Read gen 1Kòrɛ̃tòtɔwo 2 Bible Online

1Kòrɛ̃tòtɔwo 2 - gen bible

1Kòrɛ̃tòtɔwo 2

¹Nɔ̀viwo, gà kè mè mù va mìa gbɔ, ne ma gblɔ̃ àmlìmànu kè lè Mawu be ènyàa mèa na mìa, nyè mu gblɔ̃ ɛ̀ kudo ènyà sɛ̃ŋu, àlo ènu nyãnyã kèwo mè mì mu la sè ò.

²Đo nyè mu jro la nya ènu ɖe lè mìa dòmè wu Yesù Kristò, Yesù Kristò kè wo kaa ò.

³Ye ŋuti ye mù va mìa gbɔ lè gbɔ̀jɔ̀gbɔjɔ ku vɔ̃vɔ̃ kudo sìsɔ̀sisɔ gã ɖe mè.

⁴Mu nyi àgbètɔ be ènyà viviwo ye mù sɔ fiɔ ènu àmè ò, mu nyi woawo ke ye mù sɔ do Mawu be àŋɛ̀a ò, vɔ̀a Gbɔ̃gbɔ̃ Kɔ̀kɔ̀ɛ a ye ɖè wo fiɔ mù, to yebe ŋusɛ̃ ji.

⁵Ne mìabe xɔ̀sè mu gbà li ɖo àgbètɔwo be ènunya ji ò, vɔ̀ bòhũa, ɖo Mawu be ŋusɛ̃ ji.

⁶Vɔ̀a ènunya be ènyàa ye mù le gblɔ̃ na xɔ̀sètɔ kèwo ye sĩ lè gbɔ̃gbɔ̃ mèawo. Ènunya kèa mu nyi xixe kèa tɔ̀, àlo ŋusɛ̃ kèwo le ɖù xixe kèa ji egbè, vɔ̀, la va crɔ̃awo tɔ̀ ò.

⁷Bòhũa, mù le fiɔ Mawu be ènunya kè nyi àmlìmànu, lè wawla mè, gbɔ̀xue xixe kèa jɔ̀ a. Ènunya kèa, Mawu cã ɛ̀ dà ɖɛ ne miabe gogo.

⁸Àmè ɖekpekpe mu lè xixe kèa be èfìɔviwo dòmè kè jèsi ì ò, ɖo ne wo kè jèsi ìa, wo mu la ka gogo be Tɔhonɔ̀a ò.

⁹Đo Ŋɔ̀ŋlɔ̃awo gblɔ̃ ɛ̀ ɖɛ be: “Ènu kè àmè ɖe mu kpɔ kpɔ ò; ènu kè àmè ɖe mu sè kpɔ ò, ekè àmè ɖe mu bù kpɔ ò, e ye Mawu jràɖo ɖɛ na àmè kèwo lɔ̃ ɛ̀a.”

¹⁰Vɔ̀a, miawo ye Mawu ɖè ekèa fiɔ, to Gbɔ̃gbɔ̃ a ji. Đo Gbɔ̃gbɔ̃ a kùnà ènu sia ènu mè, kaka jè Mawu be gòglòpewo cã.

¹¹Àmè kɛ ye teŋu nya ènu kèwo lè àgbètɔ be susu mè, ne mu nyi ye ŋutɔ be gbɔ̃gbɔ̃ kè lè yebe tùmèa kpò ò? Nène a ke ye àmè ɖekpe mu nya ènu kè lè Mawu mè, tovò na Mawu be Gbɔ̃gbɔ̃ ò.

¹²Miawo yaa, mi mu xɔ̀ xixe mè be gbɔ̃gbɔ̃ ò, vɔ̀a Gbɔ̃gbɔ̃ kè so Mawu gbɔa ye mi xɔ̀, ne mia teŋu nya ènu kèwo Mawu na mi fàa.

¹³Eye mi le pò nupo so e ŋuti, mu nyi kudo ènu kè àgbètɔ be ènunya fiɔnaa ò. Vɔ̀a kudo ènu kè Mawu be Gbɔ̃gbɔ̃ a fiɔna, eye mi le ɖè gbɔ̃gbɔ̃ mè be ènyàwo fiɔ àmè kèwo ɖo Gbɔ̃gbɔ̃ awo.

¹⁴Àmè kè mu ɖo Mawu be Gbɔ̃gbɔ̃ òa, mu la teŋu xɔ̀ nyàwo kèwo so Gbɔ̃gbɔ̃ a gbɔ ò. Đo wo nyi àɖàhùa na ɛ̀, mu la teŋu ŋɔjè e mè ò, ɖoa Gbɔ̃gbɔ̃ ye wo sɔ ŋɔna jè e mè.

¹⁵Àmè kè ɖo Mawu be Gbɔ̃gbɔ̃ a teŋu sè ènu sia ènu gɔ̃mè. Vɔ̀a àmè ɖekpe mu la teŋu ɖo kòjo na ɛ̀ ò.

¹⁶Wo ŋlɔ̀ ɛ̀ ɖɛ be: “Àmè kɛ ye nya Tɔhonɔ̀ be susu ò? Àmè kɛ ye la teŋu fiɔ ɛ̀ ènu ò?” Vɔ̀ mia yaa, mi ɖo Kristò be susu.