Read gen 1Kòrɛ̃tòtɔwo 11 Bible Online

1Kòrɛ̃tòtɔwo 11 - gen bible

1Kòrɛ̃tòtɔwo 11

¹Mì nɔ srɔ̃ mù sìgbè lekè nyè cã mù srɔ̃na Kristò nène.

²Mù le kafu mì, be mì ɖona ŋùku ji nyè lè ènu sia ènu mè, eye mì le wɔ̀ ɖo ɖoɖo kèwo mù ɖo ànyi na mìawo ji.

³Vɔ̀a, mù jro be mìa nya be: Kristò ye nyi ŋusù sia ŋusù be ètatɔ; nyɔ̃nù be ètatɔ ye nyi èsrɔ̃a; eye Kristò be ètatɔ ye nyi Mawu.

⁴Ŋusù sia ŋusù kè le fãkue, àlo le ɖo Mawu be ègbè, eye be sɔ ènu cɔ̃ ètaa, le do ŋùkpɛ̃ yebe àpetɔ.

⁵Vɔ̀a, nyɔ̃nù kè le fãkue, àlo le gblɔ̃ Mawu be ènyà ɖɛ, eye mu sɔ ènu cɔ̃ èta òa, le do ŋùkpɛ̃ yebe àpetɔ, ɖoa, e lè tututu sìgbè e plɔ èta nène.

⁶Ne nyɔ̃nù mu cɔ̃ ènu èta òa, eŋuã ne kpà èɖà. Vɔ̀a, ne e wɔ̀ ŋùkpɛ̃ be nyɔ̃nù ne kpà èɖà, àlo ne plɔ ètaa, eŋuã ne sɔ ènu cɔ̃ èta.

⁷Ŋusù yaa, mu ɖo la sɔ ènu cɔ̃ èta ò, ɖo Mawu be ŋùfɛ̃ kudo yebe gogo be le nyi. Vɔ̀a nyɔ̃nù yaa, le nyi ŋusù be gogo.

⁸Đo wo mu ɖè ŋusù to lè nyɔ̃nù mè ò, vɔ̀a nyɔ̃nù ye wo ɖè to lè ŋusù mè.

⁹Eye wo mu ɖo ŋusù na nyɔ̃nù ò, vɔ̀a nyɔ̃nù ye wo ɖo na ŋusù.

¹⁰Ekèa ŋutia, e lè be, ɖo Mawu be àtikplɔtɔwo ŋutia, nyɔ̃nù ɖo la ɖo ŋusù, kè be ŋusɛ̃ gɔ̃mè be lèa, be jèsìdo ɖo èta.

¹¹Vɔ̀a, mu lè be woa klã nyɔ̃nù lè ŋusù ŋuti ò, nènea ke mu lè be woa klã ŋusù cã lè nyɔ̃nù ŋuti, lè Tɔhonɔ̀ be ŋùkɔ̀ ò.

¹²Đo ne wo ɖè nyɔ̃nù to lè ŋusù mèa, nyɔ̃nù ye jìnà ŋusù, eye ekèa kpata so Mawu gbɔ.

¹³Mìa ŋutɔwo mì bù ì kpɔ be, e sɔ̀gbè lè Mawu be ŋùmè be nyɔ̃nù ne fãkue, ekè mu la sɔ ènu cɔ̃ èta ò a?

¹⁴Jɔ̀jɔmè ŋutɔ cã mu le fiɔ mì be e nyi ŋùkpɛ̃ na ŋusù, be èɖà dìdì ne nɔ̀ èta na ɛ̀ òa?

¹⁵Vɔ̀a, e nyi bùbu na nyɔ̃nù, be èɖà dìdì ne cɔ̃ èta na ɛ̀.

¹⁶Ne àmè ɖe susu be yè la dɔ̃ ènyà kèa, ekèa wɔ̀wɔ mu lè mia be susu mè ò; mu lè Mawu be èhabɔ̀bɔwo cã mè ò.

¹⁷Lè ènu fiɔàmè kèawo mè yaa, nyè mu la kafu mì ò, ɖo mìabe bɔ̀bɔwo mu nana be mìa nyɔ wu ò, vɔ̀ bòhũa, wo le na be mìa nyrã wu.

¹⁸Jè ŋùkɔ̀a, mù le sè be, ne mì va bɔ̀ lè èhabɔ̀bɔa mèa, mamã nɔ̀nà mìa dòmè; eye mù xɔ̀ ɛ̀ sè, lè èmɔ ɖe nu.

¹⁹E lè be kãklã ɖewo ŋutɔ cã la jè mìa dòmè, àleke be woa kpɔ àmè kèwo teŋu ɖù tètèkpɔ kèa jiawo.

²⁰Ne mì bɔ̀a, mu nyi Tɔhonɔ̀ be ènu ɖùɖu ye mì ɖùnà ò.

²¹Đo àmè ɖekpekpe hlùɛ̃na do, ɖùnà ye ŋutɔ be ènu ɖùɖu, àleke be wàlɛbɛ kè àdɔ̀ le wù àmè ɖe a, àmè bu ya le nù àhà mu.

²²Àxuewo mu lè mìa si ne mìa ɖù, gbà nù lè wo mèa? Àlo mì le dovlo Mawu be èhabɔ̀bɔ, le na èŋù ne kpɛ̃ àmè kèwo si ènu ɖe mu lè ò a ye à? Nukɛ mù la gblɔ̃ na mì koŋu ò? Ma kafu mìa? Aò, lè ekèa mè yaa, nyè mu la kafu mì ò.

²³Đo, ènu kè Tɔhonɔ̀ fiɔ mù, eye nyè cã mù le fiɔ mìa ye nyi be: Tɔhonɔ̀ Yesù, lè èzã kè mè wo do è àsia, e sɔ kpɔ̃nɔ,

²⁴ekè be do àkpe ɖo e ji vɔ̀a, e kã ɛ̀, eye E gblɔ̃ be: “Ekèa ye nyi àpe ŋutilã, kè wo ɖè, sɔ na ɖo mìa taa. Mì nɔ wɔ̀ ekèa lè àpe ŋùɖo mè.”

²⁵Nène a ke, lè ènu ɖùɖua yomè a, e sɔ kogòa, eye be gblɔ̃ be: “Kogò kèa ye nyi *zòɖùɖu yeyea be kogò, ekè ji wo ɖo èkpe lè àpe èhũ mè. Mì nɔ wɔ̀ ekèa, wè sia wè, kè mì le nù ìa, lè àpe ŋùɖo mè.”

²⁶Đo gà ɖekpekpe gàmè kè mì le ɖù kpɔ̃nɔ kèa, eye mì le nù lè kogò kèa mèa, mì le do Tɔhonɔ̀ be èku be àŋɛ̀a, kaka na yebe vava.

²⁷Ye ŋutia, àmè kè le ɖù kpɔ̃nɔ kèa, eye be le nù lè Tɔhonɔ̀ be kogòa mè, lè èmɔ kè mu jè òa nua, jè àgɔ̀ do Tɔhonɔ̀ be ŋutilã kudo yebe èhũ.

²⁸Àmè sia àmè ne yì ye ɖokoe mè kpɔ nyuɛ̃ ɖe, gbɔ̀xue bèa ɖù kpɔ̃nɔ ŋua, ne bea nù lè kogò kèa mè.

²⁹Đo àmè kè mu bùnà Tɔhonɔ̀ be ŋutilãa ŋuti kpɔ nyuɛ̃ ɖe gbɔ̀xue le ɖù kpɔ̃nɔa, eye be le nù lè kogòa mè òa, le ɖù, eye be le nù ye ŋutɔ be hùɛgbledo, àlo kòjoɖoɖo.

³⁰Ènu kèa ŋuti, àmè sùgbɔ lè mìa dòmè gbɔjɔ, àmè sùgbɔ le le èdɔ̀, gbɔ̀xue àmè sùgbɔ cã ku.

³¹Ne mi yì mia ɖokoewo mè nyàwo a, wo mu la gbà ɖo kòjo na mi ò.

³²Nène a, nɔ̀viwo, ne Tɔhonɔ̀ ɖo kòjo kudo mia, e sɔ dɔ̃na èto na mi, sɔ jrànà mi ɖo, ne wo mu gbà gblehùɛ do mi kudo xixea ò.

³³Ye ŋutia, nɔ̀vi nyèwo, ne mì bɔ̀ na Tɔhonɔ̀ be ènu ɖùɖu kɔ̀kɔ̀ɛa, mì nɔ nɔ̀tè kpɔ mìa nɔ̀nɔwo.

³⁴Ne àdɔ̀ le wù àmè ɖe a, ne ɖù ènu lè àxomè, ne mì mu gbà bɔ̀ na hùɛgbledo ò. Sɔ kù ɖo ènu kpɔ̀tɛa ŋutia, ne mù vaa, mù la ɖo àɖàŋù na mì.