Read gen 1Kòrɛ̃tòtɔwo 13 Bible Online

1Kòrɛ̃tòtɔwo 13 - gen bible

1Kòrɛ̃tòtɔwo 13

¹Ne e nyi be mù le do àgbètɔwo be ègbèwo, àlo Mawu be àtikplɔtɔwo be ègbèwo, eye nyè mu ɖo lɔ̃lɔ̃ òa, mù lè sìgbè gànu gbalo kè le ɖè ègbèa, gàkokoe àlo àyawa kè le ɖìa nène.

²Eye ne mù ɖo mawunya gbɔ̃gblɔ̃ ɖɛ be ŋusɛ̃, eye mù ŋɔjè àmlìmànuwo keŋu ku ènunya keŋu mè, eye ne mù ɖo xɔ̀sè blibo kè la hɔ̃ ètowo, vɔ̀a, ne nyè mu ɖo lɔ̃lɔ̃ òa, nyè mu nyi ènu ɖekpe ò.

³Ne mù sɔ ènu kèwo kpata lè àsi nyèa na wɔ̀amènɔ̀wo, eye mù na wo tɔ èzò àpe àmètia cã a, ne nyè mu ɖo lɔ̃lɔ̃ òa, mù wɔ̀ èdɔ gugu.

⁴Lɔ̃lɔ̃ nana wo gbɔ̃nà èjì ɖɛ blɛ̀wù. Lɔ̃lɔ̃ nana wo kpena ɖo àmè ŋuti. Lɔ̃lɔ̃ mu nana wo huãnàŋu ò. Lɔ̃lɔ̃ mu nana wo jrana ò. Mu nana wo kɔna àmè ɖokoe yìji ò.

⁵Mu nana wo wɔ̀nà ŋùkpɛ̃nu ò. Mu nana wo jina àmè ŋutɔ ɖokoe tɔ̀ kpò ò. Mu nana wo binajì ò. Mu nana wo lena èkɛ̃ ò.

⁶Mu nana wo kpɔna jìjɔɛ ɖo ènu màjɔ̀ màjɔ ŋuti ò; bòhũa e nana wo jɔ̀nàjì ɖo nyàwo toto ŋuti.

⁷Lɔ̃lɔ̃ nana wo sɔna ènu sia ènu kènà àmè. E nana wo xɔ̀nà ènu sia ènu ji sè. E nana wo ɖonaŋù ɖo ènu sia ènu ŋuti. E donajì xɔ̀nà ènuwo keŋu fàa.

⁸Lɔ̃lɔ̃ mu crɔ̃na ò. Mawunya gbɔ̃gblɔ̃ ɖɛ nu la va yì. Ègbè hamèhamèwo la ɖoɖa. Ènunya nu la va yì.

⁹Đo miabe ènunya ɖo sɛ̃pe, eye miabe Mawunya gbɔ̃gblɔ̃ ɖɛ cã ɖo sɛ̃pe.

¹⁰Vɔ̀a, wàlɛbɛ kè ènuwo la sù bliboa, ekèwo ɖo sɛ̃peawo la klo jo.

¹¹Wàlɛbɛ kè mù nɔ̀ ɖèvi mèa, mù pònà nupo sìgbè ɖèvi nène; mù ɖènà susu sìgbè ɖèvi nène. Vɔ̀ fifìa, mù sĩ, eye nyè mu gbà le wɔ̀ ɖèvi-nuwo ò.

¹²Đo fifìa, mi mu le kpɔ ènuwo nyuɛ̃ ɖe ò; mi le kpɔ wo sìgbè lè àpùpui mè nène. Vɔ̀, ne gàmè va sùa, mi la kpɔ ènu àgbãŋùgbà. Fifìa, àpe ènunya ɖo sɛ̃pe; vɔ̀, ne gà mèa va sùa, mù la nya Mawu, sìgbè lekè Mawu nya mùa nène.

¹³Fifìa ènu ètɔ̃ ye lè: xɔ̀sè, ŋùɖo kudo lɔ̃lɔ̃. Vɔ̀ ekè wu woawo keŋuã ye nyi lɔ̃lɔ̃.