Read gen 1Kòrɛ̃tòtɔwo 16 Bible Online

1Kòrɛ̃tòtɔwo 16 - gen bible

1Kòrɛ̃tòtɔwo 16

¹Lè ènujɔ̀jɔ na xɔ̀sètɔwo tɔ̀ gomèa, mì wɔ̀ ɛ̀ sìgbè lekè mù ɖo è na èhabɔ̀bɔ kèwo lè Galatìa be nutowo mèawo nène.

²Kuasiɖa sia kuasiɖaa, àmè sia àmè la ɖè ègà kè be teŋu jɔ̀ a ɖovò, lè yebe àxomè, àleke be mu lè veve ɖe be ma va funua, gbɔ̀xue woa nɔ jɔ̀ ènua ò.

³Ne mù vaa, mù la ŋlɔ̀ xoma do àsi na àmè kèwo mì cãawo, ne woa sɔ mìabe ènu nanawo yì Yèruzàlɛm.

⁴Ne e hiã be nyè ŋutɔ ma yìa, eŋuã, wo la zɔ̃ kudo mù.

⁵Mù ɖo è be ma to Màkedonìa, gbɔ̀xue ma va mìa gbɔ; mù la to funua cucugbã.

⁶E teŋu nyi be mù la nɔ̀ mìa gbɔ vi ɖe, àlo mù la nɔ̀ mìa gbɔ lè fàfa be gàmè ŋutɔ cã, ne mìa do mù àlɔ̀, sɔ yì èmɔ zɔ̃zɔ̃ nyèa ji.

⁷Nyè mu le ji be ma kpɔ mì kpò, ne mù va le yìa ò. Vɔ̀a, mù le susu bòhũ be ma va nɔ̀ mìa gbɔ, vi ɖe, ne Tɔhonɔ̀ ɖè èmɔ na mùa.

⁸Vɔ̀a, mù la nɔ̀ Efesò kaka na Pɛntekòst be àzãa gbè.

⁹Mù kpɔ èmɔnu be ma wɔ̀ èdɔ xɔ̀ àsì ɖe. Àmè sùgbɔ sitè ɖo ŋuti nyè, gãkea mù la wɔ̀ ɛ̀.

¹⁰Ne Timòteo va ɖoa, mìa kpɔ e gbɔ, àleke be mìa dòmè nɔ̀nɔ ne jè e ji na ɛ̀, ɖo Tɔhonɔ̀ be èdɔ kpò be le wɔ̀, sìgbè ènyè ŋutɔ nène.

¹¹Ye ŋutia, àmè ɖe mu gbà kpɔ ɛ̀ sìgbè àmè gbalo nène ò. Mì do è àlɔ̀, ne bèa trɔva gbɔ nyè lè fàfa mè, ɖoa mù le kpɔ èmɔ na ye ku nɔ̀viwo be vava.

¹²Sɔ yì nɔ̀vi Apolòs tɔ̀ gomèa, mù ɖè kuku na ɛ̀ veve ɖe be ne va kpɔ mì, ku nɔ̀viawo, vɔ̀a mu nyi yebe èjro klua be yèa va mìa gbɔ fifì ò. E la va, ne e kpɔ be gàmè sùa.

¹³Mì nɔ̀ ŋùzɔ̃, eye ènu kè mì xɔ̀sèa, mì le è ɖo àsi sɛ̃sɛ̃ ɖe. Mì wɔ̀ kãlì eye mìa sɛ̃ŋu.

¹⁴Mì wɔ̀ ènu sia ènu lè lɔ̃lɔ̃ mè.

¹⁵Fifìa, nɔ̀vi nyèwo, mì nya ènu so Stefanɔ̀ kudo yebe àxuedoa ŋuti. Woawo ye nyi àmè cucugbã kèwo xɔ̀sè lè Akayìa be èdùwo mè. Wo sɔ woa ɖokoewo na fàa, be yèwoa sumɔ àɖèsãwo.

¹⁶Mì bɔ̀bɔ̀ ɖo àmè kèawo hati kudo àmè kèwo drɛ̃nà àvũ, wɔ̀nà èdɔ kudo woawo be kpɔ̀kplɔ gɔ̃mè.

¹⁷Mù kpɔ jìjɔɛ ɖo Stefanɔ̀, Fɔrtunatò ku Akaikò be vava ŋuti, ɖoa, wo lè mìa tèpe lè fikèa.

¹⁸Wo na àpe èjì jè e mè ku mìa kpata mìabe èjìwo. Mì do bùbu àmè kèawo hati ŋuti.

¹⁹Èhàbɔ̀bɔ kè lè Azìaa dogbè na mì. Akilàs ku Priskà kudo èhabɔ̀bɔ kè donagò lè woabe àxomèa dogbè ɖoɖa mì, lè ɖèkawɔ̀wɔ mè kudo Kristò.

²⁰Nɔ̀viwo kpata dogbè ɖoɖa mì! Mì dogbè na mìa nɔ̀nɔwo, eye àmè sia àmè ne kpla àsi èkɔ̀ na nɔ̀via kudo lɔ̃lɔ̃ àdodoe.

²¹Ènyè Paolò ŋutɔ ye sɔ àpe àlɔ̀ sɔ ŋlɔ̀ ègbè dodo kèa.

²²Ne àmè ɖe mu lɔ̃ Tɔhonɔ̀ òa, kpɛ̃sɛ̃ ne ɖì e ŋuti! Marànatà!

²³Tɔhonɔ̀ Yesù be màje ne nɔ̀ kudo mì.

²⁴Àpe lɔ̃lɔ̃ ne nɔ̀ kudo mì, àmè kèwo keŋu wɔ̀ ɖèka kudo Kristò Yesùa. * Àmèn.