Read gen 1Kòrɛ̃tòtɔwo 9 Bible Online

1Kòrɛ̃tòtɔwo 9 - gen bible

1Kòrɛ̃tòtɔwo 9

¹Nyè mu lè ɖokoe nyè sinua? Nyè mu nyi *àmèdɔ̃dɔ̃ ò a? Nyè mu kpɔ Yesù, miabe Tɔhonɔ̀ ò a? Mì mu nyi àpe èdɔwɔ̀wɔ be ènukuwo lè Tɔhonɔ̀ mèa?

²Ne nyè mu nyi *àmèdɔ̃dɔ̃ na àmè ɖewo ò a, mù nyi ì na mìawo ya. Đo mìawo ye nyi àpe àmèdɔ̃dɔ̃ be jèsìdo, lè Tɔhonɔ̀ mè.

³Ekèa ye mù sɔ le hlùɛ̃ èta na ɖokoe nyè, lè àmè kèwo sɔ ènyà ɖo ŋuti nyèawo be ŋùmè.

⁴Eŋuã, mu nyɔ be woa na mù ènu ɖùɖu kudo ènu nùnu ne èdɔ kè mi le wɔ̀ ò a?

⁵Mu jè be ma kplɔ̀ nyɔ̃nù xɔ̀sètɔ kè la nyi èsrɔ̃ nyèa, ɖo ŋuti, sìgbè àlekè àmèdɔ̃dɔ̃ kpɔ̀tɛawo, Tɔhonɔ̀ be nɔ̀viwo kudo Kefàs, wo wɔ̀ ɛ̀a nène òa?

⁶Àlo ènyè kudo Barnabas kpò ye la wɔ̀ èdɔ sɔ kpɔ mia ɖokoewo jia?

⁷Àmè kɛ ye wɔ̀na gbãdãgbã be èdɔ, eye be tuna èfɛ̃ na ye ɖokoe ò? Àmè kɛ ye dènà vɛ̃-gble, eye mu ɖùnà yebe èkusɛ̃sɛ̃ ò? Àlo àmè kɛ ye nyìnà èlã, eye mu nùnà yebe ànɔsi ò?

⁸Ekèawo nyi àgbètɔ be wɔ̀na kpòa? Èsea cã mu le gblɔ̃ nènea kea?

⁹Wo ŋlɔ̀ ɖo Mosè be Èsea mè be: “Mù gbà bla ènu na ènyì-su kè le tùkù *èlùa ò.” Mawu le ve ènyì sua nu ye à?

¹⁰Lè nyàwo toto mèa, mu nyi miawo ye Mawu le pò nupo na òa? Ɛ̃ miawo ye wo ŋlɔ̀ ekèa ɖɛ na. Àmè kè le dè àgblèa, ne dè è, lè ŋùɖo mè, eye àmè kè le tùkù *èlùa, ne tùkù ì, lè ŋùɖo mè be yè la kpɔ àjɔ̀, la xɔ̀ so e mè.

¹¹Ne mi do gbɔ̃gbɔ̃ mè be nyɔnawo ɖo mìa mèa ɖe, mi le bà mì, ne mi ji be mia yà mìabe xixe mè be àdɔ̀kùnuwo a?

¹²Ne àmè ɖewo ɖo àcɛ̀ ŋua ɖo mìa jia, mia yaa, mi mu ɖo è wu òa? Gãkea, mi mu zã èmɔnu ŋua ò. Bòhũa, mi xɔ̀nà ènu sia ènu kpoo, àleke be mi mu gbà nyi àfɔ̀klɛ̃nu na Kristò be àŋɛ̀nyuɛ̃ a ò.

¹³Mì mu nya be àmè kèwo wɔ̀nà èdɔ lè mawuxɔ mèa, sɛ̃sɛ̃dɔa ye nyìnà wo, eye àmè kèwo sumɔna lè vɔsakpe ŋutiawo kpɔna woabe ènu ɖùɖu so vɔsakpea ji òa?

¹⁴Èmɔ ŋua ke ji ye Tɔhonɔ̀ ɖè ègbè to, be àmè kèwo le do Àŋɛ̀nyuɛ̃ a, Àŋɛ̀nyuɛ̃ a dodo mè ye wo la nɔ kpɔ ènu ɖù lè.

¹⁵Èmɔnu lè be ma zã ŋusɛ̃ kèa na ɖokoe nyè, vɔ̀a, nyè mu le ŋlɔ̀ xoma kèa, sɔ le biɔ ɛ̀ ò. E la nyɔ na mù be ma ku bòhũ. Àmè ɖekpe mu la teŋu xɔ̀ ŋùmè jèje na àmè ɖokoe kèa lè àsi nyè ò.

¹⁶Àŋɛ̀nyuɛ̃ a dodo mu nyi jajra be ènu na mù ò. Èdɔ do àsi ye be nyi na mù be ma wɔ̀ godo, eye bàbàa na mù ne nyè mu do Àŋɛ̀nyuɛ̃ a òa!

¹⁷Ne mù wɔ̀ ekèa ku nyè ŋutɔ àpe èjro nyuɛ̃a, eŋuã, fɛ̃tu la so e mè na mù. Vɔ̀a, ne wo zĩ ji nyè ye à, eŋuã, àmè lè àmègbɔ be èdɔ do àsi ye be nyi na mù.

¹⁸Fifìa, nukɛ ye le nyi àpe èfɛ̃tu ò? Eye le nyi be Àŋɛ̀nyuɛ̃ kè mù le do a, ma do è gbalo, eye ma ɖè àsi lè ènu kèwo ɖo la so e mè na mùawo ŋuti.

¹⁹Togbɔ be mù vò, eye nyè mu nyi àmè ɖe be kluvi ò cã a, mù sɔ ɖokoe nyè wɔ̀ àmèwo keŋu be sumɔ̃vi, àleke be àmè sùgbɔ ne xɔ̀ Kristò ji sè.

²⁰Ne ma teŋu kplɔ̀ Yudàviwo va ne woa xɔ̀ Kristò ji sè a, mù lè sìgbè Yudàvi nène. Ne ma teŋu kplɔ̀ àmè kèwo lè èsea gɔ̃mèawo va ne woa xɔ̀ Kristò ji sè a, mù lè sìgbè àmè kè lè èsea gɔ̃mè nène; vɔ̀ nyè ŋutɔ nyè mu lè nène ò.

²¹Nène a kea, mù lè àmè kèwo si *èse mu lè òawo dòmè, sìgbè àmè mà-ɖo èse nène. Gãkea, nyè mu dokpò Mawu be èsea nyanya ò, ɖo Kristò ye nyi àpe èsea ne woa xɔ̀ e ji sè.

²²Mù lè àgbè sìgbè àmè gbɔjɔ nène, lè àmè kèwo gbɔjɔ lè xɔ̀sè mèawo dòmè, ne woa xɔ̀ Kristò ji sè.

²³Mù le wɔ̀ ènu kèawo keŋu ɖo Àŋɛ̀nyuɛ̃ a ŋuti, ne ma kpɔ gomè lè yebe sìtua mè.

²⁴Mì mu nya be àmè kèwo le hlùɛ̃do lè èdùpupeawo keŋu le kèɖì, vɔ̀a àmè ɖèka kpò ye la xɔ̀ àjɔ̀a ò a? Mì jè àgbàgba ne mìa kpɔ ɛ̀ xɔ̀.

²⁵Àmè kèwo drɛ̃nà lãmèsɛ̃ be àvũawo nyana woa ɖokoewo zãzã lè ènuwo keŋu mè. Wo wɔ̀nà ekèa, ne woa kpɔ bùbu be jèsi kè gblenaa xɔ̀. Vɔ̀a miawo yaa, na jèsì kè mu gblena gbèɖe ò a.

²⁶Ye ŋuti mù le hlùɛ̃do, mu nyi ŋùkuvi gbãgbã nɔ̀ tɔ̀ ò. Mù le wɔ̀ àvũ, mu nyi be mù le dà èkɔ̃ ɖo àyà mè kpò ò.

²⁷Vɔ̀a, mù le do nupo na àpe àmètia, ne ma kpe e ji, ne mu gbà nyi be, ne mù do àŋɛ̀a na àmè buwo vɔ̀a, woa va gbe nyè ŋutɔ ò.