Read gen Galatìatɔwɔ 1 Bible Online

Galatìatɔwɔ 1 - gen bible

Galatìatɔwɔ 1

¹Xoma kèa so ènyè Paolò, àmè kè nyi *àmèdɔ̃dɔ̃a gbɔ. Mu nyi àgbètɔ ɖekpe ye cã mù, àlo wo to àgbètɔ ɖekpe ji cã mù ye mù va nyi àmèdɔ̃dɔ̃ ò, vɔ̀ bòhũa, to Yesù Kristò kudo Mawu Àta, kè fɔ̃ Yesù so àmè kukuwo dòmèa ji.

²Nɔ̀vi kèwo keŋu lè fikèa kudo mùawo cã bɔ̀ ɖo ŋuti nyè, mi le ŋlɔ̀ xoma kèa na mì, èhabɔ̀bɔ kèwo lè Galatìa be àgowo jia.

³Màje ku fàfa ne nɔ̀ ku mì, so Mawu Àta ku Tɔhonɔ̀ Yesù Kristò gbɔ.

⁴Yesù Kristò sɔ ye ɖokoe na ɖo miabe èvuɛ̃wo ta, ne bèa xɔ̀ mi so egbè be xixe vuɛ̃ kèa mè. Ekèa nyi Mawu, mia Tɔ be èjro.

⁵Woa na gogo Mawu kaka sɔ yì! * Àmèn.

⁶E wɔ̀ ŋùdã na mù ŋutɔ be fifì jɛ̃ kèa kpòa, mì trɔ kaba, jo lè àmè kè yɔ mì, to Kristò be màje jia yomè, tùtà àŋɛ̀nyuɛ̃ bu ɖe gbɔ.

⁷Vɔ̀a, àŋɛ̀nyuɛ̃ bu ɖekpe mu gbà lè gbɔ̀xue ò; bòhũa, àmè ɖewo kpò ye lè, le gble èto na mì, eye wo jro be yèwo a trɔ Kristò be àŋɛ̀nyuɛ̃ a be ŋùmè cɔ̃ ànyi.

⁸Vɔ̀ a, ne àmè ɖe, miawo, àlo Mawu be àtikplɔtɔ ɖe so jiŋùkusi ŋutɔ cã va, do àŋɛ̀nyuɛ̃ bu ɖe, kè tovò na ekè mi do na mì xoxoa, hèlu na ɛ̀!

⁹Ènyà kè mi gblɔ̃a, e ye ke kpò mù gbà le gblɔ̃. Mù le gblɔ̃ be: ne àmè ɖe do àŋɛ̀nyuɛ̃ bu tovò na ekè mì xɔ̀ sãa, hèlu na ɛ̀!

¹⁰Vɔ̀ fifìa, ènyà kè mù le gblɔ̃a, mù le gblɔ̃ ɛ̀ be ma nyɔ lè àgbètɔwo gbɔ loo, àlo Mawu gbɔ? Mù le ji be ma jè àgbètɔwo be ŋùmè a? Ne e nyi be àgbètɔwo be ŋùmè mù le jè a, nyè mu la gbà nyi Kristò be sumɔ̃vi ò.

¹¹Nɔ̀vi nyèwo, mù jro be mìa nya nyuɛ̃ ɖe be àŋɛ̀nyuɛ̃ kè mù do na mìa, mu nyi àgbètɔ tɔ̀ be nyi ò.

¹²Nyè mu xɔ̀ ɛ̀ so àgbètɔ ɖekpe gbɔ ò, eye mu nyi àmè ɖekpe cã ye fiɔ mù ò, vɔ̀ bòhũa, Yesù Kristò ye ɖè è fiɔ mù.

¹³Mì sè lekè mù nɔ̀ àgbè sã, lè Yudàviwo be sɛ̃sɛ̃a mè. Mì sè lekè mù tĩ Mawu be èhabɔ̀bɔa mè nɔ̀tɔwo yomè veve ɖe, eye mù jè àgbàgba be ma crɔ̃ èhabɔ̀bɔa.

¹⁴Mù sɔ veve do ènu tɔ̀xɛ ɖo mia tɔgbewo be èkɔ̀dowo ŋuti ɖexòmèku be mù nɔ̀ ŋùkɔ̀ na hati nyè sùgbɔ lè Yudàvi nyinyi mè, lè mia detɔwo dòmè.

¹⁵Sĩ vɔ̀a, Mawu cã mù dà ɖɛ, so kaka ènɔ̀ nyè be àdɔ̀mè, eye be yɔ mù to yebe màje ji.

¹⁶E kɔ̀ àdɔ̀mè, ɖè Èvia fiɔ mù, ne ma do yebe Àŋɛ̀nyuɛ̃ a, lè àmè kèwo mu nyi Yudàvi òawo dòmè. Kè ekèa jɔ̀ a, nyè mu biɔ àmè ɖe be ne ɖo àɖàŋù na mù ò.

¹⁷Nyè mu yì Yèruzàlɛm ŋutɔ cã be ma kpɔ àmè kèwo nyi *àmèdɔ̃dɔ̃wo jè ŋùkɔ̀ na mùawo cã ò. Vɔ̀ bòhũa, mù yì Arabìa zè ɖèka; eye ekè mù trɔ gbɔ̀a, mù gbà va yì Damaskò.

¹⁸Èpè ètɔ̃ yomè gbɔ̀xue mù yì Yèruzàlɛm, ne ma kpɔ Kefàs[1]. Mù nɔ̀ e gbɔ ŋùkèkè woeàtɔ̃.

¹⁹Vɔ̀a, nyè mu kpɔ àmèdɔ̃dɔ̃ buwo dòmètɔ ɖekpe, tovò na Yakobò, Tɔhonɔ̀ be nɔ̀vi ŋusùa ò.

²⁰Ènyà kèwo mù le ŋlɔ̀ ɖoɖa mìa nyi nyàwo. Mawu ye nyi àpe ɖàsèfo, be nyè mu le ɖà àjè ò.

²¹E yomè a, mù yì Sirìa ku Kilikìa be àgowo ji.

²²Vɔ̀a, Kristò be èhabɔ̀bɔ kèwo lè Yudeà be ànyigbã jia, wo mu kpɔ mù kpɔ ò.

²³Wo sè kpò lè àmèwo nu be: “Àmè kè le tĩ mia yomè sãa, va le do xɔ̀sè kè be ji be yèa gũ sãa be àŋɛ̀!”

²⁴Nène a ye wo na gogo Mawu ɖo ŋuti nyè.