Read gen 1Kòrɛ̃tòtɔwo 4 Bible Online

1Kòrɛ̃tòtɔwo 4 - gen bible

1Kòrɛ̃tòtɔwo 4

¹Eŋuã wo ne nɔ kpɔ mi sìgbè Kristò be sumɔ̃viwo nène, àmè kèwo nyi Mawu be ŋùdãnuwo be ènujikpɔtɔwo.

²Wu ekèa, ènu kè kpò wo biɔna so ènujikpɔtɔ gbɔa, ye nyi bèa wɔ̀ ànùkua.

³Vɔ̀a, ènyè yaa, mu wɔ̀ ènu ɖe na mù be mìa ɖo kòjo na mù, àlo xixe mè be kòjoɖope ɖe ne ɖo è na mù ò. Nyè ŋutɔ nyè mu le ɖo kòjo na ɖokoe nyè ò.

⁴Àpe jìjigbè mu le dohùɛ do mù ò. E gɔ̃mè mu nyi be nyè mu ɖo àgɔ̀ ɖe ò. Tɔhonɔ̀ ye le ɖo kòjo na mù.

⁵Ye ŋutia, mì mu gbà ɖo kòjo gbɔ̀xue hùenua bèa sù ò, gbɔ̀xue Tɔhonɔ̀a ne va ò. E ye la klɛ̃ ɖo ènu kè lè wawla lè vìvìti mèa ji, eye be la ɖè èjì mè be susuwo to. Eye àmè sia àmè la xɔ̀ àjɔ̀ kè jè na ɛ̀a so Mawu gbɔ.

⁶Nɔ̀viwo, mù sɔ nyè ŋutɔ ku Apolòs be ènyàa sɔ na mì kpɔwɔɛ, be mìa kpla ènu so mia gbɔ. Mù wɔ̀ ekèa ɖo mìa ŋuti, ɖo mù ji be ma ɖè ènyà kèa gɔ̃mè na mì be: “Mì mu gbà wɔ̀ ènu ɖe wu ènu kè ŋɔ̀ŋlɔ̃awo gblɔ̃a ò.” Ne mì mu gbà kɔ mìa ɖokoe yìji, la nɔ̀ àmè ɖe be ènyà ji, ɖo àmè bu ŋuti ò.

⁷Đo àmè kɛ ye kpɔ ènu tovò lè ŋuti wò ò? Nukɛ ye lè àsiwo ye wò mu xɔ̀ ò? Ne e nyi be àmè ɖe ye na wòa, nukɛ ŋuti wò le jra sìgbè mu nyi ènu nana ye be nyi nène ò?

⁸Fifìa, mì ɖɔpò vɔ̀! Mì jè àdɔ̀kù vɔ̀! Miawo mà nɔ̀ e mèa, mìawo ɖèɖe, mì ɖùfìɔ vɔ̀! Vɔ̀a, mù jro be mìa ɖùfìɔ nyàwo, ne mia cã mia ɖù ì kudo mì.

⁹Đo mù susu be Mawu sɔ mi, *àmèdɔ̃dɔ̃wo sìgbè ŋùgbesimewo, na àmèwo keŋu, sìgbè àmè kèwo wo ɖè na èku nène, ɖo mi zũ ènu kpɔkpɔ na xixea, na Mawu be àtikplɔtɔwo kudo àgbètɔwo.

¹⁰Mi nyi àɖàhùatɔwo ɖo Kristò ŋuti, vɔ̀ mì nyi ènunyatɔwo lè ɖèkawɔ̀wɔ mè ku Kristò. Mi gbɔjɔ, vɔ̀a mìa ya mì sɛ̃ŋu. Wo bùnà mì. Miawo yaa, wo crìnà mi.

¹¹Wàlɛbɛ kè mè mi lè kèa, àdɔ̀ le wù mi, sìkɔ le tì mi, mi lè àma, wo le do àyà na mi, eye mi le dã, so àfi ɖe le yì àfi bu.

¹²Eye mi le wɔ̀ èdɔ ku mia ŋutɔ miabe àlɔ̀wo. Ne wo le sɛ̃kpɛ̃ na mia, mi tuna èsì. Ne wo le tĩ mia yomè a, mi dona èjì.

¹³Ne wo le gblɔ̃ ènyà bàɖà so mia ŋutia, mi fana èjì na àmè. Kaka na ègbea, mi lè sìgbè àmè kèwo xixea gbe, sìgbè ègbeɖiɖɔawo nène.

¹⁴Nyè mu ŋlɔ̀ ekèa ne ma sɔ do ŋùkpɛ̃ mì ò, vɔ̀a ne ma sɔ pò ètoɖo na mì sìgbè èvi nyè ɖèvewo nène.

¹⁵Lè nyàwo toto mèa, ne mì ɖo ènufiɔtɔ sùgbɔwo lè Kristò mèa, mì mu ɖo ètɔ sùgbɔ ò. Ènyè ye jì mì, lè Yesù Kristò mè, to àŋɛ̀nyuɛ̃ a ji.

¹⁶Ekèa ŋutia, mù le pò fiɔ mì be mìa zɔ̃ ɖo àpe kpɔwɔɛ ji.

¹⁷Ekèa ŋuti mù le dɔ̃ Timòteo, àmè kè nyi èvi nyè ɖève kudo ànùkuame lè Tɔhonɔ̀ mèa ɖoɖa mì. E la ɖoŋù àpe àgbènɔ̀nɔ lè Kristò mè be ɖoɖowo na mì, sìgbè àlekè mù fiɔna wo lè èhabɔ̀bɔ kèwo kpata mè mù tonaa nène.

¹⁸Mìa dòmètɔ ɖewo le jra, sìgbè nyè mu gbà gbãnà mìa gbɔ ò nène.

¹⁹Vɔ̀ ne Tɔhonɔ̀ jro a, mù la va mìa gbɔ sɔ̀sɔɛ ɖe, eye mu nyi jajratɔ kèawo be nupo pòpowo mù ji la nya ò. Vɔ̀a ne ma kpɔ ènu kè wo teŋu wɔ̀a.

²⁰Đo Mawu be fìɔdua, mu nyi nupo mè be lè ò, vɔ̀a, wɔ̀na mè ye be lè.

²¹Nukɛ ye la nyɔ na mì ò? Ma va mìa gbɔ kudo èba loo, àlo ma va lè lɔ̃lɔ̃ kudo fàfa mèa?