Read gen 1Kòrɛ̃tòtɔwo 6 Bible Online

1Kòrɛ̃tòtɔwo 6 - gen bible

1Kòrɛ̃tòtɔwo 6

¹Ne àmè ɖe lè mìa dòmè, ɖo ènyà ɖe ɖo nɔ̀vi xɔ̀sètɔ ɖe ŋutia, leke wɔ̀ be donajì, yì yɔna ɛ̀ lè kòjo mè, lè màxɔ̀sètɔwo gbɔ, eye mu yɔna ɛ̀ lè àɖèsãwo gbɔ ò?

²Mì mu nya be xɔ̀sètɔwo ye la ɖo kòjo na xixea ò a? Ne mìawo ye la ɖo kòjo na xixea, eŋuã mì mu teŋu wɔ̀ ènyà wuiwliwo lè mìa nɔ̀nɔwo dòmè òa?

³Mì mu nya be miawo ye la ɖo kòjo na Mawu be àtikplɔtɔwo òa? Kpòa, mì mu la teŋu kpɔ xixe kèa be ènyàwo gbɔ tètè òa?

⁴Ne ènyà kèawo hati jè mìa dòmèa, mì sɔna àmè kèwo mu nya ènu ɖekpe so èhabɔ̀bɔa mè be ènyàwo ŋuti òa sɔ wɔ̀ mìabe kòjoɖotɔwoa?

⁵Mù le gblɔ̃ ekèa ne èŋù ne kpɛ̃ mì! Kpòa, ènunyatɔ ɖe mu lè mìa dòmè kè la teŋu ɖo kòjo lè nɔ̀viwo dòmè ò a?

⁶Vɔ̀a, nɔ̀vi le kplɔ̀ nɔ̀vi le yì kòjo mè, eye wo le wɔ̀ ekèa lè màxɔ̀sètɔwo be ŋùkumè!

⁷E ɖè mì kpɔ̀tɔ̀ ŋutɔ be mìa nɔ kplɔ̀ mìa nɔ̀nɔwo yì kòjo mè. Nukɛ ŋuti mì mu lɔ̃ bòhũ be woa wɔ̀ èvuɛ̃ ɖo mìa ŋuti ò? Nukɛ ŋuti mì mu bɔ̀nu ne woa tafu mì bòhũ ò?

⁸Mìawo bòhũ ye wɔ̀nà màjɔ̀ màjɔ ɖo àmè ŋuti. Mì tafuna àmè, eye ekèa, mì wɔ̀nà ɛ̀ ɖo nɔ̀viwo ŋuti!

⁹Mì mu nya be àmè màwɔ̀ jɔ̀jɔɛwo mu la teŋu ɖù Mawu be fìɔdua be ècrɔ̃ òa? Mì mu gbà flù mìa ɖokoewo ò! Gbòlòwɔ̀tɔwo, àlo vòdu sumɔtɔwo, àlo nyɔ̃nù kèwo dɔ̃na ku woa èhavi nyɔ̃nùwo, àlo ŋusù kèwo dɔ̃na ku ŋusùwo,

¹⁰àlo fĩãfìwo, àlo ŋùbiatɔwo, àlo àhànùmunɔ̀wo, àlo àjrèwɔ̀tɔwo, àlo àjòtɔwo mu teŋu ɖù Mawu be fìɔdua be ècrɔ̃ ò.

¹¹Ènu kèawo ye mìa dòmètɔ ɖewo nyi sãa. Vɔ̀a fifìa, wo lè mì ɖì; wo kɔ̀ mìa ŋuti; wo wɔ̀ mì trɔ zũ àmèjɔ̀jɔɛwo, lè Tɔhonɔ̀ Yesù Kristò be nyikɔ mè, to miabe Mawu be Gbɔ̃gbɔ̃ a ji.

¹²Mìa dòmètɔ ɖewo gblɔ̃nà be: “Èmɔ ɖèɖe lè be ma wɔ̀ ènu sia ènu.” Vɔ̀a ènu sia ènu mu ɖè àlè ò. “Èmɔɖèɖe lè be ma wɔ̀ ènu sia ènu”, vɔ̀a, nyè mu la sɔ ɖokoe nyè wɔ̀ kluvi na ènu ɖekpe ò.

¹³Mì gbà gblɔ̃nà be: “Ènuɖùɖu lè na pòdo, eye pòdo cã lè na ènu ɖùɖu”, vɔ̀a Mawu la crɔ̃ èvèawo kpata. Mawu mu ɖo ŋutilãa na gbòlòwɔ̀wɔ ò, vɔ̀a e lè na Tɔhonɔ̀, eye Tɔhonɔ̀ lè na ŋutilãa.

¹⁴Eye Mawu kè fɔ̃ Tɔhonɔ̀ so àmè kukuwo dòmèa, la fɔ̃ miawo cã kudo yebe ŋusɛ̃a.

¹⁵Mì mu nya be mìabe ŋutilã nyi Kristò be àmètia be ŋutinuwo òa? Eŋuã, ɖe ye mù la sɔ Kristò be ŋutinuwo sɔ wɔ̀ gbòlòwɔ̀wɔ be ŋutinuwoa? Gbèɖe!

¹⁶Mì mu nya be àmè kè ca kudo *àhasìwɔ̀tɔa, wɔ̀ ɖèka kudo è òa? Đo wo ŋlɔ̀ ɛ̀ ɖɛ be: “Wo àmè èvèawo la trɔ ŋutilã ɖèka.”

¹⁷Vɔ̀, àmè kè tɛ ɖo Tɔhonɔ̀ ŋutia, trɔ zũ gbɔ̃gbɔ̃ ɖèka kudo è.

¹⁸Mì crì gbòlòwɔ̀wɔ! Èvuɛ̃ bu ɖekpekpe kè àmè wɔ̀a mu tɛ ɖo yebe àmètia ŋuti ò. Vɔ̀, àmè kè le wɔ̀ gbòlòa, le wɔ̀ ènuvuɛ̃ do ye ŋutɔ be àmètia ŋuti.

¹⁹Mì mu nya be mìabe ŋutilã nyi mawuxɔ na Gbɔ̃gbɔ̃ Kɔ̀kɔ̀ɛ kè lè mìa mè, ekè mì xɔ̀ so Mawu gbɔ, eye mì mu gbà lè mìa ɖokoe sinu òa!

²⁰Mawu tu èfɛ̃ gã ɖe, sɔ plè mì, ye ŋutia, mì na gogo Mawu kudo mìa be àmètia.