Read gen 2Kòrɛ̃tòtɔwo 2 Bible Online

2Kòrɛ̃tòtɔwo 2 - gen bible

2Kòrɛ̃tòtɔwo 2

¹Mù ɖo è be, nyè mu gbà la va mìa gbɔ, ne àpe vavaa, mu gbà do mì àkpɔ̃ ò.

²Đo, ne mù do mì àkpɔ̃a, àmè kɛ ye la do jìjɔɛ na mù, wu àmè kè nyè ŋutɔ mù jo do àkpɔ̃a ò?

³Eye mù ŋlɔ̀ ekèa ke ɖoɖa mì be, ne mù vaa, nyè mu gbà kpɔ àkpɔ̃ so àmè kèwo ɖo la do jìjɔɛ na mùawo gbɔ ò: mù ɖo jìdo kèa ɖo mìa keŋu ŋuti be, àpe jìjɔ̀ɛ a nyi mìa keŋu tɔ̀.

⁴Đo àyàɖùɖu sùgbɔ kudo èjì be veve sèse sùgbɔ mè ye mù ŋlɔ̀ xoma ɖoɖa mì lè, kudo àɖàsì sùgbɔ; mu nyi ne mìa ɖo àkpɔ̃ ò, vɔ̀a ne mìa nya lɔ̃lɔ̃ kè mù ɖo na mìa be gbɔsùsu.

⁵Ne àmè ɖe hɛ̃ àkpɔ̃ vaa, mu nyi ènyè kpò be do àkpɔ̃ ò, vɔ̀a, ne nyè mu gbà gblɔ̃ ɛ̀ wunu ò a, lè àkpa ɖe a, mìawo keŋu ye.

⁶Ènyà kè mìa dòmètɔ sùgbɔ la gbe na nènemea sù xoxo;

⁷ekèa ŋutia, mì sɔ ɛ̀ kè è, ne mìa fa àkɔ na ɛ̀ bòhũ, ne àkpɔ̃ mu gbà ɖɔ nèneme kèa wunu ò.

⁸Ye ŋutia, mù le pò fiɔ mì be, mìa gbìgbɔ̀ ɖè lɔ̃lɔ̃ fiɔ ɛ̀.

⁹Đo ekèa ŋuti ke ye mù ŋlɔ̀ xoma ɖoɖa mì, ne ma kpɔ be mì sènà ètonu lè ènuwo keŋu mè màa.

¹⁰Àmè kè mì sɔ ènu ɖe kèa, nyè cã mù sɔ ɛ̀ kè è. Ne ènyè yaa, mù sɔ ènu ɖe kè è tututua, mù sɔ ɛ̀ kè, ɖo mìa ŋuti, lè Kristò be ŋùmè.

¹¹Nène a, Satana mu la kpɔ èmɔ lè mia ŋuti ò, ɖo mi mu dã yebe àyè ɖoɖowo ò.

¹²Mù va Troa ne ma do Kristò be àŋɛ̀nyuɛ̃ a, eye togbɔ be Tɔhonɔ̀ hũ àgbo na mù gã ɖe be ma wɔ̀ èdɔ lè funua cã,

¹³nyè mu kpɔ jɛ̃gbɔ̃gbɔ̃ lè susu mè ò, ɖo nyè mu kpɔ Titò, nɔ̀vi nyè ò. Ekèa ŋuti ye mù sìa wo, eye mù ɖota Màkedonìa.

¹⁴Àkpe ye jè na Mawu, kè nana mi jiɖùɖu wè sia wè, lè Kristò mè. E tona mia ji, ɖènà Kristò fiɔ, lè àfi sia àfi, sìgbè lekè lifi be hɔ̃hɔ̃ɛ kãkãnàa nène.

¹⁵Lè nyàwo toto mèa, mi le nyi Kristò be hɔ̃hɔ̃ɛ nyuɛ̃ na Mawu, lè àmè kèwo gãawo kudo àmè kèwo crɔ̃awo dòmè.

¹⁶Na àmè ɖewoa, mi nyi èku be hɔ̃hɔ̃ɛ kè nana èkua. Na àmè buwoa, mi nyi hɔ̃hɔ̃ɛ kè nana àgbè a. Eye àmè kɛ sù, eye be jè na ènu kèawo ò?

¹⁷Đo mi mu lè sìgbè àmè sùgbɔ kèwo le tro Mawu be ènyàa nène ò. Vɔ̀a, àmè kèwo ɖo ànùkuare be veve dodoawo, ye mi nyi, eye mi nyi Mawu tɔ̀wo. Mi le pò nupo lè Kristò mè, lè Mawu be ŋùmè.