Read gen 1Kòrɛ̃tòtɔwo 12 Bible Online

1Kòrɛ̃tòtɔwo 12 - gen bible

1Kòrɛ̃tòtɔwo 12

¹Nɔ̀vi nyèwo, sɔ yì Gbɔ̃gbɔ̃ mè be ènu nanawo gomèa, nyè mu jro be mìa ci bòlìmè ò.

²Mì nya be wàlɛbɛ kè mì kpɔ̀tɔ̀ lè màxɔ̀sè mèa, wo kplɔ̀nà mì yìnà vòdu àmumuiwo gbɔ.

³Mù le ji be mìa nya be Mawu be Gbɔ̃gbɔ̃ mu la teŋu nɔ̀ àmè ɖe mè, eye be la gblɔ̃ be: “Kpɛ̃sɛ̃ ne ɖì Yesù ŋuti” ò. Eye àmè ɖe mu la teŋu gblɔ̃ be: “Yesù nyi Tɔhonɔ̀”, ne mu nyi, lè Gbɔ̃gbɔ̃ Kɔ̀kɔ̀ɛ mè ò.

⁴Màje be ènu nana hamè-hamè ye lè, vɔ̀a Gbɔ̃gbɔ̃ ɖèka ye nana wo.

⁵Dèvidɔ hamè-hamèwo ye lè, vɔ̀a Tɔhonɔ̀ ɖèka kpò ye le wɔ̀ èdɔawo.

⁶Èdɔ hamèhamè ye lè, vɔ̀a Mawu ɖèka kpò ye nana susu na èdɔawo wɔ̀wɔ lè àmèwo keŋu mè.

⁷Àmè ɖekpekpe xɔ̀nà Gbɔ̃gbɔ̃ a be ɖèɖè fiɔ, na àmèwo keŋu be ènyuɛ̃.

⁸Wo na àmè ɖe ènu nyãnyã be àŋɛ̀, to Gbɔ̃gbɔ̃ ɖèka ŋua ji, eye àmè bu yaa, ènu mè kùku be àŋɛ̀, to Gbɔ̃gbɔ̃ ɖèka ŋua ke ji.

⁹Wo na àmè ɖe, xɔ̀sè be ènu nanawo to Gbɔ̃gbɔ̃ ɖèkaa ŋua ji; wo na àmè bu, èdɔ̀ dàda be ènu nana, to Gbɔ̃gbɔ̃ ɖèka ŋua ke ji.

¹⁰Wo na àmè ɖe ŋùdãdɔ wɔ̀wɔ be ènu nana; àmè bu xɔ̀, mawunya be ènyàgblɔ̃ɖɛ, àmè bu cã xɔ̀ sijèje gbɔ̃gbɔ̃wo be ènu nana. Àmè ɖe xɔ̀ ègbè hamèhamèwo dodo, àmè bu cã, ègbèwo gɔ̃mèɖèɖe.

¹¹Vɔ̀ ekèawo kpataa, Gbɔ̃gbɔ̃ ɖèka kpò ye le wɔ̀ wo.

¹²Đo, sìgbè lekè ŋutilã nyi ɖèka, eye be ɖo ŋutinu sùgbɔ, eye ŋutinuwo keŋu wɔ̀ ŋutilã ɖèkaa, nènea ke ye Kristò cã lèa yeŋu.

¹³Đo wo lè mawusi na mia kpata lè Gbɔ̃gbɔ̃ ɖèka mè, ne mia nyi ŋutilã ɖèka, Yudàviwo àlo àmè kèwo mu nyi Yudàvi òawo, kluviwo, àlo àmè kèwo vòa.

¹⁴Đo ŋutilãa, mu nyi ŋutinu ɖèka ye wɔ̀ ɛ̀ ò; ŋutinuawo sùgbɔ.

¹⁵Ne àfɔ̀ gblɔ̃ be: “Ekè nyè mu nyi àlɔ̀ òa, nyè mu lè ŋutilã ŋuti ò a”, eŋuã la na be mu la nɔ̀ ŋutilã ŋuti ò a?

¹⁶Ne èto gblɔ̃ be: “Ekè nyè mu nyi ŋùkuvi òa, nyè mu nyi ŋutilã be ènu ɖe ò a”, eŋuã la na be mu la nɔ̀ ŋutilã ŋuti ò a?

¹⁷Ne ŋutilã keŋu nyi ŋùkuvia, leke mi la wɔ̀, la sè ènu ò? Ne ŋutilã keŋu nyi ètoa, leke mi la wɔ̀, la sè ènu be hɔ̃hɔ̃ɛ ò?

¹⁸Vɔ̀a, Mawu ɖo ŋutinuwo ɖo lãmè, zɔ̃ ɖo yebe èjro ji.

¹⁹Ne ŋutinu ɖèka kpò ye lèa, fikɛ ŋutilã bliboa la nɔ̀ ò?

²⁰Sìgbè lekè wo lè nènea, ŋutinu sùgbɔ ye lè, vɔ̀a, ŋutilã ɖèka kpò ye lè.

²¹Ŋùkuvi mu teŋu gblɔ̃ na àlɔ̀ be: “Nyè mu hiã wò ò”, àlo èta mu la teŋu gblɔ̃ na àfɔ̀wo be: “Nyè mu hiã mì ò”!

²²Bòhũa, ŋutinu kèwo wo kpɔna be wo gbɔjɔawo lè veveɖe.

²³Ŋutinu kèwo mi kpɔna be wo mu ɖo bùbu ɖe òawo ŋuti mi dona bùbu wu. Ekèwo mi kpɔna be wo mu kɔ̀ òawo ye mi lenabè na wu.

²⁴Miabe ŋutinu kèwo mi kpɔna be wo kɔ̀awo mu gbà hiã bùbu fuu ò. Vɔ̀a, Mawu ɖo ŋutilã ɖo ɖe be bùbu ne nɔ̀ ekèwo bùbu dɛ̃ wuawo ŋuti.

²⁵Nène a, màma mu lè ŋutilã mè ò, vɔ̀a ŋutinu vòvòvòwo kãmana na woa nɔ̀nɔwo ɖodu.

²⁶Ne ŋutinu ɖe le ɖù àyàa, kpɔ̀tɛawo sènà veve kudo è. Ne ŋutinu ɖe lè nyuɛ̃ ɖe a, kpɔ̀tɛawo kpɔna jìjɔɛ kudo è.

²⁷Fifìa, mì nyi Kristò be ŋutilã, eye mì gbà le nyi yebe ŋutinuwo ɖèka ɖèka.

²⁸Eye àmè kèwo Mawu ɖo ɖo èhabɔ̀bɔ mèawo ye nyi: cucugbã, *àmèdɔ̃dɔ̃wo, èvègɔ̃a, Mawu be gblɔ̃ɖɛtɔwo, ètɔ̃gɔ̃a, ènufiɔtɔwo; ekèawo yomè a, ŋùdãdɔwo be ènu nana, èdɔ̀ dàda be ènu nana, kpekpe ɖo àmè ŋuti be ènu nana, èdɔnu-nɔ̀nɔ be ènu nana, ku ègbè hamè-hamèwo dodo be ènu nana.

²⁹Woa kpata ye nyi *àmèdɔ̃dɔ̃woa? Woa kpata ye nyi gblɔ̃ɖɛtɔwoa? Woa kpata ye fiɔna ènua? Woa kpata, wo wɔ̀nà ŋùdãdɔwoa?

³⁰Woa kpata ye ɖo èdɔ̀ dàda be ènu nana a? Woa kpata ye dona ègbè hamè-hamèwoa? Woa kpata ye ɖènà ègbè gɔ̃mèa?

³¹Mì ji ènu nana àdodoewo veveɖe, eye sɔ kpe èa, mù la fiɔ mì èmɔ kè nyɔ wu fuua.