Read gen Galatìatɔwɔ 4 Bible Online

Galatìatɔwɔ 4 - gen bible

Galatìatɔwɔ 4

¹Ènu kè mù jro la gblɔ̃a ye nyi be, ne èvi ɖe nyi ècrɔ̃ɖùtɔ, vɔ̀ e gbà lè ɖèvi mè kpòa, kè ècrɔ̃nuwo kpata nyi ye tɔ̀ cã gãkea, kaka kè e gbà nyi ɖèvi kpòa, vòvòtoto mu lè ye kudo ègàmènɔ̀tɔ dòmè ò.

²E lè àmèjikpɔtɔwo kudo ènujikpɔtɔwo be ŋusɛ̃ gɔ̃mè, kaka va na gà kè mè ètɔa ɖo ɖɛ na yebe ènuawo xɔ̀xɔa bèa sù.

³Nène a ke ye mia cã, lè miabe ɖèvi mèa, mi nɔ̀ gbɔ̃gbɔ̃ kèwo jɔ̀ kudo xixea be ŋusɛ̃ gɔ̃mè, sìgbè kluviwo nène.

⁴Vɔ̀ ekè gàmè sùa, Mawu ɖo Èvia ɖoɖa. Nyɔ̃nù jì ì ɖo èsea gɔ̃mè.

⁵Ye be ɖo è ɖoɖa ne bèa va tu èfɛ̃ ɖo àmè kèwo lè èsea gɔ̃mèawo ta, bèa jo mi, sɔ wɔ̀ èviwo.

⁶Mawu ji be yèa ɖè è fiɔ be yèbe èviwo ye mi nyi, ye ŋutia e ɖo Èvia be Gbɔ̃gbɔ̃ kè dona àpa be: “Abà, Àta!” Ɖoɖa miabe èjìwo mè.

⁷Nène a, ɖo Mawu ŋutia, wò mu gbà nyi kluvi ò, vɔ̀a, wò trɔ zũ èvi, eye ne wò nyi èvia, eŋuã wò nyi ècrɔ̃ɖùtɔ cã to Kristò ji.

⁸Sãa, wàlɛbɛ kè mì mu nya Mawu òa, mì nyi gàtɔwo na vòdu kèwo mu nyi mawu so jɔ̀jɔmè ò a.

⁹Vɔ̀ fifìa, ekè mì va nya Mawu, àlo ma gblɔ̃ bòhũ be, ekè Mawu va nya mìa, leke wɔ̀ mì gbà le ji be yèwoa gbà gbìgbɔ̀ trɔ yì gbɔ̃gbɔ̃ ŋuawo gbɔ, ne mìa gbà nyi woabe gàtɔwo ke ò? Wo jɔ̀ kudo xixea, gãke, wo nyi gbɔ̃gbɔ̃ kèwo ŋuti ŋusɛ̃ mu lè ò.

¹⁰Mì cã àzã ɖewo, wètri ɖewo, hùenu ɖewo kudo èpè ɖewo dà ɖɛ, nyìnà èkɔ̀ tɔ̀xɛ lè woa ji.

¹¹E wɔ̀ na mù sìgbè àgbàgba kèwo keŋu mù jè ɖo mìa ŋutia nyi ènu gbalo nène.

¹²Nɔ̀viwo, mì nɔ wɔ̀ sìgbè ènyè nène jro, ɖo ènyè cã mù trɔ sìgbè mìawo nène. Mì mu wɔ̀ vuɛ̃ ɖekpe do mù ò.

¹³Sìgbè lekè mì nya ɛ̀ nènea, àpe lãmè gbegble mè ye mù va do àŋɛ̀nyuɛ̃ a na mì cucugbã.

¹⁴Lekè ye mù nɔ̀a, sɛ̃sɛ̃ na mì co gãkea, nyè mu nyɔŋu na mì, ne mìa gbe mù xɔ̀xɔ ò, vɔ̀ bòhũa mì xɔ̀ mù sìgbè Mawu be àtikplɔtɔ àlo sìgbè lekè mì la xɔ̀ Kristò Yesù ŋutɔa nène.

¹⁵Jìjɔɛ kè mì kpɔ ɖo ŋuti nyè gà ŋua mèa, fikɛ be lè fifì ò? Nyè ŋutɔ ma teŋu ɖù ɖase na mì be, gà ŋua mèa, ne e la nyi wɔ̀wɔa, mì kè hɔ̃ mìabe ŋùkuviwo to lè àkpà mè ŋutɔ cã la sɔ na mù gbɔ̀xue.

¹⁶Ekè mù to nyàwo na mìa ŋuti ye mù va trɔ zũ mìabe kɛ̃tɔa?

¹⁷Àmè kèwo le do vivi mìa ŋutiawo le flù mì kpò ye. Wo jro kpò be yèwoa klã mì jo lè ŋuti nyè, leke be mìa trɔ ɖoɖa woa gbɔ bòhũ.

¹⁸E nyɔ be mìa ci ji ɖo ènu nyuɛ̃ wɔ̀wɔ ŋuti wè sia wè, vɔ̀ mu nyi ne mù lè mìa gbɔ ɖèɖe kpò ò.

¹⁹Èvi nyè ɖèvewo, mù le sè veve ɖo mìa ta, sìgbè nyɔ̃nù kè èfu le ɖùa nène, kaka va sɛ̃ gà kè mè nɔ̀nɔmè kè lè Kristò sia, bèa va mìa mè.

²⁰Ne mìa gbɔ ye mù lè fifìa, e la nyɔ ŋutɔ gbɔ̀xue, ɖo mù la pò nupo na mì àgbãŋùgbà; fifìa mù le vɔ̃ ɖo mìa nu.

²¹Mì, àmè kèwo jro be èsea bèa ɖù yèwo jia, mì ɖo ènyà kèa ŋuti na mù: mì mu sè ènu kè èsea gblɔ̃a òa?

²²E be èvi-ŋusù èvè nɔ̀ Abràham si. Đèka nyi kluvi be èvi, eye èvègɔ̃a nyi àblɔ̀ɖè nyɔ̃nù be èvi.

²³Đèvi kè kluvia jìa, wo jì ì sìgbè lekè àgbètɔ jìnà èvi kpòa nène. Vɔ̀ ɖèvi kè àblɔ̀ɖè nyɔ̃nù a jìa yaa, Mawu fìã ɛ̀ na yebe àjìtɔawo.

²⁴Ènu kèawo le fiɔ ènu tɔ̀xɛ: nyɔ̃nù èvè kèawo lè *zòɖùɖu èvèawo tèpe. Woa dòmètɔ ɖèka nyi Hagàr. E so Sinai-to ji, eye be jì èvi na kluvi nyinyi.

²⁵Hagàr sɔ̀ ku Sinai-to lè Arabìa. E ya ye nyi Yèruzàlɛm be èdù kè lè egbèa, ɖo e ya ku e mè nɔ̀tɔwo keŋu nyi kluviwo.

²⁶Yèruzàlɛm be èdù kè lè jiŋùkusia, àblɔ̀ɖè be èdù ye. E ya ye nyi mia nɔ̀,

²⁷ɖo mawunya gblɔ̃ be: “Èwò èkònɔ̀, kpɔ jìjɔɛ! Èwò, nyɔ̃nù kè mu jì èvi kpɔ òa, do àpa, eye wòa fã jìjɔɛ be àvi. Èwò, àmè kè mu le èku kpɔ òa! Đo nyɔ̃nù, kè gbɔ èsrɔ̃a jo lèa, be viwo sùgbɔ wu nyɔ̃nù kè lè èsrɔ̃a gbɔa tɔ̀wo.”

²⁸Fifìa, nɔ̀viwo, mì nyi fìãfìã be viwo sìgbè Izàk nène.

²⁹Wàlɛbɛ ŋua, àmè kè wo jì, sìgbè lekè àgbètɔ jìnà èvi kpò nènea, tĩ àmè kè be àjɔ̀gbè wo fìã gbɔ̀xue wo jìa yomè. Nène a ke kpò be gbà lè egbèa cã.

³⁰Vɔ̀a nukɛ mawunyaa gblɔ̃ ò? E gblɔ̃ be: “Nyà kluvia kudo èvia jo, ɖo kluvi be èvia mu la ɖù ècrɔ̃ kudo àblɔ̀ɖè nyɔ̃nù a be èvia ò.”

³¹Nène a, nɔ̀viwo, mu nyi kluvi be èviwo mi nyi ò, vɔ̀ bòhũa àblɔ̀ɖè nyɔ̃nù be èviwo ye mi nyi.