Read gen 1Kòrɛ̃tòtɔwo 15 Bible Online

1Kòrɛ̃tòtɔwo 15 - gen bible

1Kòrɛ̃tòtɔwo 15

¹Fifìa, nɔ̀viwo, mù jro be ma ɖoŋù àŋɛ̀nyuɛ̃ kè mù hɛ̃ vaa na mì, àŋɛ̀nyuɛ̃ kè mì xɔ̀a, ekè mè cã mì lètè lè goŋu-goŋua.

²Ekèa mè wo la hlùɛ̃ mì ɖo àgbè lè, ne mì le è ɖo àsi sɛ̃sɛ̃ɖe, sìgbè àlekè mù fiɔ mìa nène; ne mu nyi nène òa, mìabe xɔ̀sèa la nyi gbalo.

³Ènu kè wo fiɔ mùa, ye nyè cã mù fiɔ mì cucugbã; e ye le nyi be: Kristò ku ɖo mìabe èvuɛ̃wo ta, sɔ zɔ̃ ɖo àlekè mawunya gblɔ̃ ɛ̀a ji.

⁴Wo ɖì ì, eye lè ŋùkèkè ètɔ̃gɔ̃a gbèa, e fɔ̃ so àmè kukuwo dòmè, sìgbè lekè Mawu be ènyàa gblɔ̃ ɛ̀a nène.

⁵E ɖè ye ɖokoe fiɔ Kefàs; e yomè a, e gbà ɖè ye ɖokoe fiɔ àmè woèvèawo.

⁶Eŋuã yomè a, e ɖè ye ɖokoe fiɔ nɔ̀vi lè Kristò mè kèwo wu àmè èkà woèvèa ɖodu. Nɔ̀vi kèawo dòmètɔ ɖewo kpɔ̀tɔ̀ lè àgbè, vɔ̀a, èɖewo ku vɔ̀.

⁷E yomè a, Yakobò kpɔ ɛ̀, eye *àmèdɔ̃dɔ̃awo kpata kpɔ ɛ̀.

⁸Mɛmlɛ̃ nua, ènyè kè lè sìgbè àzã màsù-vi nènea, e ɖè ye ɖokoe fiɔ nyè cã.

⁹Lè nyàwo toto mèa, mù nyi àmè kè hùe wu lè *àmèdɔ̃dɔ̃wo dòmè. Nyè mu jè be woa yɔ mù be àmèdɔ̃dɔ̃ ò, ɖoa mù tĩ Mawu be èhabɔ̀bɔa yomè.

¹⁰Gãkea, lè Mawu be àdɔ̀mè nyuɛ̃ wɔ̀wɔ na mù mèa, mù nyi ènu kè mù nyi egbèa, eye yebe àdɔ̀mè nyuɛ̃ na mùa, mu nyi gbalo ò. Mù wɔ̀ èdɔ wu àmèdɔ̃dɔ̃wo keŋu, bòhũ. Mu nyi ènyè ŋutɔ ye wɔ̀ èdɔawo ò, vɔ̀a, Mawu be àdɔ̀mè nyuɛ̃ na mù ye wɔ̀ ɛ̀.

¹¹Ye ŋutia, ne ènyè ye ò, àmè ŋuawo ye ò, àŋɛ̀ ŋua kpò mi le do; e ye mì xɔ̀sè.

¹²Fifìa ne mi do àŋɛ̀a be wo fɔ̃ Kristò so àmè kukuwo dòmèa, leke wɔ̀, mìa dòmètɔ ɖewo gbà le gblɔ̃ be àmè kukuwo be fɔ̃fɔ̃ so èku ɖe mu lè ò?

¹³Vɔ̀a, ne àmè kuku mu fɔ̃na ò a, eŋuã, wo mu fɔ̃ Kristò cã so àmè kukuwo dòmè ò.

¹⁴Ne wo mu fɔ̃ Kristò òa, eŋuã, miabe àŋɛ̀ dodoa nyi ènu gbalo, eye mìawo cã mìabe xɔ̀sèa nyi ènu gbalo.

¹⁵Ne nyàwo be nyi be àmè kukuwo mu fɔ̃na òa, eye miawo yaa, mi ɖù ɖase be Mawu fɔ̃ Kristò so èkua, eye vɔ̀ mu fɔ̃ Kristò òa, eŋuã mi ɖà àjè ɖo Mawu si.

¹⁶Ne àmè kukuwo mu fɔ̃na ò a, eŋuã Kristò cã mu fɔ̃ ò.

¹⁷Ne wo mu fɔ̃ Kristò òa, eŋuã, mìabe xɔ̀sè nyi ènu gbalo, eye mì gbà kpɔ̀tɔ̀ lè mìabe èvuɛ̃wo mè.

¹⁸Wu ekèa, àmè kèwo xɔ̀ Kristò ji sè, gbɔ̀xue wo kuawo, crɔ̃.

¹⁹Ne xixe kèa mè kpò mi ɖo ŋùɖo ɖo Kristò ŋuti lèa, eŋuã, mi nyi ŋuzĩzĩmewo wu àmèwo keŋu.

²⁰Vɔ̀a, wo fɔ̃ Kristò so àmè kukuwo dòmè nyàwo. E ye nyi àmè kè fɔ̃ jè ŋùkɔ̀ na àmè kukuwo kpata.

²¹Eye, sìgbè lekè èku to àmè ɖèka ji, va xixea mè nènea, nènea ke ye àmè kukuwo be fɔ̃fɔ̃ cã to àmè ɖèka ji vaa yeŋu.

²²Sìgbè lekè àmèwo kpata kuna, ɖo wo ɖo èkà dodo ku Adàm nènea, nènea ke ye, lè ɖèkawɔ̀wɔ ku Kristò mèa, àmèwo kpata la gbà gbɔ̀ àgbè.

²³Eŋuã wo la fɔ̃ àmè sia àmè lè ye ŋutɔ be dɛnu: Kristò ye wo fɔ̃ cucugbã. E yomè, lè yebe vava zè èvègɔ̃a gbèa, wo la fɔ̃ àmè kèwo nyi Kristò tɔ̀awo cã.

²⁴Nène a ye vɔ̀vɔnua la va, eye Kristò la gbìgbɔ̀ sɔ fìɔdu a do àsi na Mawu Àta. Vɔ̀ jè ŋùkɔ̀ a, Kristò la gũ èta na jiɖùɖuwo, ku àgbètɔwo be ŋusɛ̃, kudo gbɔ̃gbɔ̃ mè be ŋusɛ̃wo kpata.

²⁵E lè be Kristò la nɔ ɖùfìɔ kaka na wàlɛbɛ kè Mawu la sɔ yebe kɛ̃tɔwo keŋu ɖo yebe àfɔ̀ gɔ̃mèa.

²⁶Èkɛ̃tɔ kpɔ̀tɛ kè be la gũ èta na a, ye nyi èku.

²⁷Mawunyaa gblɔ̃ be: “Wo sɔ ènu sia ènu ɖo yebe àfɔ̀ gɔ̃mè.” Ne wo gblɔ̃ be “ènu sia ènua”, e mè kɔ̀ nyuɛ̃ ɖe be àmè kè sɔ ènuwo kpata ɖo ye gɔ̃mèa mu lè e mè ò.

²⁸Wàlɛbɛ kè Mawu la bɔ̀bɔ̀ ènu sia ènu ɖo Kristò be àcɛ̀ gɔ̃mèa, Kristò ŋutɔ la bɔ̀bɔ̀ ye ɖokoe ɖo Mawu gɔ̃mè, ne Mawu bèa ɖù ènuwo kpata ji, lè ègowo keŋu mè.

²⁹Ne mu nyi nène òa, nukɛ ŋuti àmè ɖewo nana, wo lènà mawusi na wo, ɖo àmè kukuwo nu ɖo ò? Ne wo mu la fɔ̃ àmè kukuwo klua òa, nukɛ ŋuti wo le lè mawusi na àmèwo ɖo woa nu ɖo ò?

³⁰Mia ŋutɔwo cã ɖe, nukɛ ŋuti mi gblena mia ɖokoewo ɖo àfɔ̀ku mè, wè sia wè ɖo ò?

³¹Nɔ̀vi nyèwo, ŋùkè ŋùkèa, mù gogona èku. Mù le gblɔ̃ ekèa, ɖo gogo kè mì nyi na mù, lè ɖèkawɔ̀wɔ kudo mia Tɔhonɔ̀ Yesù Kristò mèa ŋuti.

³²Àlè kɛ ye be la ɖè na mù be ma wɔ̀ àvũ ku ègbe mè-lãwo lè Efesò, ne e nyi be àgbètɔwo be kpɔkpɔ nu ye ò? Ne àmè kukuwo mu fɔ̃na òa, eŋuã ènyà kè wo gblɔ̃nà be: “Mì na mia ɖù, mia nù, ɖo èsɔ̀a mi la kua”, nyi nyàwo.

³³Mì mu gbà na woa flù mì ò. “Ne àmè vuɛ̃ le do èha kudo àmè nyuɛ̃a, àmè nyuɛ̃a cã be àgbènɔ̀nɔ trɔna àgbènɔ̀nɔ vuɛ̃.”

³⁴Mì gbìgbɔ̀ bù ètamè so mìa ɖokoewo ŋuti, ne mìa nɔ̀tè ènuvuɛ̃ wɔ̀wɔ. Mù le gblɔ̃ ekèa, ne èŋù ne kpɛ̃ mì, ɖoa, mìa dòmètɔ ɖewo mu nya ènu ɖekpe so Mawu ŋuti ò.

³⁵“Vɔ̀a, àmè ɖe la biɔ sè be, leke ye àmè kukuwo fɔ̃na ɖo ò? Ŋutilã kɛ ye wo la sɔ fɔ̃ ò?”

³⁶Yɛ̀yìnɔ̀ wò nyi! Wò mu nya be ènuku kè wò do a, mu teŋu gbɔ̀ àgbè, ne mu ku òa?

³⁷Mu nyi ènuku kè mìɔ̃ vɔ̀a ye wò do ò; vɔ̀ ènuku kui gbalo, kè teŋu nyi èblikui, àlo ènuku bua kpò ye wò do.

³⁸Mawu ye sɔna nɔ̀nɔmè kè jè ŋùmè na ɛ̀a nana ènuku sia ènuku kè wo do a.

³⁹Ŋutilãwo kpata mu lè ɖèka ò, àgbètɔwo tɔ̀ lè; èlãwo tɔ̀ lè; ètɔ̀mèlãwo tɔ̀ lè, eye xèviwo tɔ̀ cã nyi èbu.

⁴⁰Jiŋùkusi-nuwo be ŋutilã lè, eye ànyigbã ji-nuwo cã tɔ̀ lè. Vɔ̀a, jiŋùkusi tɔ̀wo be gogo ku woabe nyɔnyɔ lè ɖo ɖe, tovò na ànyigbã ji tɔ̀wo tɔ̀.

⁴¹Àlekè èwè nyɔ na kpɔkpɔ ɖoa, tovò na wètri tɔ̀; wètriviwo be kɛ̃klɛ̃ tonavò, eye èɖe tɔ̀ tonavò na èbu tɔ̀.

⁴²Nène a ke ye be lè na àmè kukuwo be fɔ̃fɔ̃ so èku cã. Ne wo ɖì àmètia, e gblena; ne wo fɔ̃ ɛ̀a, mu gbà la gble ò.

⁴³Ŋutilã kè wo le do ègũ lè gbɔ̀jɔ̀gbɔjɔ ku gbegble mèa, la fɔ̃ lè ŋusɛ̃ kudo gogo mè.

⁴⁴Wo do è ègũ lè ŋutilã-gbàze mè, eye wo la fɔ̃ ɛ̀ lè gbɔ̃gbɔ̃-gbàze mè. Kè ŋutilã-gbàze lèa, gbɔ̃gbɔ̃ mè gbàze cã lè.

⁴⁵Ekèa ŋuti Mawu be ènyàa gblɔ̃ be: “Adàm, àmè cucugbãa, wo wɔ̀ ɛ̀, àgbètɔ àgbè-àgbè” Adàm mlɛ̃a, wo wɔ̀ ɛ̀ gbɔ̃gbɔ̃ kè nana àgbè a.

⁴⁶Vɔ̀ mu nyi gbɔ̃gbɔ̃ mè be àmè ye va cucugbã ò; ŋutilã tɔ̀a ye; e yomè gbɔ̀xue gbɔ̃gbɔ̃ mè tɔ̀a va.

⁴⁷Àmè cucugbã so ànyigbã mè; hũhũ ɖèɖe kpò be nyi. Àmè èvègɔ̃a ya so jiŋùkusi.

⁴⁸Àmè kè so ànyigbãa lè sìgbè àmè kè wo ɖè so èkɔ mèa nène. Nène a ke ye àmè kè so jiŋùkusia lè sìgbè àmè kèwo lè jiŋùkusiawo nène.

⁴⁹Sìgbè lekè mi lè àmè kèwo so ànyigbã jiawo be nɔ̀nɔmè mè nènea, nènea ke ye mi la va nɔ̀ àmè kèwo so jiŋùkusiawo cã be nɔ̀nɔmè mèa yeŋu.

⁵⁰Nɔ̀vi nyèwo, ènu kè mù le gblɔ̃a ye nyi be ènu kè wo sɔ ŋutilã kudo èhũ wɔ̀a mu la teŋu kpɔ gomè lè Mawu be fìɔdua mè ò. Eye ènu kè kunaa mu la teŋu kpɔ gomè lè ènu kè mu kuna òa dòmè ò.

⁵¹Kpɔɖa, mù jro be ma gblɔ̃ ènyà wawla kèa na mì. Mia kpata mi mu la ku ò, vɔ̀a wo la trɔ mia kpata miabe nɔ̀nɔmè.

⁵²Zè ɖèka, lè àɖàbà pòpo ɖèka mèa, ne èkpɛ̃a ɖì kpòa, wo la fɔ̃ àmè kukuwo ɖotè, mà-gble mà-gble, eye Mawu la trɔ miabe nɔ̀nɔmè.

⁵³E lè be woa sɔ nɔ̀nɔmè kè mu gblena òa cɔ̃ na nɔ̀nɔmè kè gblenaa, eye woa sɔ nɔ̀nɔmè kè mu kuna òa, cɔ̃ na nɔ̀nɔmè kè kunaa.

⁵⁴Ne wo sɔ nɔ̀nɔmè kè mu gblena òa cɔ̃ na nɔ̀nɔmè kè gblenaa, eye wo sɔ nɔ̀nɔmè kè mu kuna òa, cɔ̃ na nɔ̀nɔmè kè kunaa, eŋuã, Mawu be ènyà kèa la va e mè be: “Wo ɖù èku ji, wo mì ì àgbligbà!”

⁵⁵“Oò, èku, jiɖùɖu wòa ɖe? Oò, èku fikɛ àpo tetea ɖe?”

⁵⁶Èku be tete ye nyi èvuɛ̃, eye èvuɛ̃ be ŋusɛ̃ ye nyi èsea.

⁵⁷Eŋuã, àkpe na Mawu, àmè kè na, mi ɖùji lè mia Tɔhonɔ̀ Yesù Kristò mèa.

⁵⁸Ekèa ŋutia, nɔ̀vi nyè ɖèvewo, mì lo goŋu-goŋu, màhùã-màhuã, eye mìa nɔ wɔ̀ èdɔ tɛ̀gbɛ̀, lè Tɔhonɔ̀ mè. Đo mìabe àgbàgba jèje mu nyi gbalo lè Tɔhonɔ̀ mè ò.