Read gen 1Kòrɛ̃tòtɔwo 1 Bible Online

1Kòrɛ̃tòtɔwo 1 - gen bible

1Kòrɛ̃tòtɔwo 1

¹Paolò, àmè kè wo yɔ to Mawu be èjro ji, ne bèa nyi Yesù Kristò be *àmèdɔ̃dɔ̃a, ku nɔ̀vi Sɔstɛn ye le ŋlɔ̀ xoma kèa.

²Mi le ŋlɔ̀ ɛ̀ ɖoɖa Mawu be èhabɔ̀bɔ kè lè Kòrɛ̃tò, ku àmè kèwo ŋuti wo kɔ̀ lè Kristò Yesù mèawo, àmè kèwo wo yɔ be woa nyi àɖèsãwo ku àmè kèwo kpata fãnà yɔ mia Tɔhonɔ̀ Yesù Kristò be nyikɔ lè àfi sia àfia. Yesù kèa nyi mia ku woawo be Tɔhonɔ̀.

³Mawu, mia Tɔ, ku mia Tɔhonɔ̀ Yesù Kristò ne na mì màje ku fàfa.

⁴Mù dona àkpe na Mawu nyè, wè sia wè, ɖo mìa ta, ɖo màje kè wo na mì lè Kristò Yesù mèa ŋuti.

⁵Ekè mì lè ɖèka wɔ̀wɔ mè ku Kristò, mì jè àdɔ̀kù, to ènu nana sùgbɔ mè, ènupòpo be ènu nana kudo ènunya be ènu nana mè.

⁶Đase kè wo ɖù so Kristò ŋuti na mìa, likè lè mìa dòmè.

⁷Àleke be Mawu be ènu nana ɖekpe ŋutɔ mu gbà hùedo mì, àmè kèwo lè tɔtè kpɔ mia Tɔhonɔ̀ Yesù Kristò be ɖèɖèfiɔ zãgbè ò.

⁸Ye ŋutɔ ke ye la likè mì kaka yì vɔ̀vɔnu, ne wo mu gbà kã ŋùmè na mì lè mia Tɔhonɔ̀ Yesù Kristò be àzã gbè ò.

⁹Mawu kè yɔ mì ne mìa nɔ̀ ɖèka wɔ̀wɔ mè ku Èvia Yesù Kristò, mia Tɔhonɔ̀a, nyi ànùkuame.

¹⁰Mù le pò ètoɖo na mì, nɔ̀viwo, lè mia Tɔhonɔ̀ Yesù Kristò be nyikɔ mè, be mìa nɔ̀ gbèkpli-gbèkpli mè, eye màmã mu gbà nɔ̀ mìa dòmè ò. Mì a nɔ̀ ɖèka wɔ̀wɔ àdodoe mè, mìabe ènuwɔ̀wɔ ne nyi lè susu ɖèka mè.

¹¹Nyàwo ye be nyi be nɔ̀vi Kloe be àxomètɔwo na mù nyã be, àjrè lè mìa dòmè.

¹²Ye gɔ̃mè ye le nyi be: le mìa dòmè a, àmè ɖe gblɔ̃nà be: “Ènyè yaa, Paolò tɔ̀ mù nyi.” Àmè bu be: “Ènyè yaa, Apolòs tɔ̀ mù nyi.” Àmè bu cã be: “Ènyè yaa, Kefàs tɔ̀ mù nyi.” Eye àmè bu cã be: “Ènyè yaa, Kristò tɔ̀ mù nyi!”

¹³Wo ma Kristò a ye a? Paolò ye wo ka ɖo àtisòga ŋuti na mì a? Àlo, Paolò be nyikɔ mè wo lè mawusi na mì lè a?

¹⁴Mù le do àkpe be nyè mu lè mawusi na mìa dòmètɔ ɖe, tovò na Krispò ku Gayò ò.

¹⁵Nène a, àmè ɖekpe mu la teŋu gblɔ̃, lè mìa dòmè be wo lè mawusi na yè, lè Paolò be nyikɔ mè ò.

¹⁶Sɔ kpe è a, mù ɖoŋù be mù lè mawusi na Stefanɔ̀ be àxuedo a. Tovò na àmè kèawo a, nyè mu gbà lè mawusi na àmè ɖekpe ò.

¹⁷Đo Kristò mu dɔ̃ mù ɖoɖa be ma lè mawusi na àmè ò. Bòhũ a, ne ma do Àŋɛ̀nyuɛ̃ a ŋuti ye. Vɔ̀ a, nyè mu gbà do è ku àgbètɔ be ènunyã, ne bè a va ɖè Kristò be èku lè àtisòga ŋuti be ŋusɛ̃ kpɔ̀tɔ̀ ò.

¹⁸Nène a Kristò be èku lè àtisòga ŋuti be àŋɛ̀a nyi àɖàhùa na àmè kèwo le crɔ̃a; vɔ̀a, na mi, àmè kèwo wo hlùɛ̃gãa, Mawu be ŋusɛ̃ ye be nyi.

¹⁹Wo ŋlɔ̀ ɛ̀ ɖɛ be: “Mù la crɔ̃ ènunyatɔwo be ènunyaa, eye mù la gũ èta na ènugɔ̃mèsètɔwo be àyè.”

²⁰Fikɛ ye àmè nya ènua lè ò? Fikɛ ye èsenyatɔa lè ò? Fikɛ àmè kè hɛ̃nà hùenu kèa be ènyàwo lè ò? Mawu ɖè è fiɔ be xixe kèa be ènunyaa, àɖàhùa ye be nyi!

²¹Đo xixea ku yebe ènunyaa mu xɔ̀ Mawu be ènunya ji sè ò. Ye ŋutia, e jè ŋùmè na Mawu be bèa hlùɛ̃ àmè kèwo xɔ̀sèawo gã, to àŋɛ̀ kèa, kè ɖì sùkunɔ̀ be ènyàa ji.

²²Đo Yudàviwo le biɔ jèsìdo; Grikwo le ji ènunya;

²³vɔ̀a miawo yaa, mi lè do Kristò kè wo ka ɖo àti ŋutia be àŋɛ̀. Àŋɛ̃ kèa nyi àfɔ̀klɛ̃nu na Yudàviwo, vɔ̀ nyi àɖàhùa na àmè kèwo mu nya Mawu ò a.

²⁴Vɔ̀ na àmè kèwo Mawu yɔa, Yudàvi àlo Grikwoa, Kristò nyi Mawu be ŋusɛ̃, kudo Mawu be ènunya.

²⁵Đo a, ènu kè la ze sìgbè àɖàhùa so Mawu gbɔa, ènunya lè e mè wu àgbètɔ be ènunya, eye ènu kè la ze lè Mawu gbɔ sìgbè gbɔ̀jɔ̀gbɔjɔ nènea, sɛ̃ŋu wu àgbètɔwo be ŋusɛ̃.

²⁶Nɔ̀viwo, mì kpɔ mì, àmè kèwo wo yɔa dòmè: sɔ zɔ̃ ɖo ŋutilã jia, ènunyatɔ, àlo ŋusɛ̃tɔ, àlo hùɛ̃yi* sùgbɔ mu lè mìa dòmè ò.

²⁷Vɔ̀ Mawu cã ènu kè àgbètɔ kpɔ be e nyi àɖàhùaa sɔ do ŋùkpɛ̃ ènunyatɔwo. Mawu cã ènu kè àgbètɔ kpɔ be e gbɔjɔa sɔ do ŋùkpɛ̃ àmè sɛ̃ŋuwo.

²⁸Mawu cã ènu kè xixea le kpɔ be ènyi ènu ma ɖì ènua, kè wo crìa, ènu kè nyi ènu gbalo lè yebe ŋùmèa, sɔ gbã ènu kè xixea le kpɔ be e nyi ènu jɔ̀ ènua.

²⁹E wɔ̀ ekèa ne àmè ɖe mu gbà kɔ ye ɖokoe yìji lè Mawu be ŋùmè ò.

³⁰Mawu ye na be mi nyi ɖèka lè Kristò Yesù, àmè kè be sɔ wɔ̀ miabe ènunyaa, àmè kè be sɔ wɔ̀ mi, àmè jɔ̀jɔɛwo kudo àmè kɔ̀kɔ̀ɛwo. Mi gbà nyi àmè kèwo wo hlùɛ̃gãa.

³¹Eye ŋuti, sìgbè àlekè wo ŋlɔ̀ ɛ̀ ɖɛ nènea: “Àmè kè jro be ye à goa, ne go lè èdɔ kè Tɔhonɔ̀ wɔ̀a mè.”