Read gen 1Kòrɛ̃tòtɔwo 5 Bible Online

1Kòrɛ̃tòtɔwo 5 - gen bible

1Kòrɛ̃tòtɔwo 5

¹Mi le sè so mìa ŋuti be mìa dòmètɔ ɖewo le wɔ̀ *àhasì. Àhasì wɔ̀wɔ kèa hati mu lè àgbàlèwo ŋutɔ cã dòmè ò. Mi sè be mìa dòmètɔ ɖe xɔ̀ ètɔa be èsrɔ̃.

²Gãkea, mì kpɔ̀tɔ̀ le jra, eye mì mu xànu bòhũ, ne mìa ɖè nène be àmèa to lè mìa dòmè ò.

³Vɔ̀a ènyè, àmè kè mu lè mìa dòmè lè ŋutilã mè ò, vɔ̀, lè mìa dòmè lè gbɔ̃gbɔ̃ mèa, mù sò kòjo na àmè kè wɔ̀ ènu kèa vɔ̀, lè Tɔhonɔ̀ Yesù be nyikɔ mè, sìgbè mù lè mìa dòmè nène.

⁴Ne mì bɔ̀ lè mia Tɔhonɔ̀ Yesù be nyikɔ mèa, àpe gbɔ̃gbɔ̃ lè kudo mì, eye mia Tɔhonɔ̀ Yesù be ŋusɛ̃ la nɔ̀ ku mì.

⁵Nène be àmèa, e lè be woa sɔ ɛ̀ do àsi na Satana, ne yebe ŋutilã be cɔ̃crɔ̃, ne woa hlùɛ̃ yebe gbɔ̃gbɔ̃a gã, lè Tɔhonɔ̀ be àzãa gbè.

⁶Mu lè be mìa nɔ̀ jra gbɔ̀xue ò. Mì mu nya be: “Èma huãhuã vi ɖe kpò ye nana èma bliboa kpata huãnaa?”

⁷Mì ɖè èvuɛ̃jɔ̀jɔ be èma huãhuãa jo, ne mìa zũ èma yeye; ekè mì nyi àmè kɔ̀kɔ̀ɛwoa, mì mu ɖo èmahuãnu ò. Đo Kristò, miabe Toŋutivayì be àlɛ̃via, wo wù ì na mi.

⁸Ye ŋutia mì na mia ɖù Toŋutivayì be àzãa, mu nyi ku kpɔ̃nɔ kè mè mawɛ huãhuã xoxoa lè ò. Mawɛ huãhuã ŋua ye nyi hũnyànyrã kudo èvuɛ̃jɔ̀jɔ. Vɔ̀a mia ɖù ì kudo kpɔ̃nɔ kè mè mawɛ huãnu mu lèa ò. Kpɔ̃nɔ kèa le nyi vevedodo kudo nyàwo be kpɔ̃nɔ.

⁹Mù ŋlɔ̀ xoma ɖoɖa mì be mì mu gbà doha ku gbòlòwɔ̀tɔwo ò.

¹⁰Nyè mu le pò nupo so xixe kèa be gbòlòwɔ̀tɔwo, àlo ŋùbiamewo, àlo àjòtɔwo, àlo vòdu sumɔtɔwo ŋuti ò, ɖo ne mì be yèwoa gbe àmè ŋuawo keŋu be èhaa, eŋuãa, mì ɖo la to lè xixea mè.

¹¹Xoma kè mù ŋlɔ̀ ɖoɖa mìa ye nyi be, mì mu gbà doha ku àmè kè be yè nyi nɔ̀vi, vɔ̀, nyi gbòlòwɔ̀tɔ, àlo ŋùbiatɔ, àlo vòdu sumɔtɔ, àlo àjrèwɔ̀tɔ, àlo àhànùmunɔ̀, àlo àjòtɔ ò. Mì mu gbà ɖù ènu ŋutɔ cã ku nènemewo ò.

¹²Vɔ̀a ɖe, èdɔ nyè ye nyi be ma ɖo kòjo na àmè kèwo mu lè Mawu be èhabɔ̀bɔ mè òa? Mu nyi èhabɔ̀bɔa be èdɔ ye nyi be ne ɖo kòjo na àmè kèwo lè e mèa woa?

¹³Vɔ̀a, Mawu ye la ɖo kòjo na àmè kèwo mu lè e mè òawo. Mawunya gblɔ̃ be: “Mì ɖe àmè vuɛ̃ a to lè mìa dòmè.”