Read gen 2Kòrɛ̃tòtɔwo 8 Bible Online

2Kòrɛ̃tòtɔwo 8 - gen bible

2Kòrɛ̃tòtɔwo 8

¹Nɔ̀viwo, mi jro be, mìa nya Mawu be màje kè wo na Màkedonìa be èhabɔ̀bɔawo.

²Lè àyàɖùɖu vòvò kèwo wo sɔ do wo kpɔa mèa, woabe jìjɔ̀ɛ a gbà sùgbɔ kpe è. Togbɔ be woabe èhiãjèje lòlò cã a, e flãŋu lè woabe àdɔ̀mèfa be àdɔ̀kù mè.

³Mù le ɖù ɖase kèa, be wo na ènu fàa, sìgbè lekè wo teŋu na a nène; eye wo na wu lekè wo teŋuã cã; gãke mi mu biɔ àmè ɖe ò.

⁴Eye wo blìbɔ̀ na mi veve ɖe be, mia na yèwo èmɔ ne yèwo cã, yèwoa ɖo mamã lè àlɔ̀do mè na Yèruzàlɛm be àɖèsãawo.

⁵Eye, to ènu kè mi susua ŋutia, wo sɔ woa ɖokoewo na Tɔhonɔ̀ cucugbã, e yomè a, wo ɖè àsi lè woa ɖokoewo ŋuti na mi, to Mawu be èjro ji.

⁶Ye ŋuti mi pò fiɔ Titò be, sìgbè lekè be tɔ e ji nènea, nènea ke ye be la wu lɔ̃lɔ̃ be èdɔ kèa nu, lè mìa dòmè cã.

⁷Ye ŋutia, sìgbè àlekè mì nɔ̀nà ŋùkɔ̀ lè ènu sia ènu mè, lè xɔ̀sè mè, lè nupo pòpo mè, lè ènunya mè, lè vevedodo ènu mè, kudo lè lɔ̃lɔ̃ kè mì ɖo na mia mèa nènea, nènea ke ye mì la nɔ̀ ŋùkɔ̀ lè lɔ̃lɔ̃ be èdɔ kèa cã mè.

⁸Nyè mu le gblɔ̃ ekèa sìgbè ègbè ɖèɖe nène ò. Vɔ̀a mù le na àmè buwo be vevedodo be kpɔwɔɛ, ne mìa ɖè mìabe lɔ̃lɔ̃ be àdodoe nyinyia fiɔ.

⁹Đo mì jèsi mia Tɔhonɔ̀ Yesù Kristò be màjea be, e ye kè nyi àdɔ̀kùnɔ̀ a, sɔ ye ɖokoe wɔ̀ wɔ̀amènɔ̀, ɖo mìa ŋuti, ne mìa yaa, mìa jè àdɔ̀kù to yebe èhiãa ji.

¹⁰Susu nyè mù lè na mì lè ekèa mè; ɖo e nyɔ na mì be mìa do veve ènu, mì àmè kèwo nyi àmè cucugbã kèwo ye, mu nyi be mì tɔ èdɔ kèa ji ɖèɖe kpò ò, vɔ̀a mì ɖo è, ku èjro nyuɛ̃, èpè ɖèka ye nyi ekèa be yèwoa wɔ̀ ɛ̀, eye mì wɔ̀ ɛ̀ cã.

¹¹Ye ŋuti fifìa, mì wu èdɔa nu. Sìgbè lekè mì ɖo èjro nyuɛ̃ sɔ tɔ e ji nènea, mì wu e nu nènea ke, sɔ zɔ̃ ɖo mìabe èŋutete ji.

¹²Đo ne wo na ènu fàa, e jènà ŋùmè na Mawu, sɔ zɔ̃ ɖo ekè lè àmè sia ji, mu nyi sɔ zɔ̃ ɖo ènu kè mu lè àmè si òa, ji ò.

¹³Đo, mu nyi be woa na, mìa yaa, mìa jè èhiã mè, ne àmè ɖewo ne ɖo ènu ye ò. Vɔ̀a sɔ̀sɔɛ ne nɔ̀ mìa dòmè;

¹⁴Sùgbɔ fuu kè lè mìa si fifìa, ne nyi àlɔ̀do na woabe èhiãmeawo, ne, gbè ɖèkaa, ènu kè le sùgbɔ lè woa sia, ne nyi àlɔ̀do na mìabe èhiãmeawo cã, ne sɔ̀sɔɛ ne nɔ̀ ànyi;

¹⁵sìgbè lekè wo ŋlɔ̀ ɛ̀ ɖɛa nène be: “Àmè kè bɔ̀ ènu fuua, mu kpɔ ɖekpe ɖo e ji kè wua ò; eye àmè kè bɔ̀ vi ɖe kpòa, ènu ɖekpe mu hiã ɛ̀ ò.”

¹⁶Àkpe ye jè na Mawu, àmè kè sɔ vevedodo kè lè mia mèa do Titò be èjì mè, ɖo mìa ŋuti.

¹⁷E lɔ̃ ɖo miabe yɔyɔa ji, eye wu ekèa, lè yebe vevedodo fuu mèa, ye ŋutɔ jro, yì mìa gbɔ.

¹⁸Eye, bɔ̀ ɖo e ŋutia, mi ɖo nɔ̀vi kè èhabɔ̀bɔwo keŋu le kafu ɖo ènu kè be le wɔ̀ na àŋɛ̀nyuɛ̃ a ŋutia, ɖoɖa mì.

¹⁹Mu nyi ekèa ɖèɖe kpò ò, vɔ̀a èhabɔ̀bɔwo cã ɖè, ne bèa nyi èmɔzɔ̃tɔ kudo mi lè lɔ̃lɔ̃ be èdɔ kè mi sɔ miabe èjro nyuɛ̃ ɖèɖèfiɔ le wɔ̀ na Tɔhonɔ̀ be gogoa.

²⁰Mi le wɔ̀ ènu sia ènu ne àmè ɖe mu gbà va kpɔ ènyà ɖe gblɔ̃ so ègà gã kè wo sɔ do àsi na mia ŋuti ò.

²¹Miabe susu lè ènu nyuɛ̃ wɔ̀wɔ yomè; mu nyi lè Mawu be ŋùmè ɖèɖe kpò ò, vɔ̀a lè àgbètɔwo cã be ŋùmè.

²²Mi ɖo mia nɔ̀vi kè be vevedodo mi do kpɔ eji-eji, lè ènu sùgbɔ mèa ɖoɖa, bɔ̀ ɖo woa ŋuti, vɔ̀a fifìa, yebe vevedodo wu sãa, ɖo jìdo gã kè be ɖo ɖo mìa ŋutia ŋuti.

²³Titò tɔ̀ gomèa, e nyi àpe èmɔzɔ̃xlɔ̃ kudo èhadɔwɔ̀tɔ nyè lè mìa gbɔ. Mia nɔ̀viawo tɔ̀ gomèa, èhabɔ̀bɔawo be *àmèdɔ̃dɔ̃wo ye wo nyi, wo le wɔ̀ èdɔ na Kristò be gogo.

²⁴Mì ɖè fiɔ wo be mì lɔ̃ wo nyàwo. Ekèa la na be èhabɔ̀bɔawo la kã ɖo e ji, eye wo la nya be, miabe ènyà lè e mè be mi sɔna mì yinagò.