ àgbè èse mà ɖo. Vɔ̀a, kè èse dodo vaa, èvuɛ̃ gbɔ̀ àgbè,

¹⁰eye nyè yaa, mù ku. Èse kè ɖo la na àgbè a, ye trɔ zũ èku na mù.

¹¹Eye, kè èvuɛ̃ kpɔ èmɔnu, blè mù to *èse dodo jia, e gbà to e ji hɛ̃ èku va na mù.

¹²Ye ŋutia, èsea lè kɔ̀kɔ̀ɛ, èse dodoa cã lè kɔ̀kɔ̀ɛ, e lè jɔ̀jɔɛ, eye be nyɔ.

¹³Eŋuã, ènu kè nyɔa jo trɔ zũ èku na mùa? Aò! Gbèɖe. Vɔ̀a, ènuvuɛ̃ ye zũ èkua: e to ènu kè nyɔa ji, hɛ̃ èku va na mù, àleke be ne ze sìgbè èvuɛ̃ nène, nènea ye èvuɛ̃ to èse dodo ji gbà nyràku wu!

¹⁴Mi nya be èsea, gbɔ̃gbɔ̃mènu be nyi. Vɔ̀a, ènyè yaa, ŋutilãme ye mù nyi, eye wo sà mù sìgbè kluvi nène do èvuɛ̃.

¹⁵Mù dã èta na ènu kè mù le wɔ̀a. Nyè mu teŋu wɔ̀nà ènu kè mù jro a ò, vɔ̀a ènu kè mù crìa kpò mù wɔ̀nà.

¹⁶Ne ènu kè nyè mu jro òa ye mù wɔ̀nàa, eŋuã, mù lɔ̃ ɖo èsea ji, eye mù kpɔ be e nyɔ.

¹⁷Eŋuã, mu gbà nyi ènyè ye le wɔ̀ ènua ò, vɔ̀a, èvuɛ̃ kè lè mè nyèa ye.

¹⁸Đo mù nyã be, lè mè nyèa, ye gɔ̃mè ye nyi be lè ŋutilã nyè mèa, ènu nyuɛ̃ ɖekpe mu lè ò. Mù ɖo èjro na ènyuɛ̃ wɔ̀wɔ, vɔ̀a, nyè mu ɖo yebe ŋusɛ̃ ò.

¹⁹Ekè e nyi be ènu nyuɛ̃ kè mù jrona a, nyè mu wɔ̀nà ɛ̀ òa, èvuɛ̃ kè nyè mu jròna òa ye mù wɔ̀nà.

²⁰Ne ènu kè nyè mu lɔ̃nà ò, ye mù wɔ̀nàa, mu nyi ènyè ye wɔ̀nà ɛ̀ ò, vɔ̀a èvuɛ̃ kè lè mè nyèa ye wɔ̀nà ɛ̀.

²¹Èse kè mù kpɔa ye nyi be: ne mù ji be ma wɔ̀ ènyuɛ̃a, èvuɛ̃a kpò mù teŋu wɔ̀nà.

²²Èjì nyè kpɔna, jìjɔɛ ɖo Mawu be èsea ŋuti.

²³Vɔ̀a mù kpɔ be lè ŋutinu nyèwo mèa, èse bu lè, kè le wɔ̀ àvũ ku èse kè yomè jìjigbè nyè lèa. E le wɔ̀ be mù nyi, èvuɛ̃ be èse kè lè ŋutinu nyèwo mèa be gàmènɔ̀tɔ.

²⁴Aò! Àpe ènu wɔ̀ ŋuzĩzĩ loo ò! Àmè kɛ ye la xɔ̀ mù lè èku be ŋutilã nyè kèa si ò?

²⁵Àkpe ye jè na Mawu, to Yesù Kristò, mia Tɔhonɔ̀ ji! Eŋuã, nyè ɖèkaa, ènunya nyè sɔ mù ɖo Mawu be èsea gɔ̃mè, vɔ̀a, ŋutilã gbɔjɔ nyèa sɔ mù ɖo èvuɛ̃ be èse gɔ̃mè.