Read gen 2Kòrɛ̃tòtɔwo 11 Bible Online

2Kòrɛ̃tòtɔwo 11 - gen bible

2Kòrɛ̃tòtɔwo 11

¹Tàflacɛ, mù jro be mìa dojì, la kpɔ àlekè mù flù ɖoa ɖa, vi ɖe. Ɛ̃ɛ, mì dojì, ne mìa sè e gɔ̃mè na mù jro!

²Mù le hùãŋu ɖo mìa ta, ku mawume be ŋuhuã. Ŋusù ɖèka ye mù sɔ mì àgɔ̀ na, ne ma teŋu sɔ mì na Kristò, sìgbè tùgbɛ̀jɛ lè àlɔ̀ ji nène.

³Vɔ̀a mù le vɔ̃ be, èta mu nyɔ òa, mìabe susuwo la titɔ, la trɔ lè èjì mè kɔ̀kɔ̀ɛ kè Kristò le ji so mìa sia gbɔ, sìgbè lekè èdãa sɔ àyè blè Evà-a nène.

⁴Ne àmè ɖe va le do Yesù bu be àŋɛ̀, tovò na ekè mi do sãa, àlo ne mì xɔ̀ gbɔ̃gbɔ̃ bu kè tovò na ekè mì xɔ̀ sãa, àlo ne mì xɔ̀ àŋɛ̀nyuɛ̃ bu, tovò na ekè mì xɔ̀ sãa, mì donajì xɔ̀nà ɛ̀ nyuɛ̃ ɖe.

⁵Mù susu be, mìabe *àmèdɔ̃dɔ̃ gã ŋuawo mu sɔ ènu ɖekpe wu mù ò.

⁶Ne nyè mu nya nupo pòpo òa, mù nya ènu ya. Mi ɖè ekèa fiɔ, lè ènu sia ènu mè, lè ègo sia ègo mè.

⁷Àlo àgɔ̀ ye mù jè, ekè mù bɔ̀bɔ̀ ɖokoe nyè, sɔ kɔ mì yìji, wàlɛbɛ kè mù do Mawu be àŋɛ̀nyuɛ̃ a na mì, fɛ̃tu ma xɔ̀a?

⁸Mù xɔ̀ ènu lè èhabɔ̀bɔ buwo si, lɔ̃, xɔ̀ fɛ̃tu lè woa si, sɔ va sumɔ mì.

⁹Wàlɛbɛ kè mù nɔ̀ mìa gbɔ, eye mù jè èhiã mèa, nyè mu bà àmè ɖe ò; ɖo nɔ̀vi kèwo so Màkedonìa vaa, na mù ènu kèwo dɛ̃ mùa. Lè èmɔ sia èmɔ nua, mù kpɔ ɖokoe nyè ji, ne nyè mu gbà nyi àgbã lè èkɔ̀ ji na àmè ɖekpe ò, eye mù gbà la kpɔ ɖokoe nyè ji nènea ke.

¹⁰Kaka kè Kristò be nyàwo a lè mè nyèa, wo mu la xɔ̀ gòyiyi kèa lè àsi nyè lè Akayìa be àgowo ji ò.

¹¹Nukɛ ŋuti ye ò? Be nyè mu lɔ̃ mì òa? Mawu nya ɛ̀!

¹²Ènu kè mù le wɔ̀a, mù la gbà wɔ̀ ɛ̀ kpò ye, ne ma sɔ xe èmɔ na àmè kèwo le ji èmɔnu la sɔ nɔ yigò be yèwo lè sìgbè miawo ke nènea.

¹³Àjè be *àmèdɔ̃dɔ̃wo ye àmè kèawo nyi, wo nyi èdɔwɔ̀tɔ àmèblètɔwo, àmè kèwo le trɔ woa ɖokoewo sɔ wɔ̀ Kristò be àmèdɔ̃dɔ̃wo.

¹⁴Ekèa mu wɔ̀ ŋùdã ò, Satana ŋutɔ cã trɔna ye ɖokoe wɔ̀nà kɔ̀kɔ̀ɛ be àtikplɔtɔ.

¹⁵Ye ŋutia, ekèa mu ɖì ènu ɖe, ne yebe sumɔ̃viwo trɔ woa ɖokoewo, wɔ̀ jɔ̀jɔɛ nyinyi be sumɔ̃viwo ò. Woabe vɔ̀vɔnu la nɔ̀ sìgbè woabe èdɔwo nène.

¹⁶Mù gbà le gblɔ̃ ɛ̀ ke, be àmè ɖe mu gbà nɔ kpɔ mù sìgbè sùkunɔ̀ nène ò. Vɔ̀a ne mì le yɔ mù nènea, eŋuã, mì xɔ̀ mù sìgbè sùkunɔ̀ nène, ne nyè cã ma teŋu yigò vi ɖe.

¹⁷Ènu kè mù le gblɔ̃ fifìa, nyè mu le gblɔ̃ ɛ̀, zɔ̃ ɖo Tɔhonɔ̀ tɔ̀ ji ò, vɔ̀a sìgbè sùkunɔ̀ nène, lè gòyiyi kèa be kãkã ɖo e ji mè.

¹⁸Ekè àmè sùgbɔ sɔ xixe mè be ènuwo le yigòa, nyè cã mù la yigò.

¹⁹Mì, àmè kèwo ye nyi ènunyatɔwoa, mì xɔ̀nà sùkunɔ̀wo fàa.

²⁰Ne àmè ɖe sɔ mì wɔ̀ kluviwoa, ne àmè ɖe wɔ̀ ènuveve ku mì, ne àmè ɖe bà mì, ne àmè ɖe mu kpɔ mì ɖo èmɔ ɖe nu ò, ne àmè ɖe pò ŋùmè na mìa, mì do jì xɔ̀nà ɛ̀ fàa.

²¹Mù le gblɔ̃ ɛ̀ ne èŋù ne kpɛ̃ mi, sìgbè ɖe ye mi nyi àmè gbɔjɔwo nène. Gãke a, ènu ɖekpekpe kè mè, àmè la dojì, la yigò lè a, mù le gblɔ̃ sùkunɔ̀-nyà, nyè cã mù la dojì, la yigò lè e mè.

²²Hebrùviwo ye wo nyia? E ye ke nyè cã mù nyi. Izràɛlviwo ye wo nyia? E ye ke nyè cã mù nyi. Abràham be ènuku ye wo nyia? E ye ke nyè cã mù nyi!

²³Kristò be sumɔ̃viwo ye wo nyi à? Mù la gblɔ̃ sùkunɔ̀-nyà. Mù nyi ì wu wo! Mù wɔ̀ èdɔ wu wo, mù nɔ̀ ègàkpa mè wu wo, wo pò mù wu wo, mù kpɔ àfɔ̀ku sùgbɔ eye mù na àsi èku wu wo.

²⁴Yudàviwo sò èba na mù, ègbã vɔ àsiɖèkɛ, zè àtɔ̃;

²⁵wo pò mù ku àtãŋù, zè ètɔ̃, wo pò èkpe mù, zè ɖèka; èhũ nyrɔ̃ ku mù, zè ètɔ̃. Mù nɔ̀ àpùmè, èzã ku kedè.

²⁶Mù zɔ̃ èmɔ eji-eji, lè àfɔ̀ku mè, lè ètɔ̀wo ji, lè àfɔ̀ku mè lè fìãfìwo dòmè, lè àfɔ̀ku mè, lè èdu-gã mè, lè àfɔ̀ku mè, lè zògbè ji, lè àfɔ̀ku mè lè àpù ji, lè àfɔ̀ku mè, lè nɔ̀vi vuɛ̃wo dòmè;

²⁷lè àgbàgba jèje kudo flima cici mè, lè ŋùtè nɔ̀nɔ mè eji-eji, lè àdɔ̀wùamè kudo sìkɔ tì àmè mè, lè *ènubabla mè eji-eji, lè àvìvɔ kudo àma cici mè.

²⁸Tovò na ekèawoa, èhabɔ̀bɔwo keŋu be wudowo nyi àgbã na mù, ŋùkè-ŋùkè.

²⁹Àmè kɛ gbɔjɔ, eye nyè mu gbɔjɔ ò? Àmè kɛ wo nyi àfɔ̀klɛ̃ na, eye nyè mu xɔ̀ ɛ̀ ve ò?

³⁰Ne e jè be, ma yigòa, mù la yigò ɖo àpe gbɔ̀jɔ̀gbɔjɔa ŋuti.

³¹Mawu, mia Tɔhonɔ̀ Yesù Kristò be Ètɔ, àmè kè wo la na gogo kaka sɔ yìa, nya be, nyè mu le ɖà àjè ò.

³²Lè Dàmaskòa, èfìɔ Aretà be Èdùjiɖùtɔa na be wo ɖia Damaskò be èdùa ne woa le mù.

³³Vɔ̀a, wo sɔ mù do àjàfi mè, to flɛsɛ̀-nu, ɖiɖi mù sɔ fla èglì, eye mù si lè woa si mè.