Read gen 2Kòrɛ̃tòtɔwo 4 Bible Online

2Kòrɛ̃tòtɔwo 4 - gen bible

2Kòrɛ̃tòtɔwo 4

¹Lè yebe ŋuzĩzĩ kuku na mi mèa, Mawu sɔ sumɔ̃vi-dɔ kèa do àsi na mi. Ekèa ŋuti, mi mu le bu jìdo ò.

²Mi gbe bèbemè be ŋùkpɛ̃nuwo. Mi mu zɔ̃nà lè àyè vuɛ̃ mè ò, eye mi mu trɔna èta do ègũ na Mawu be ènyà ò. Bòhũa, lè nyàwo be ɖèɖèfiɔ mèa, mi le sɔ mia ɖokoe fiɔ àmèwo keŋu be *jìjigbè lè Mawu be ŋùmè.

³Vɔ̀a, ne wo cɔ̃ ènu miabe àŋɛ̀nyuɛ̃ a jia, wo cɔ̃ ènu ì na àmè kèwo le crɔ̃awo.

⁴Àmè kèawo mu xɔ̀sè ò. Đo Satana kè nyi xixe kèa be mawua, gbã ŋùkuvi na woabe ènunya, eye wo mu le kpɔ àŋɛ̀nyuɛ̃ a be kɛ̃klɛ̃ kè kù ɖo Kristò kè nyi Mawu be ŋùfɛ̃a be gogo ŋuti ò.

⁵Aò! Mi mu le do mia ŋutɔwo be àŋɛ̀ ò, vɔ̀a, Yesù Kristò, Tɔhonɔ̀a tɔ̀ ye mi le do. Miawo yaa, mìabe sumɔ̃viwo ye mi nyi, ɖo Yesù ŋuti.

⁶Đo a, Mawu kè gblɔ̃ be: “Kɛ̃klɛ̃ ne to so vìvìti mèa” ye nyi àmè kè klɛ̃ lè miabe èjìwo mè, ne Mawu be gogo be ènunya ne klɛ̃ lè Kristò be ŋùmè.

⁷Vɔ̀a àdɔ̀kùnu kèa lè mìa si, lè èkɔzewo mè, ekèa le ɖè è fiɔ be ŋusɛ̃ kèa be gbɔsùsu so Mawu gbɔ, mu nyi mia gbɔ be so ò.

⁸Wo xa mi lè èmɔ sia èmɔ nu, gãke gbɔ̃gbɔ̃ mu ci pò na mi ò. Miabe àyè gbãdo, gãke mi mu bu ŋùɖo ò.

⁹Wo tĩ mia yomè, gãke wo mu gble mi ɖɛ ò. Wo pu mi ànyi, gãke wo mu crɔ̃ mi ò.

¹⁰Eji-ejia, mi xɔ̀nà Yesù be èku ɖo miabe ŋutilã mè, yìnà àfi sia àfi, ne Yesù be àgbè a ne ze lè miabe ŋutilã mè.

¹¹Đo wè sia wèa, wo sɔna mi, àmè kèwo lè àgbèawo, do àsi na èku, ɖo Yesù ŋuti, ne Yesù be àgbè a cã ne ze lè miabe ŋutilã kukua mè.

¹²Ye ŋutia, èku wɔ̀nà èdɔ lè mia mè, vɔ̀a àgbè lè mìa mè.

¹³Ekè mi ɖo xɔ̀sè be gbɔ̃gbɔ̃ ŋua ke, sìgbè àlekè wo ŋlɔ̀ ɛ̀ ɖɛa nène be: “Mù xɔ̀sè, ye ŋuti mù pò nupo ɖoa”, mia cã mi xɔ̀sè, ye ŋuti mia cã mi le pò nupo ɖo.

¹⁴Đo mi nya be, àmè kè fɔ̃ Tɔhonɔ̀ Yesùa, la fɔ̃ mia cã kudo Yesù, eye e la sɔ mi kudo mì ɖo tè lè yebe ŋùmè.

¹⁵Eye, mìawo ŋuti ye ènu kèawo keŋu jɔ̀ ɖo, àleke be màje kè sùgbɔ, to àmè sùgbɔ jia, ne na àkpedodowo ne sùgbɔ na Mawu be gogo.

¹⁶Ye ŋutia, mi mu le gbɔjɔ ò, eye, ne miabe àmèti kè lè gàglàgbèa gble cã a, miabe àmèti kè lè mia mèa trɔna yeye gbè sia gbè.

¹⁷Đo a, miabe hùenu vi ɖe be àyàɖùɖu kèawo hùe wu gogo kòkòɖàbì gãa kè wo le jrà ɖo ɖɛ na mia.

¹⁸Đo mi mu sɔna ŋùku ɖo ènu kèwo wo kpɔnaawo ji ò, vɔ̀a, ènu kèwo wo mu kpɔna òawo ji ye mi sɔna ŋùku ɖo; ɖo ènu kèwo wo kpɔnaawo lè na hùenu vi ɖe kpò. Vɔ̀a, ènu kèwo wo mu kpɔna ò a, nɔ̀nà ànyi tɛ̀gbɛ̀.