Read gen 2Kòrɛ̃tòtɔwo 10 Bible Online

2Kòrɛ̃tòtɔwo 10 - gen bible

2Kòrɛ̃tòtɔwo 10

¹Ènyè Paolò ŋutɔ, mù le biɔ mì, to Kristò be hòmèfà, kudo yebe àdɔ̀mènyuɛ̃ ji, ènyè kè nyi àmè bɔ̀bɔɛ, ne mù lè mìa dòmèa, vɔ̀a wɔ̀nà kãlì ɖo mìa ta, lè àfi bua!

²Mù le ɖè kuku na mì be, mì mu gbà zĩ ji nyè, ne mù va mìa gbɔa, ne ma wɔ̀ kãlì ò. Đo mù jro be ma ɖè kãlìwɔ̀wɔ nyèa fiɔ àmè kèwo susuna be, mi zɔ̃nà lè ŋutilã mèa.

³Togbɔ be mi le zɔ̃ lè ŋutilã mè coa, mi mu le wɔ̀ àhùa, zɔ̃ ɖo ŋutilã ji ò.

⁴Kpao! Miabe àhùa wɔ̀nuwo mu nyi ŋutilã tɔ̀ ò, vɔ̀a wo ɖo ŋusɛ̃ so Mawu gbɔ, kè mùnà *àgbògbò sɛ̃sɛ̃wo pu ànyi, ŋusɛ̃ kèa ye mi sɔ gbãnà gòyiyi be susuwo,

⁵ku jajra be ŋusɛ̃ kèwo keŋu sinatè ɖo Mawu nyanya ŋutia. Mi donagà susuwo keŋu ne woa sè ètonu na Kristò,

⁶eye mi sɔ̀gbè la dɔ̃ èto na ètotrìtɔwo keŋu, ne mì ɖè àsi lè mìa ɖokoewo ŋuti keŋu, le ɖo èto Kristò.

⁷Mì le ŋùkuvi ɖo ènu kèwo mì le kpɔa ŋuti! Ne àmè ɖe kã ɖo e ji be yè nyi Kristò tɔ̀a, ne gbà susu ekèa lè ye ɖokoe mè be, sìgbè lekè yè nyi Kristòtɔ̀ nènea, nènea ke ye miawo cã mi nyi Kristòtɔ̀a yeŋu.

⁸Ne mù gbà sɔ ŋusɛ̃ kè Tɔhonɔ̀ na mi, na mìabe tùtù ɖo, mu nyi na mìabe cɔ̃crɔ̃ òa, le yigò wunu, ŋutɔ cã a, èŋù mu la kpɛ̃ mù ò.

⁹Nyè mu jro be ma wɔ̀ sìgbè mù le do vɔ̃vɔ̃ na mì kudo àpe xoma awo nène ò.

¹⁰Đo, àmè ɖewo gblɔ̃nà be: “Yebe xomawo ɖona kpɛ̃kpɛ̃, eye wo sɛ̃naŋu. Vɔ̀a ne ye ŋutɔ ze a, e nyi àmè bɛɖɛ ɖe kpò, eye yebe nupo pòpo cã mu fiɔna ènu gãa ɖe ò.”

¹¹Àmè kè ɖo susu ŋuaa, ne nya ekèa nyuɛ̃ ɖe be, àmè kè ŋùkumè mi nyi lè ènyà gbɔ̃gblɔ̃ mè, lè miabe xoma awo mè, wàlɛbɛ kè mi mu lè mìa gbɔ òa, nènemea ke mi nyi lè miabe wɔ̀nàawo mè, ne mi lè mìa gbɔa cã.

¹²Đo, mi mu xà la hlɛ̃ mia ɖokoe ɖo àmè kèwo kafuna woa ɖokoea dòmè, àlo sɔ mia ɖokoe sɔ̀ kudo wo ò. Vɔ̀a, ekè wo sɔ woa ɖokoewo wɔ̀ jijènu na woa ɖokoewo, eye wo sɔ woa ɖokoewo le sɔ̀ kudo woa ɖokoewoa, ènunya hùe do wo.

¹³Miawo yaa, mi mu la yigò trã èmɔ ò, vɔ̀a, mi la yì ì, zɔ̃ ɖo jijeka be jije kè Mawu ma na mia ji, be mia va kaka mìa gbɔ cã.

¹⁴Đo mi mu to miabe jije kèa ŋuti wunu, sìgbè mi mu teŋu va mìa gbɔ nène ò. Mi sɔ Kristò be Àŋɛ̀nyuɛ̃ a va mìa cã mìa gbɔ.

¹⁵Mi mu le yigò to e mè, lè àmè buwo be èdɔwɔ̀wɔwo ŋuti ò. Vɔ̀a, mi ɖo ŋùɖo be, ne mìabe xɔ̀sè le sĩa, miabe èdɔ la sĩ yì e ji, lè mìa dòmè, sɔ zɔ̃ ɖo miabe jijeka ji,

¹⁶ne mia do Àŋɛ̀nyuɛ̃ a lè ànyigbã kèwo lè mìa godoawo cã ji, ne mi mu gbà yigò lè èdɔ kè wo wɔ̀ vɔ̀, lè àmè bu be èdɔwɔ̀pe ò.

¹⁷“Àmè kè le yigòa, ne yigò lè Tɔhonɔ̀ mè.”

¹⁸Mu nyi àmè kè le kafu ye ɖokoea, ye likè ò, vɔ̀a àmè kè Tɔhonɔ̀ kafua ye likè.