Read gen 2Kòrɛ̃tòtɔwo 7 Bible Online

2Kòrɛ̃tòtɔwo 7 - gen bible

2Kòrɛ̃tòtɔwo 7

¹Ekè fìãfìã kèawo lè mia sia, àmè ɖèvewo, mì na mia kɔ̀ mia ɖokoewo ŋuti lè ŋutilã kudo gbɔ̃gbɔ̃ be èɖipòpo keŋu mè, ne mia na miabe kɔ̀kɔ̀ɛ nyinyia ne zɔ̃ sù lè Mawu sisi mè.

²Mì na mi èmɔ lè mìabe èjì mè; mi mu jè àgɔ̀ do àmè ɖe ò; mi mu gble dòmè na àmè ɖe ò; mi mu bà àmè ɖe ò.

³Nyè mu le gblɔ̃ ekèa, la sɔ gblehùɛ do mì ò; ɖo, mù gblɔ̃ na mì, sãa be, mì lè miabe èjìwo mè, lè àgbè ku èku mè.

⁴Mù ɖo jìdo gã ɖe ɖo mìa ŋuti, mì nyi gòyinu gã ɖe na mù; mù ɖɔ kudo àkɔfa; mù ɖɔ kudo jìjɔɛ fuu lè miabe àyàɖùɖuwo keŋu mè.

⁵Đo, ekè mi va Màkedonìa, mi mu kpɔ jɛ̃gbɔ̃gbɔ̃ ɖekpe ò, vɔ̀a mi kpe èfũ lè ènu sia ènu mè: àvũwɔ̀wɔ lè gàglàgbè, vɔ̃vɔ̃wo lè èjì mè.

⁶Vɔ̀a Mawu, kè fana àkɔ na àmè kèwo bɔ̀bɔ̀nà woa ɖokoea, fa àkɔ na mi, ku Titò be vava.

⁷Mu nyi ku yebe vava ɖèɖe kpò ò; vɔ̀a ku àkɔfa kè be kpɔ so mìa gbɔa cã. E gblɔ̃ lekè mì jro veve ɖe be yèwoa kpɔ mù ɖo, mìabe àvi fãfãwo, ku lekè mì sɔ̀gbè, la hlùɛ̃ èta nyè ɖoa na mi. Ekèa na mù kpɔ jìjɔɛ kpe è.

⁸Đo ne mù do àkpɔ̃ lãmè na mì lè xoma a kè mù ŋlɔ̀ ɖoɖa mì sãa mè cã a, mu ve mù ò. Mù kpɔ be, ne e gbà nyi hùenu vi ɖe cã a, xoma ŋua do àkpɔ̃ lãmè na mì; ènu kè ve mùa kpò ye ŋua.

⁹Vɔ̀a, fifìa, mù le jɔ̀jì; mu nyi ekè be do àkpɔ̃ lãmè na mìa ŋuti ò, vɔ̀a ɖo àkpɔ̃a hɛ̃ èdɛ̃ ɖɔ̀lì va na mì. Đo àkpɔ̃ ɖɔ mì, sɔ zɔ̃ ɖo Mawu be èjro ji, àleke be mi mu wɔ̀ ènu bàɖà ɖekpe ku mi ò.

¹⁰Đo àkpɔ̃, sɔ zɔ̃ ɖo Mawu be èjro jia, nana èdɛ̃ ɖɔ̀lì; èdɛ̃ ɖɔ̀lì hɛ̃nà hlùɛ̃gã va, eye mu ɖo la ve mì ò. Vɔ̀a, àkpɔ̃ kè sona xixe kèa mè be kãmàkãmawo gbɔa, hɛ̃nà èku va.

¹¹Fifìa, mì kpɔ, lekè ye àkpɔ̃, sɔ zɔ̃ ɖo Mawu be èjro jia le wɔ̀ èdɔ lè mìa dòmè ɖa! Ɛ̃! Mìa ŋutɔwo mì kpɔ mìabe èji cici ku èjro nyuɛ̃ ɖa, àmè ɖokoe-ta hùɛ̃hlùɛ̃, èjìbibi ɖo èvuɛ̃ ta, Mawu vɔ̃vɔ̃, èjro veve ɖe, vevedonu, èto dɔ̃dɔ̃ ɖo èvuɛ̃ ta! Lè ènyà kèa mèa, mìa ŋutɔwo mì ɖè àlekè mìa ŋuti kɔ̀ ɖoa fiɔ.

¹²Ye ŋutia, ne mù ŋlɔ̀ xoma ɖoɖa mì cã a, nyè mu ŋlɔ̀ ɛ̀ ɖo àmè kè jè àgɔ̀a ŋuti, àlo àmè kè wo jè àgɔ̀ do a ŋuti ò, vɔ̀a ne mìabe vevedonu ɖo mia ŋuti ne ze, lè mìa dòmè, lè Mawu be ŋùmè.

¹³Ekèa ŋuti ye mi kpɔ àkɔfa ɖo. Bɔ̀ ɖo miabe àkɔfa kèa ŋutia, mi kpɔ jìjɔɛ gã ɖe ɖo Titò be jìjɔ̀ɛ a ŋuti, ɖo yebe gbɔ̃gbɔ̃ kpɔ jɛ̃gbɔ̃gbɔ̃ lè mìa keŋu gbɔ.

¹⁴Đo ne mù sɔ mì yigò vi ɖe lè yebe ŋùmè a, nyè mu ɖù ŋùkpɛ̃ ò. Vɔ̀a, sìgbè àlekè mi gblɔ̃ ènuwo keŋu lè nyàwo mèa nènea, nènea ke ye miabe gòyiyi lè Titò be ŋùmè a trɔ zũ nyàwo a yeŋu.

¹⁵Ne e le ɖoŋù mìabe ètonusèse, àlekè mìa kpata mì xɔ̀ ɛ̀ kudo vɔ̃vɔ̃ gbàkudo sìsɔ̀sisɔ ɖoa, mìabe ènu gbà lena èjì na ɛ̀ wu.

¹⁶Èjì le jɔ̀ mù be, mù teŋu ɖo jìdo ɖo mìa ŋuti lè ènu sia ènu mè.