Read gen 1Kòrɛ̃tòtɔwo 3 Bible Online

1Kòrɛ̃tòtɔwo 3 - gen bible

1Kòrɛ̃tòtɔwo 3

¹Lè tɔ̀ nyè gomèa, nɔ̀viwo, nyè mu teŋu pò nupo na mì sìgbè àmè kèwo lè gbɔ̃gbɔ̃ mèawo nène ò, vɔ̀a, sìgbè àmè kèwo lè ŋutilã mèawo nène. Sìgbè ɖèviwo lè Kristò mè nène.

²Ànɔsi ye mù na mì. Mu nyi ènu ɖùɖu sɛ̃ŋu ò, ɖoa, mì mu kpɔ sĩ na ɛ̀ hàɖe ò, eye fifì ŋutɔ cã, mì mu kpɔ sɔ̀gbè hàɖe ò.

³Đo a, mì kpɔ̀tɔ̀ lè àgbè sìgbè xixe kèa mè tɔwo nène. Kaka kè ŋuhuã kudo àjrè lè mìa dòmèa, mu nyi ɖe ye mì le ɖè è fiɔ be mì lè àgbè sìgbè xixe mè tɔwo nène, eye mì le zɔ̃ ɖo àgbètɔ be àgbè nɔ̀nɔ jia?

⁴Đo wàlɛbɛ kè àmè ɖe gblɔ̃ be: “Paolò tɔ̀ mù nyi”, eye àmè bu ya be: “Apolòs tɔ̀ mù nyia”, mu nyi àgbètɔ be nɔ̀nɔmè ye nyi e ŋuaa?

⁵Àmè kɛ ye Apolòs nyi ò? Àmè kɛ ye Paolò nyi ò? Mawu be sumɔ̃vi kèwo ji mì to, xɔ̀sèawo kpò ye mi nyi. Eye woa dòmètɔ ɖe sia ɖe wɔ̀ ɖo àlekè Tɔhonɔ̀ na ɛ̀a ji.

⁶Nyè yaa, mù do ènukua. Apolòs wu ì èsì. Vɔ̀a Mawu na be sɛ̃ èku.

⁷Àlekea be mu nyi àmè kè le do ènukua, àlo àmè kè le wu ì èsìa be èdɔ ye nyi ènu ɖe ò. Vɔ̀ Mawu, àmè kè na be sɛ̃ èkua be èdɔ ye nyi vevetɔa.

⁸Àmè kè le do ènukua ku àmè kè le wu ì èsìa, wo sɔ̀; eye woa dòmètɔ ɖe sia ɖe la xɔ̀ yebe èfɛ̃tu, sɔ zɔ̃ ɖo yebe èdɔ ji.

⁹Đo mi le wɔ̀ èdɔ na Mawu; eye mìa yaa, mì nyi Mawu be àgblè. Mì gbà nyi Mawu be èxɔ̀tùtu.

¹⁰Zɔ̃ ɖo màje kè Mawu na mùa jia, mù li dòdoea sìgbè èxɔ̀tùtɔ àdodoe nène, eye àmè bu tù èxɔ̀a ɖo e ji. Vɔ̀a, àmè sia àmè ne kpɔ nyuɛ̃ ɖe ɖo àlekè be le tù ɖo e ji ɖoa.

¹¹Đo àmè bu mu la gbà teŋu li dodoe bu tovò na ekè lè vɔ̀, kè nyi Yesù Kristò ò.

¹²Fifìa, ne àmè ɖewo sɔ sìka, klòsalò, èkpe xɔ̀asì, àlo àti, ègbe àlo ègbe pupu sɔ ɖo èglì ɖo dodoe kèa jia,

¹³àmè sia àmè be èdɔ kè be wɔ̀a la ze lè Tɔhonɔ̀ be kòjoɖo-zã gbè. Gbè ŋua gbè la ze sìgbè èzò nène. Èzò kèa la do àmè sia àmè be èdɔ kpɔ, eye be la ɖè è sia.

¹⁴Ne àmè ɖe be èdɔ kè be wɔ̀ ɖo dòdoea jia kpɔ̀tɔ̀ lètèa, àmèa la xɔ̀ yebe èfɛ̃tu.

¹⁵Ne àmè ɖe be èdɔ kè be wɔ̀a fiɔ̃a, e la bu ì, wo la hlùɛ̃ ye ŋutɔ gã, sìgbè àmè kè to èzò mèa nène.

¹⁶Mì mu nya be mawuxɔ mì nyi, eye Mawu be Gbɔ̃gbɔ̃ lè mìa mè ò a?

¹⁷Nène a, ne àmè ɖe crɔ̃ mawuxɔa, Mawu la crɔ̃ àmèa, ɖo mawuxɔ nyi tèpe kɔ̀kɔ̀ɛ, eye mìawo ye nyi mawuxɔ ŋua.

¹⁸Àmè ɖekpe mu gbà flù ye ɖokoe ò. Ne mìa dòmètɔ ɖe bù be yè nyi ènunyatɔ lè xixe kèa mèa, ne trɔ zũ sùkunɔ̀, ne bèa trɔ ènunyatɔ.

¹⁹Đo xixe kèa be ènunyaa le nyi sùkunɔ̀ jɔ̀jɔ lè Mawu gbɔ. Đo wo ŋlɔ̀ ɛ̀ ɖɛ be: “E lena ènunyatɔwo lè woabe àyèmènu wɔ̀wɔ mè.”

²⁰Wo gbà ŋlɔ̀ kpe è be: “Tɔhonɔ̀ nya ènunyatɔwo be sùsuwo. E nya be wo nyi ènu gbalo.”

²¹Nène a, àmè ɖekpe mu gbà sɔ yebe jajra dà ɖo àgbètɔwo ji ò. Đo a ènu sia ènu nyi mìa tɔ̀.

²²E teŋu nyi Paolò, àlo Apolòs, àlo Petrò, àlo xixea, àlo àgbè a, àlo èku, àlo egbè be ŋùkèkèawo, àlo ekèwo la ɖɛ vaa, woawo keŋu nyi mìa tɔ̀.

²³Vɔ̀ mìa yaa, mì nyi Kristò tɔ̀, eye Kristò nyi Mawu tɔ̀.