Read gen Romàtɔwo 8 Bible Online

Romàtɔwo 8 - gen bible

Romàtɔwo 8

¹So fifìa, hùɛgbledo ɖekpe mu gbà lè na àmè kèwo lè Yesù Kristò mè ò.

²Đo Gbɔ̃gbɔ̃ Kɔ̀kɔ̀ɛ be *èse kè nana àgbè lè Yesù Kristò mèa, na mi vò lè èvuɛ̃ kudo èku be èsea si.

³Ènu kè glo èsea, wàlɛbɛ kè ŋutilã xɔ̀ ŋusɛ̃ lè e sia, Mawu ya wɔ̀ ɛ̀. Đo ènuvuɛ̃ ŋutia, E dɔ̃ ye ŋutɔ Èvia ɖoɖa, be sɔ miabe èvuɛ̃ be ŋutilãa be nɔ̀nɔmè. E gblehùɛ do ènuvuɛ̃ lè ŋutilã mè,

⁴ne jɔ̀jɔɛnyinyi kè jè na èsea, bèa zɔ̃ sù lè mi, àmè kèwo mu zɔ̃nà lè ŋutilã be èse gɔ̃mè ò, vɔ̀ lè Gbɔ̃gbɔ̃ Kɔ̀kɔ̀ɛ tɔ̀a mè.

⁵Nyàwo ye be nyi be, àmè kèwo lè ŋutilã be èse gɔ̃mèawo jènà ŋutilã be ènuwo yomè, vɔ̀a àmè kèwo lè Gbɔ̃gbɔ̃ Kɔ̀kɔ̀ɛ a be *èse gɔ̃mèawo jènà Gbɔ̃gbɔ̃ a be ènuwo yomè.

⁶Ŋutilãnuwo yomè jèje a nyi èku, vɔ̀, Gbɔ̃gbɔ̃ Kɔ̀kɔ̀ɛ mè-nuwo yomè jèje a nyi àgbè kudo fàfa.

⁷Đo ŋutilã be èjrowo nyi àglajèje ɖo Mawu ŋuti; mu lɔ̃nà bɔ̀bɔ̀nà ɖo Mawu be èse gɔ̃mè ò. Mu la teŋu ì ŋutɔ cã ò.

⁸Lè ŋutilã be èse gɔ̃mèa, àmè ɖekpe mu la teŋu jè Mawu be ŋùmè ò.

⁹Vɔ̀a, mìawo yaa, mì mu lè ŋutilã be èse gɔ̃mè ò, kè[1] Mawu be Gbɔ̃gbɔ̃ lè mìa mèa. Mawu be Gbɔ̃gbɔ̃ be èse gɔ̃mè ye mì lè. Ne àmè ɖe mu ɖo Kristò be Gbɔ̃gbɔ̃ òa, àmèa mu nyi Kristòtɔ̀ ò.

¹⁰Ne Kristò lè mìa mèa, nyàwo be nyi be mìabe ŋutilãa la ku ɖo ènuvuɛ̃ ŋuti, vɔ̀a Gbɔ̃gbɔ̃ Kɔ̀kɔ̀ɛ a ye nyi mìabe àgbè ɖo jɔ̀jɔɛ nyinyi ŋuti.

¹¹Ne Mawu kè fɔ̃ Yesù Kristò so èkuwodea be Gbɔ̃gbɔ̃ lè mìa mèa, Mawu kè fɔ̃ Yesù Kristò so àmè kukuwo dòmèa la na àgbè mìabe ŋutilã kukuwo, to yebe Gbɔ̃gbɔ̃ kè lè mìa mèa ji.

¹²Ye ŋutia, nɔ̀viwo, èfɛ̃ lè mia ŋuti; vɔ̀ mi mu ɖù èfɛ̃ do ŋutilã, ne mia nɔ nɔ̀ àgbè lè ŋutilã mè ò.

¹³Đo ne mì lè àgbè lè ŋutilã mèa, mì la ku. Vɔ̀a ne, to Gbɔ̃gbɔ̃ a be ŋusɛ̃ ji, mì wù ŋutilã be nuwɔ̀nàawoa, mì la nɔ̀ àgbè.

¹⁴Àmè kèwo Mawu be Gbɔ̃gbɔ̃ le kplɔ̀awo ye nyi Mawu be èviwo.

¹⁵Mu nyi Gbɔ̃gbɔ̃ kè la sɔ mì wɔ̀ kluviwo, la trɔ sɔ vɔ̃vɔ̃ va mìa mèa ye mì xɔ̀ ò. Vɔ̀a Gbɔ̃gbɔ̃ kè sɔ mì wɔ̀ èviwo, eye be le na mì ŋusɛ̃, be mia do àpa be: “Abà, Àta!”

¹⁶Gbɔ̃gbɔ̃ kèa ŋutɔ ɖù ɖase na miabe gbɔ̃gbɔ̃ be, mi nyi Mawu be èviwo.

¹⁷Ne mi nyi èviwoa, mi nyi ècrɔ̃ɖùtɔwo cã. Mawu be ècrɔ̃ɖùtɔwo, ècrɔ̃ɖùtɔwo kudo Kristò, ɖo ne mi ɖù àyà kudo èa, mi la kpɔ gomè lè yebe gogoa cã mè.

¹⁸Mù susu be xixe kèa mè be àyàɖùɖuwo mu sù ne woa sɔ wo sɔ̀ ku gogo kè wo la va ɖè fiɔ lè mia mèa ò.

¹⁹Đo a, Mawu be ènuɖoɖowo le nɔ̀tè veve ɖe kpɔ Mawu be èviwo be ɖèɖèfiɔ,

²⁰ekè wo sɔ ènuɖoɖoawo ɖo ènumàɖìnuwo be èse gɔ̃mè, mu nyi lè ènuɖoɖoawo ŋutɔ be lɔ̃lɔ̃ nu ò, vɔ̀a, lè àmè kè do wo àsia be ŋusɛ̃ mè, ènuɖoɖoawo cã le kpɔ èmɔ,

²¹ɖo wo la ɖè woawo cã to lè gbegble be kluvi nyinyi mè, ne woawo cã woa kpɔ mamã lè Mawu be èviwo be vòvò be gogo mè.

²²Ɛ̃ mi nya ɛ̀ be Mawu be ènuɖoɖowo kpata le ŋɛ̃, eye wo le le èku, kaka va na fifì.

²³Mu nyi woawo ɖèɖe kpò ye ò: mi, àmè kèwo ɖo Gbɔ̃gbɔ̃ Kɔ̀kɔ̀ɛ be èkusɛ̃sɛ̃ cucugbã tɔ̀awo cã, mi le ŋɛ̃ lè miabe èjì mè, le nɔ̀tè kpɔ miabe èvinyinyi, miabe ŋutilã be hlùɛ̃gã.

²⁴Đo a, wo hlùɛ̃ mi gã, gãkea lè ŋùɖo mè ye. Vɔ̀a, ne wo le kpɔ ènu kè wo lè ŋùɖo mè naa, mu gbà nyi be wo lè ŋùɖo mè ke ò. Ènu kè wo le kpɔa, àleke wo la gbà teŋu nɔ̀ ŋùɖo mè na ɛ̀ ɖo ò?

²⁵Vɔ̀a, ne mi le ɖoŋù ɖo ènu kè mi mu le kpɔ òa ŋutia, mi le nɔ̀tè kpɔ ɛ̀ kudo veve do ènu.

²⁶Nène a ke ye Gbɔ̃gbɔ̃ Kɔ̀kɔ̀ɛ a cã va dona àlɔ̀ mi, lè miabe gbɔ̀jɔ̀gbɔjɔ mè, ɖo, mi mu nya àlekè mi ɖo la nɔ̀ fãkue ɖo ò. Gbɔ̃gbɔ̃ a ŋutɔ blìbɔ̀nà ɖo mia ta kudo àlenana kè wo mu teŋu gblɔ̃ òa.

²⁷Eye àmè kè kãnà àmèwo kpata be èjì mè kpɔa, nya Gbɔ̃gbɔ̃ Kɔ̀kɔ̀ɛ a be susu, ɖo Gbɔ̃gbɔ̃ a blìbɔ̀nà ɖo àɖèsãmewo ta, zɔ̃ ɖo Mawu be èjro ji.

²⁸Mi gbà nya cã be ènu sia ènu hɛ̃nà ènyuɛ̃ vana na àmè kèwo lɔ̃nà Mawu a, àmè kèwo be yɔ, zɔ̃ ɖo yebe ɖoɖo nua.

²⁹Àmè kèwo bè jèsi ɖɛawo, e cã wo ɖɛ ne woa nɔ̀ sìgbè Èvia be ŋùfɛ̃ nène, ne bèa nyi ŋùkɔ̀gbevi na nɔ̀vi sùgbɔ.

³⁰Àmè kèwo be cã ɖɛawo ye be gbà yɔ. Àmè kèwo be yɔawo ye be gbà ɖè kunù na. Àmè kèwo be ɖè kunù naawo ye be gbà na gogo.

³¹Ènyà kɛ ye mi la gbà gblɔ̃ ò? Ne Mawu lè mia jia, àmè kɛ ye la sitè ɖo mia ŋuti ò?

³²Àmè kè mu gbe ye ŋutɔ be Èvi sɔsɔ na ò, vɔ̀ e sɔ ɛ̀ na fàa, ɖo mia kpata mia taa, leke wɔ̀ ye, mu la sɔ ènuwo keŋu kpe ɖo e ŋuti na mi ò?

³³Àmè kɛ ye la dohùɛ do Mawu be àmè cãcãwo ò? Mawu ye ɖènà kunù!

³⁴Àmè kɛ ye la gblehùɛ do wo ò? Yesù Kristò ku, wu ekèa, e fɔ̃ so èku, eye be lè Mawu be ɖùsi mè, le blìbɔ̀ ɖo mia ta[2]!

³⁵Àmè kɛ ye la klã mi jo lè Kristò be lɔ̃lɔ̃ a ŋuti ò? Èfũkpekpe, àlo veve sèse ye à? Yomètĩtĩ àlo àdɔ̀ wù àmè ye à? Èhiã, àfɔ̀ku àlo èku ye à?

³⁶Sìgbè lekè wo ŋlɔ̀ ɛ̀ ɖɛ be: “Èwò ŋuti ye wo le wù mi ɖo, so ŋùkèkè yì ŋùkèkè. Wo bù mi kpò sìgbè àlɛ̃ kèwo wo kplɔ̀ yìnà wùwùgbea nène.”

³⁷Lè ekèawo keŋu mèa, mi wu èjiɖùtɔwo ŋutɔ cã, to àmè kè lɔ̃ mia ji.

³⁸Ɛ̃ɛ, mù kã ɖo e ji be èku, àlo àgbè, àtikplɔtɔwo, àlo jiɖùɖuwo, ènu kèwo lè fifìawo, àlo ekèwo la ɖɛ vaawo, ŋusɛ̃wo,

³⁹ekèwo lè èji hũi, àlo ekèwo lè ègũwo be ètù mè, àlo ènuɖoɖo buwo, ènu ɖekpekpe mu la teŋu klã mi jo lè Mawu be lɔ̃lɔ̃ kè be ɖè fiɔ lè mia Tɔhonɔ̀ Yesù Kristò mèa ŋuti ò!