Read gen 2Kòrɛ̃tòtɔwo 12 Bible Online

2Kòrɛ̃tòtɔwo 12 - gen bible

2Kòrɛ̃tòtɔwo 12

¹E jè be ma yigò, togbɔ be mu nyɔ ò. Gãkea mù la pò nupo so Tɔhonɔ̀ be àvìmènuwo kudo yebe ɖèɖèfiɔwo ŋuti.

²Mù jèsi ŋusù ɖe lè Kristò mè, èpè woènè ye nyi ekèa. Mawu kɔ àmè kèa yì kaka jiŋùkusi ètɔ̃gɔ̃a (ne ŋutilã mè be nɔ̀ ò, nyè mu nya ò; àlo mu nɔ̀ ŋutilã mè ò, nyè mu nya ò. Mawu ye nya ɛ̀.)

³Eye mù nya be àmè kèa (ne ŋutilã mè be nɔ̀ ò, àlo mu nɔ̀ ŋutilã mè ò, nyè mu nya ò. Mawu ye nya),

⁴Mawu kɔ ɛ̀ yì kaka Mawu be fìɔdua mè, eye be sè ènyà kèwo wo mu teŋu gblɔ̃ ò, ekèwo wo mu na èmɔ àgbètɔ be ne gblɔ̃ òa.

⁵Mù la sɔ àmè kèa yigò; nyè mu la sɔ ɖokoe nyè yigò, ne mu nyi lè àpe gbɔ̀jɔ̀gbɔjɔwo ŋuti ò.

⁶Đo ne mù jro la yigòa, nyè mu la nyi yɛ̀yìnɔ̀ ò, mù la to nyàwo bòhũ. Vɔ̀a, nyè mu la wɔ̀ ɛ̀ ò, ne àmè ɖe mu gbà bù mù wu àlekè be kpɔna àlo sènà so nu nyè ò.

⁷Ne nyè mu gbà kɔ ɖokoe nyè yìji wunu, ɖo ɖèɖèfiɔ kèwo wo sɔ fiɔ mùa ŋuti òa, wo sɔ àŋùja ɖe trɔ̃ ŋutilã mè na mù, sìgbè Satana be àmè dɔ̃dɔ̃ ne bèa pò mù nène, ne nyè mu gbà kɔ ɖokoe nyè yìji wunu ò.

⁸Mù blìbɔ̀ na Tɔhonɔ̀, zè ètɔ̃, ne bèa ɖè è to lè lãmè na mù.

⁹Vɔ̀a, e to na mù be: “Màje nyèa sù na wò; ɖo ŋusɛ̃ nyèa zɔ̃nà sù lè gbɔ̀jɔ̀gbɔjɔ mè.” Ye ŋutia, mù lɔ̃ be, ma yigò, lè àpe gbɔ̀jɔ̀gbɔjɔwo mè, ne Kristò be ŋusɛ̃ ne nɔ̀ mè nyè.

¹⁰Ye ŋutia, èjì jɔ̀nà mù lè gbɔ̀jɔ̀gbɔjɔwo mè, lè èzũwo mè, lè èhiãwo mè, lè yomètĩtĩwo kudo vevesèsewo mè ɖo Kristò ta; ɖoa, wàlɛbɛ kè mù gbɔjɔa, wàlɛbɛ ŋua ye mù sɛ̃naŋu.

¹¹Ye ŋua! Mù flù vɔ̀! Mìawo ye na! Mìawo ye ɖo la kafu mù keŋu gbɔ̀xue! Đo mìabe *àmèdɔ̃dɔ̃ gã ŋuawo dòmètɔ ɖekpe mu wu mù lè ènu ɖekpe mè ò, togbɔ be nyè mu nyi ènu ɖekpe ò.

¹²Jèsìdo kèwo ye kplɔ̀nà *àmèdɔ̃dɔ̃wo do a, nyi ènu kèwo mù ɖè fiɔ lè mìa dòmèa: èjìgbɔ̃ɖɛ blɛ̀wù lè tètèkpɔwo keŋu mè, ŋùdãdɔwo, nùkunuwo, ŋusɛ̃dɔwo.

¹³Nukɛ ye èhabɔ̀bɔ kpɔ̀tɛawo sɔ wu mì, ne mu nyi lè ekèa mè be, nyè ŋutɔ nyè mu nyi àgbã lè èkɔ̀ ji na mì ò? Mì sɔ màjɔ̀ màjɔ wɔ̀wɔ kèa kè mù.

¹⁴Kpɔɖa, zè ètɔ̃gɔ̃a ye nyi ekèa, mù sɔ̀gbè, la va mìa gbɔ, eye nyè mu la nyi àgbã lè èkɔ̀ ji na mì ò; ɖo nyè mu le ji mìabe ènu ɖoɖowo ò, vɔ̀a, mìa ŋutɔwo ye mù le ji. Mu jè be, èviwo ne bɔ̀ àdɔ̀kùnu ɖɛ ne àjìtɔwo ò, vɔ̀a àjìtɔwo ye bɔ̀nà ɛ̀ ɖɛ na ɖèviwo.

¹⁵Ènyè yaa, mù lɔ̃ be, ma zã ènu, eye ma zã ɖokoe nyè bliboa ɖo mìabe èklawo ta. Ekè mù lɔ̃ mì sùgbɔa, ye ŋuti mì lɔ̃ mù vi ɖe ɖoa?

¹⁶Nyàwo ye be nyi, nyè mu nyi àgbã le kpɛ̃ mì ò! Vɔ̀a, ekè àyè lè àsi nyèa, mù le mì ku àyè!

¹⁷Mù bà mì to àmè kèwo mù dɔ̃ ɖoɖa mìa dòmètɔ ɖe jia?

¹⁸Mù pò nupo na Titò, eye mù dɔ̃ ɛ̀ ɖoɖa ku nɔ̀vi kè be ènyà mù gblɔ̃a. Titò bà mìa? Mu nyi susu ɖèka ŋua ke ji kpò mi zɔ̃ ɖoa?

¹⁹So xoxo xòxòa, mì le susu be, mi le hlùɛ̃ mia ɖokoewo ta lè mìa gbɔ ye à? Aò! Mi le pò nupo lè Mawu be ŋùmè, lè Kristò mè. Eye, àmè ɖèvewo, mi le gblɔ̃ ènu kèawo keŋu na mìabe ŋùkɔ̀yìyi.

²⁰Đo mù le vɔ̃ be, ne mù vaa, nyè mu la kpɔ mì sìgbè àlekè mù le jro a nène ò. Mù le vɔ̃ be àjrè wɔ̀wɔ, ŋuhuã, àdɔ̀mèze dodo, èjì bibi, àmè gɔ̃mè ɖùɖu; lɛlo wɔ̀wɔ, hɛ̀wùwu, hũnyàhũnyà wɔ̀wɔ mu gbà nɔ̀ mìa dòmè ò.

²¹Mù gbà le vɔ̃ be, ne mù gbà trɔ vaa, Mawu la ɖè mù kpɔ̀tɔ̀ lè mìabe ŋùkɔ̀. E teŋu va e mè be mù la fã àvi ɖo àmè kèwo kpɔ̀tɔ̀ le wɔ ènuvuɛ̃ lè mìa dòmè, sìgbè sãa nèneawo ta, wo mu ɖɔ̀lì èdɛ̃ lè màkɔ̀ màkɔ kudo gbòlò wɔ̀wɔ gbàkudo èdɛ̃ vuɛ̃ kèwo wo wù sãawo mè ò.