Read gen Galatìatɔwɔ 5 Bible Online

Galatìatɔwɔ 5 - gen bible

Galatìatɔwɔ 5

¹Àblɔ̀ɖè ye Kristò ji be mia xɔ̀, ye ŋuti be jo mi ɖo; ekèa ŋutia, mì nɔ̀tè goŋu, eye mì mu gbà na woa tɛ mì ɖo ànyi ne woa gbà wɔ̀ mì kluviwo ke ò.

²Fifìa, ènyè Paolò, mù le to na mì be, ne mì ɖè èmɔ ye wo sò èvo na mìa, Kristò mu gbà nyi àlè ɖekpe na mì ò.

³Mù gbà le ɖù ɖase na mì veve ɖe be àmè sia àmè kè la ɖè èmɔ ye wo la sò èvo na ɛ̀a, ekèa la na be e ɖo la wɔ̀ ɖo *èse bliboa keŋu cã ji.

⁴Mì, àmè kèwo le ji be woa bù yèwo be yèwo lè jɔ̀jɔɛ, ɖo ne mì wɔ̀ ɖo èsea jia, mì klã mìa ɖokoe jo lè Kristò ŋuti. Nène a, mì trɔ ŋùgbe do Mawu be màjea.

⁵Mia tɔ̀ gomè yaa, mi ɖè jì blɛ̀wù, le kpɔ èmɔ be Mawu bèa bù mi be mi lè jɔ̀jɔɛ lè yebe ŋùmè, ènu kèa ye mi le nɔ̀tè kpɔ to Gbɔ̃gbɔ̃ Kɔ̀kɔ̀ɛ be ŋusɛ̃ kè le wɔ̀ èdɔ lè mia mè ɖo xɔ̀sè kè mi ɖoa ŋuti.

⁶Ne mi wɔ̀ ɖèka kudo Kristò Yesùa, ne wo sò èvo, àlo wo mu sò èvo òa, mu lè veve ɖe ò. Ènu kè kpò lè veve ɖe a ye nyi xɔ̀sè kè wɔ̀nà èdɔ ku lɔ̃lɔ̃ a.

⁷Mì jè Kristò be àzɔ̃lìa gɔ̃mè nyuɛ̃ ɖe, àmè kɛ ŋutɔ ye va xe èmɔ na mì ne mì mu gbà ɖo èto nyàwo a ò?

⁸Mu nyi àmè kè yɔ mìa ye trɔ mìabe susu lekea ò.

⁹*Mawɛhuãnu viɖe kpò ye nana mawɛ bliboa huãna.

¹⁰Mù kã ɖo e ji be Tɔhonɔ̀ la wɔ̀ ɛ̀ be mì mu gbà la xɔ̀ àmè ɖekpe be susu, wu tɔ̀ nyè kpò ò. Vɔ̀a àmè ɖekpekpe kè ye le trɔ mìabe susua, Mawu la dɔ̃ èto na ɛ̀ kòkòkò.

¹¹Nɔ̀viwo, vɔ̀a ɖe, ne mù gbà le do àŋɛ̀a be e lè veve ɖe be woa sò èvoa, nukɛ ŋuti wo la gbà nɔ̀ tĩ yo nyè mè ɖo ò? Vɔ̀ ne e nyi nène ye mù gblɔ̃a, eŋuã Kristò be èku lè àtisògaa ŋutia mu gbà la nyi àfɔ̀klɛ̃ ò!

¹²Àmè kèwo le titɔ susu na mìa, wo ne yì ŋùkɔ̀ wu nènea ne woa ta woa ɖokoewo.

¹³Nɔ̀viwo, wo yɔ mì va be mìa vò. Vòvo kèa mu gbà nyi èmɔ ɖèɖe na èvuɛ̃ kèwo mìabe ŋutilã jrona a ò. Vɔ̀ bòhũa, mìa sumɔ mìa nɔ̀nɔwo kudo lɔ̃lɔ̃,

¹⁴ɖo èsea be pòpo ɖodua nyi ènyàti kèa be: “Lɔ̃ èhavi wò sìgbè wò ŋutɔ ɖokoe wò nène.”

¹⁵Vɔ̀a, ne mì le wɔ̀ ènu veve kudo mìa nɔ̀nɔwo, le trɛ̃ mìa nɔ̀nɔwoa, mì kpɔ nyuɛ̃ ɖe ne mì mu gbà va wù mìa nɔ̀nɔwo ò.

¹⁶Mù le gblɔ̃ ɛ̀ na mì be mì na Mawu be Gbɔ̃gbɔ̃ bèa fiɔ mì lekè mì la nɔ̀ àgbè a, ne mì mu gbà zɔ̃ ɖo ènu kèwo ŋutilã jrona a ji ò.

¹⁷Đo ŋutilã be èjro wo sitè ɖo Gbɔ̃gbɔ̃ a ŋuti, eye ènu kèwo Gbɔ̃gbɔ̃ a cã jrona a sitè ɖo ŋutilã ŋuti. Ènu kèawo sitè ɖo woa nɔ̀nɔwo ŋuti, ne mì mu gbà wɔ̀ ènu kè mì jia ò.

¹⁸Vɔ̀a ne Gbɔ̃gbɔ̃ a le kplɔ̀ mìa, eŋuã mì mu gbà lè èsea gɔ̃mè ò.

¹⁹Fifìa, èdɔ kèwo ŋutilã wɔ̀nàa, zena àdodoe. Woawo ye nyi: *àhasì wɔ̀wɔ, ènu màkɔ̀ màkɔ wɔ̀wɔ, èdɛ̃vuɛ̃ wùwu,

²⁰Vòdu sɛ̃sɛ̃, àze wɔ̀wɔ, èkɛ̃ wɔ̀wɔ, àjrè wɔ̀wɔ, ŋuhuã, àdɔ̀mèze dodo, ɖokoetɔ̀ jiji, àmèdòmè mamã, èha mamã,

²¹àmènuve àmè ŋuti, àhà mumu, wɔ̀wui wɔ̀wɔ ku ènu kèwo ɖì ènu kèawo hatiawo. Mù gbà le gblɔ̃ ɛ̀ na mì ɖɛ, sìgbè àlekè mù gblɔ̃ ɛ̀ na mì ɖɛ sãa nène, be àmè kèwo wɔ̀nà ènu kèawo hatiawo mu la sɔ Mawu be fìɔdua ɖù ècrɔ̃ ò.

²²Vɔ̀a ènu kèwo tona so Gbɔ̃gbɔ̃ mèawo ye nyi: lɔ̃lɔ̃, jìjɔɛ, fàfa, àdòdò, àdɔ̀mènyuɛ̃, ènu nyuɛ̃ wɔ̀wɔ, ànùkua wɔ̀wɔ,

²³tùjèanyi ku ɖokoeji ɖùɖu. Èsea mu sitè ɖo ènu kèawo dòmètɔ ɖekpe ŋuti ò.

²⁴Àmè kèwo nyi Kristò Yesù tɔ̀awo ka woabe ŋutilã ku yebe ènujroàmèwo kudo yebe ŋùbiawo ɖo àtisòga ŋuti.

²⁵Ne mi lè àgbè lè Gbɔ̃gbɔ̃ a mèa, eŋuã, mì na mia zɔ̃ lè Gbɔ̃gbɔ̃ a mè cã.

²⁶Mì mu gbà na mia kɔ mia ɖokoe yìji, àlo la do àdɔ̀mèze na mia nɔ̀nɔwo, àlo la bìaŋù ɖo mia nɔ̀nɔwo ŋuti ò.