Read gen 1Kòrɛ̃tòtɔwo 14 Bible Online

1Kòrɛ̃tòtɔwo 14 - gen bible

1Kòrɛ̃tòtɔwo 14

¹Mì ji lɔ̃lɔ̃ wu ènu sia ènu, mì ji gbɔ̃gbɔ̃ mè be ènu nanawo kudo vevedonu, wu ekèa, ènu nana kè nana wo ɖona Mawu be ègbèa.

²Đo, àmè kè le pò nupo lè ègbè hamèhamèwo mèa, mu le pò nupo na àgbètɔwo ò, vɔ̀a na Mawu. Àmè ɖekpe mu le sè yebe ènyà gɔ̃mè ò. E le ɖè gbèfã so àmlìmànuwo ŋuti, to Gbɔ̃gbɔ̃ ji.

³Vɔ̀a, àmè kè nyi gblɔ̃ɖɛtɔa, le pò nupo na àgbètɔwo. E le do wo ŋusɛ̃, le pò toɖo na wo, eye be le fa àkɔ na wo.

⁴Àmè kè le do ègbè hamèhamèwoa le do ŋusɛ̃ ye ɖokoe. Vɔ̀a, àmè kè le ɖo Mawu be gbèa, le do ŋusɛ̃ èhabɔ̀bɔa.

⁵E jro mù be mìa kpata mìa nɔ̀ do ègbè hamèhamèwo, vɔ̀a, e nyɔ na mù wu be mìa kpata mìa nɔ ɖo Mawu be ègbè. Đo gblɔ̃ɖɛtɔ wu àmè kè le do ègbè hamèhamèwoa, vɔ̀a àmè ɖe, ne ɖè e gɔ̃mè, sɔ do ŋusɛ̃ èhabɔ̀bɔa.

⁶Fifìa nɔ̀viwo, ne mù va mìa gbɔ, le do ègbè hamèhamèwoa, àlè kɛ mù la ɖè na mì, ne nyè mu pò nupo na mì lè ènyà ɖèfiɔ, àlo ènunya, àlo ègbèɖoɖo, àlo ènufiɔ àmè mè ò?

⁷Nène a ke ye be lè na èhàjìnuwo sìgbè èzè, àlo èhɛ nène. Ne woabe ègbèɖìɖiwo mè mu kɔ̀ òa, leke wo la wɔ̀ la nya vòvòtoto kè lè ènu kè wo le ku, àlo ènu kè wo le pòa mè ò?

⁸Eye ne àhùakpɛ̃ be ɖìɖi mè mu kɔ̀ òa, àmè kɛ ye la jràɖo na àhùa wɔ̀wɔa ò?

⁹Nène a, ne mìawo cã a, mìabe ègbèa mu le gblɔ̃ ènyà kè mè kɔ̀ òa, leke wo la wɔ̀ la sè ènyà kèwo mì le gblɔ̃a gɔ̃mè ò?

¹⁰Ègbè dodo hamèhamèwo lè xixea mè, gãke ɖekpekpe mu lè, ekè gɔ̃mè wo mu sènà ò.

¹¹Vɔ̀ ne nyè mu sè ènyà ɖe gɔ̃mè òa, mù lè sìgbè àmèjro nène na àmè kè le do ègbèa, eye ye cã nyi àmèjro na mù.

¹²Nène a kea, lè mìa cã mìa gbɔa, mì do veve ènu na gbɔ̃gbɔ̃ mè be ènu nanawo; mì hlɔ̃ na ènu kè la na èhabɔ̀bɔa la yì ŋùkɔ̀a.

¹³Ye ŋutia, àmè kè le do ègbè bua, ɖo la fãkue, ne woa na bèa teŋu ɖè e gɔ̃mè.

¹⁴Ne mù le fãkue lè ègbè bu mèa, àpe gbɔ̃gbɔ̃ ya le fãkue, vɔ̀a, àpe ènu gɔ̃mè sèse cina èku mà sɛ̃.

¹⁵Fifìa, nukɛ mù ɖo la wɔ̀ ò? Mù la fãkue lè gbɔ̃gbɔ̃a mè, vɔ̀a, mù la wɔ̀ kuefã kè gɔ̃mè wo la sè a. Mù la jìhà cã lè gbɔ̃gbɔ̃a mè, vɔ̀a, mù la jì ì, na e gɔ̃mè sèse.

¹⁶Đo ne wò do àkpe na Mawu lè gbɔ̃gbɔ̃a mè kpòa, leke àmè kè mu nya ènu kè wò le gblɔ̃ òa la teŋu ɖè”* Àmèn” ɖo àpo àkpedodoa ji, ekè mu sè ènu kè wò le gblɔ̃a gɔ̃mè ò?

¹⁷Àpo àkpedodoa nyɔ, vɔ̀ mu ɖè àlè na àmè bu ò.

¹⁸Mù do àkpe na Mawu be mù pònànu lè ègbè hamèhamèwo mè wu mìa kpata.

¹⁹Vɔ̀ lè sɛ̃sɛ̃ mèa, mù lɔ̃ bòhũ be ma gblɔ̃ ènyà àtɔ̃, kèwo mè àmèwo la sè a sɔ fiɔ ènu èhabɔ̀bɔa, wu be ma gblɔ̃ ènyà hotu àtɔ̃ ɖo ègbè kè àmè ɖe mu sè òa mè.

²⁰Nɔ̀viwo, mì mu gbà nɔ ɖè susu sìgbè ɖèviwo nène ò; mì nyi ɖèviwo lè ènu bàɖà wɔ̀wɔ mè; vɔ̀a, lè susu-ɖèɖe mèa, mìa nyi àmè sĩsĩwo.

²¹Wo ŋlɔ̀ ɖo Èse Xoma a mè be: “Àmè kèwo dona ègbè buawo ji mù la to, la pò nupo na dùkɔ̃ kèa, àmèjrowo ji mù la to, la pò nupo na wo. Gãkea wo mu la ɖo èto mù ò.” Tɔhonɔ̀ ye gblɔ̃ ɛ̀.

²²Ye ŋutia, nupo pòpo lè ègbè hamèhamèwo mèa, mu nyi jèsìdo na xɔ̀sètɔwo ò, vɔ̀a, na màxɔ̀sètɔwo ye be nyi jèsìdo na. Mawu be ègbèdoàsia, mu lè na màxɔ̀sètɔwo ò, vɔ̀a, xɔ̀sètɔwo ye be lè na.

²³Ne èhabɔ̀bɔ bliboa bɔ̀ lè tèpe ɖèka, eye woa kpata wo le pò nupo lè ègbè hamèhamèwo mè, eye àmè mànyanu, àlo màxɔ̀sètɔwo va ɖo e mèa, wo mu la gblɔ̃ be mì le jè àɖàhùa òa?

²⁴Vɔ̀a, ne mìa kpata mì le gblɔ̃ Mawu be ègbèdoàsi be ènyà, eye àmè kè mu lè èhabɔ̀bɔa mè ò, àlo kè mu nyi xɔ̀sètɔ òa va mìa dòmèa, e la sè ènyà ɖe godo, kè la wɔ̀ èdɔ ɖo e ji, eye be la yì ye ɖokoe mè. E la sɔ ènyà kè be sè a sɔ ɖo kòjo na ye ɖokoe,

²⁵eye ènu kèwo wla ɖo yebe èjì mèawo, la ze. E la sɔ èmɔ la yì sumɔ Mawu la gblɔ̃ be: “Nyàwo, Mawu lè mìa dòmè.”

²⁶Nɔ̀viwo, fifìa leke mi la wɔ̀ ò? Ne mì va bɔ̀ be mìa sumɔ Mawu a, e la va e mè be: mìa dòmè tɔ ɖe la jì èhà, àmè ɖe la fiɔ ènu, àmè bu teŋu ɖè ènu ɖe fiɔ so Mawu gbɔ, àmè bu teŋu do àŋɛ̀ ɖo ègbè bu mè, eye àmè bu la teŋu ɖè àŋɛ̀ kèa gɔ̃mè; lè èhabɔ̀bɔa mèa, woa wɔ̀ be ènuwo ne yì ɖo ɖoɖo nu, na èhabɔ̀bɔa be èkèlili.

²⁷Ne wo la pò nupo lè ègbè buwo mèa, àmè èvè, àlo ne, e la wua, àmè ètɔ̃, lè woa nɔ̀nɔwo yomè, eye àmè ɖe ne ɖè e gɔ̃mè.

²⁸Vɔ̀a, ne àmè ɖekpe mu lè la ɖè ènyàa gɔ̃mè òa, eŋuãa, àmèa ne bɔ̀nu, eye bèa pò nupo lè ye ɖokoe kudo Mawu dòmè kpò.

²⁹Lè Mawu be gblɔ̃ɖɛtɔwo tɔ̀ gomèa, èvè, àlo ètɔ̃ ne pò nupo, eye àmè kèwo le sè ènyàawo ne bù ènyàa ŋuti kpɔ.

³⁰Vɔ̀a, ne ɖèɖèfiɔ ɖe va na àmè bu ɖe kè lè funua, àmè cucugbã ne bɔ̀nu.

³¹Wo ɖè èmɔ be mìa kpata mìa pò nupo so Mawu be ègbè do àsi ŋuti, vɔ̀ woa wɔ̀ ɛ̀, àmè ɖe lè àmè ɖe yomè, be àmè sia àmè ne teŋu kpla ènu ɖe.

³²Gbɔ̃gbɔ̃ kè nana àmè pònànu so Mawu be ègbè do àsi ŋutia nɔ̀nà àmèa ŋutɔ mè.

³³Đo Mawu mu lɔ̃nà ènu kèwo mu lè ɖoɖo nu ò, bòhũa, e lɔ̃nà fàfa. Sìgbè lekè be lè àmè kèwo ŋuti wo kɔ̀awo be èhabɔ̀bɔwo keŋu mè nènea,

³⁴nyɔ̃nùwo ne bɔ̀nu lè bɔ̀bɔwo mè. Wo mu ɖè èmɔ na wo be woa pò nupo ò. Sìgbè lekè Èse Xoma a gblɔ̃ ɛ̀ nènea, e lè be woa bɔ̀bɔ̀ woa ɖokoewo.

³⁵Ne wo jro be yèwoa nya ènu ɖe lè èhabɔ̀bɔa mèa, wo ne biɔ wòa srɔ̃wo lè àxomè. Đo e wɔ̀ ŋùkpɛ̃ be nyɔ̃nù ne pò nupo lè èhabɔ̀bɔ mè.

³⁶Mawu be ènyàa ɖe, mìa gbɔ ye be soa? Mìawo ɖèɖe gbɔ kpò be vaa?

³⁷Ne àmè ɖe susu be yè dona Mawu be àŋɛ̀, àlo yè nyi gbɔ̃gbɔ̃ mè be àmèa, eŋuã e lè be ne kpɔ ɛ̀ jèsi be ènu kèwo mù le ŋlɔ̀ ɖoɖa mìa nyi ènyà so Tɔhonɔ̀ gbɔ.

³⁸Vɔ̀a, ne àmè ɖe mu sɔ èɖe lè e mè òa[1], wo mu la sɔ èɖe lè e mè na e cã ò.

³⁹Nène a, nɔ̀vi nyèwo, mi ji veve ɖe be mìa nyi Mawu be ènyàa be gbèdoàsi-mewo. Mì mu gbà xe èmɔ na àmè kèwo dona ègbè hamèhamèwo ò.

⁴⁰Vɔ̀a, mì sɔ bùbu sɔ wɔ̀ ènu sia ènu lè ɖoɖo nu.