Read gen 2Kòrɛ̃tòtɔwo 3 Bible Online

2Kòrɛ̃tòtɔwo 3 - gen bible

2Kòrɛ̃tòtɔwo 3

¹Mi la gbà nɔ kafu mia ɖokoewo ye à? Àlo, sìgbè, na àmè ɖewo nènea, e lè veve ɖe be, miawo cã, mia hɛ̃ *kafu xoma va na mì, àlo mia xɔ̀ *kafuxoma so mìa gbɔ ye à?

²Mìawo ye le nyi miabe xoma kè wo ŋlɔ̀ ɖo miabe èjìwo mè, ekè àmèwo keŋu jèsi, eye wo hlɛ̃a.

³E ze peŋu be, mì nyi Kristò be xoma kè ye ŋutɔ ŋlɔ̀, eye mi sɔ va na mìa. Mu sɔ xomasi ŋlɔ̀ ɛ̀ ò, vɔ̀a Mawu àgbèagbèa be Gbɔ̃gbɔ̃ ye wo sɔ ŋlɔ̀ ɛ̀. Mu nyi ènu ŋlɔ̀kpewo ji wo ŋlɔ̀ ɛ̀ ɖo ò, vɔ̀a ɖo ŋutilã be ènu ŋlɔ̀kpewo ji, lè mìabe èjìwo mè.

⁴Mi le gblɔ̃ ekèa, ɖo mi ɖo kãkã ɖo e ji lè Mawu gbɔ, to Yesù Kristò ji.

⁵Mu nyi be, mi sù, lè mia ɖokoe sinu, ne mia susu ènu ɖe lè mia ŋutɔ mia ɖokoe mè kpò ò. Vɔ̀a Mawu ye na, mi teŋu wɔ̀nà ènu kèwo mi le wɔ̀awo.

⁶E ye ke na, mi sù, ne mia nyi *zòɖùɖu yeyea be sumɔ̃viwo, mu nyi lè *èse kè wo ŋlɔ̀a mè ò, vɔ̀a lè Gbɔ̃gbɔ̃ Kɔ̀kɔ̀ɛ a mè. Đo èse kè wo ŋlɔ̀a nana èku, vɔ̀a Gbɔ̃gbɔ̃ a nana àgbè.

⁷Wo ŋlɔ̀ èseawo ɖèka ɖèka, ɖo èkpe be ènu ŋlɔ̀kpewo ji. Eye Mawu be gogoa ze wàlɛbɛ ŋua. Eye Mosè be ŋùkumè le klɛ̃, àleke be Izràɛlviwo mu teŋu sɔ ŋùku ɖo e ji ò. Vɔ̀a, kɛ̃klɛ̃ kèa nɔ̀ ànyi kpòe ɖe kpò. Ne *èse kè be ŋusɛ̃ kplɔ̀nà àmè yìnà èku mèa, ɖè gogo gã kèa fiɔa,

⁸leke wɔ̀ Gbɔ̃gbɔ̃ be sumɔ̃vi-dɔa mu la ɖo gogo wu ò?

⁹Ne hùɛgbledo be sumɔ̃vi-dɔa ɖo gogoa, eŋuã jɔ̀jɔɛ nyinyi be sumɔ̃vi-dɔa sùgbɔ wu lè gogo mè.

¹⁰Ènu kè ɖo gogo sãa, mu gbà ɖo gogo lè èmɔ kèa nu ò, ɖo gogo kèa mu lè gbɔ̃gbɔ̃ mè ò.

¹¹Đo ne ènu kè klo va yìa, ɖo gogoa, àleke wɔ̀ ènu kè la nɔ̀ ànyia, mu la ɖo gogo wu ò.

¹²Ekè ŋùɖo kèa lè mia sia, mi le pò nupo kudo kãkã ɖo e ji gãa ɖe,

¹³eye mi mu le wɔ̀ sìgbè Mosè nène, àmè kè sɔ ŋùmèxenu cɔ̃ ŋùmè, ne Izràɛlviwo mu gbà kpɔ gogo kè klona va yìa be vɔ̀vɔnu ò.

¹⁴Vɔ̀a, woabe susuwo do vìvìti! Kaka va na egbè be ŋùkèkèa, ŋùmèxenu kèa kpɔ̀tɔ̀ lè *zòɖùɖu xoxoa be hɛ̃hlɛ̃ mè, ɖo Kristò mè kpò wo teŋu klo è jo lè.

¹⁵Kaka va na egbè be ŋùkèkèa, ne wo le hlɛ̃ Mosè be xoma a, ŋùmèxenua cɔ̃na woabe èjìwo.

¹⁶Gãkea, wàlɛbɛ kè wo trɔva Tɔhonɔ̀ gbɔa kpò ye ŋùmèxenua gɛ̃na.

¹⁷Tɔhonɔ̀ ye le nyi Gbɔ̃gbɔ̃ a, eye fikè Tɔhonɔ̀ be Gbɔ̃gbɔ̃ lèa, funua ye vòvo lè.

¹⁸Eye, mia kpata kè lè ŋùmè màcɔ̃a, mi le trɔ Tɔhonɔ̀ be gogo ɖoɖa sìgbè àpùpui nène, eye wo ɖɔ̀lì mi ɖo ŋùfɛ̃ ŋua ke mè, so gogo mè yì gogo mè, sìgbè àlekè e so Tɔhonɔ̀ be Gbɔ̃gbɔ̃ gbɔa nène.