Read gen 2Kòrɛ̃tòtɔwo 6 Bible Online

2Kòrɛ̃tòtɔwo 6 - gen bible

2Kòrɛ̃tòtɔwo 6

¹Ekè mi nyi èdɔwɔ̀tɔwo ku Mawu a, mi lè pò fiɔ mìa cã be, mì mu gbà xɔ̀ Mawu be màjea gbalo ò.

²Đo e gblɔ̃ be: “Mù ɖo èto wò, ɖo àmè hùenu, eye mù do wò àlɔ̀, lè hlùɛ̃gã be àzã gbè.” Kpɔɖa, fifì ye nyi màje be hùenu, Kpɔɖa, fifì ye nyi hlùɛ̃gã be àzã gbè.

³Mi mu jro la na àfɔ̀klɛ̃nu ɖe lè ènu ɖekpe mè ò, àleke be, wo mu gbà kpɔ ènyà ɖe la gblɔ̃ so miabe sumɔ̃vi-dɔa ŋuti ò.

⁴Bòhũa, lè ènuwo keŋu mèa, mi ɖènà mia ɖokoewo fiɔ, sìgbè Mawu be sumɔ̃viwo nène, mi dona vevevènu ŋutɔ, lè jɔ̀gbèvuɛ̃wo mè, lè àyàɖùɖuwo mè, lè vɔ̃vɔ̃wo mè, lè èhiãwo mè, lè vevesèsewo mè,

⁵lè pòpowo mè, lè ègàkpawo mè, lè èzĩ tɔ̀tɔwo mè. Mi donajì lè ènutìkɔ̀wo mè, lè ŋùtè nɔ̀nɔwo mè, lè àdɔ̀wùamèwo mè, lè *ènùbablawo mè.

⁶Miabe èjì mè nɔ̀nà kɔ̀kɔ̀ɛ, mi ɖènà Mawu be ènunya fiɔ, mi hɛ̃nà àmè blɛ̀wù, mi wɔ̀nà àdɔ̀mènyuɛ̃. Gbɔ̃gbɔ̃ Kɔ̀kɔ̀ɛ a lè ku mi. Mi lɔ̃nà àmè lè nyàwototo mè.

⁷Mi tona nyàwo, lè Mawu be ŋusɛ̃ mè. Jɔ̀jɔɛ nyinyi be àhùawɔ̀nu ye mi sɔna hlùɛ̃nà mia ɖokoewo ta.

⁸Àmèwo kɔna mi yìji, vɔ̀ gbà dona vlo mi. Wo kafuna mi, vɔ̀ gbà ɖìnà gbɔ mi. Wo sɔ mi sìgbè àjèɖàtɔwo nène, gãke mi nyi nyàwo totɔwo;

⁹sìgbè àmè kèwo wo mu jèsi ò nène, gãke wo jèsi mi; sìgbè àmè kèwo kua nène, gãke kpɔɖa, mi lè àgbè. Wo pònà mi, gãke wo mu wùnà mi ò.

¹⁰Wo nana, mi ɖɔna ku àkpɔ̃, gãke mi gbà nɔ̀nà jìjɔɛ mè, wè sia wè. Wo susu be mi nyi wɔ̀amènɔ̀wo, gãke mi le wɔ̀, àmè sùgbɔ le trɔ zũ àdɔ̀kùnɔ̀wo. Wo susu be mi mu ɖo ènu ɖekpe ò, gãke mi ɖo ènu sia ènu.

¹¹Mi pò nupo na mì fàa. Kòrɛ̃tòtɔwo, miabe èjì lè kèkè ɖɛ na mì.

¹²Mi mu tu miabe èjì do mì ò. Mìawo ye tu mìabe èjì do mi.

¹³Mù le pò nupo na mì sìgbè èvi nyèwo nène, mì wɔ̀ sìgbè miawo nène, ne mìa cã, mìa hũ mìabe èjì na mi fàa.

¹⁴Mì mu gbà nɔ̀ do màxɔ̀sètɔwo be èhà ò. Đo èhadodo kɛ ye lè jɔ̀jɔɛ nyinyi kudo *èse ji dàda dòmè, àlo xòmèdodo kɛ ye lè kɔ̀kɔ̀ɛ kudo vìvìti dòmè ò?

¹⁵Ègbènɔ̀du kɛ ye lè Kristò ku Belal dòmè, àlo mamã kɛ ye xɔ̀sètɔ ɖo ku màxɔ̀sètɔ ò?

¹⁶Đèkawɔ̀wɔ kɛ ye lè mawuxɔa ku legbawo dòmè ò? Đo Mawu àgbèagbèa be èxɔ̀a ye mi nyi, sìgbè àlekè Mawu gblɔ̃ ɛ̀a nène be: “Mù la nɔ̀ woa dòmè, eye mù la zɔ̃ lè woa dòmè. Mù la nyi woabe Mawu, eye wo la nyi àpe dùkɔ̃.”

¹⁷Ye ŋutia, “Mì to lè woa dòmè, ne mìa klã ku wo, nènea ye Tɔhonɔ̀ gblɔ̃. Mì mu gbà tɔ àsi ènu màkɔ̀ màkɔ ò, eye ènyè yaa, mù la xɔ̀ mì.

¹⁸Eye mù la nyi mìa Tɔ, eye mì la nyi èvi-ŋusùwo ku èvi-nyɔ̃nùwo na mù. Nène ye Tɔhonɔ̀ ŋusɛ̃kpatatɔa gblɔ̃a yeŋu.”