Read gen Galatìatɔwɔ 6 Bible Online

Galatìatɔwɔ 6 - gen bible

Galatìatɔwɔ 6

¹Nɔ̀viwo, ne mìa dòmètɔ ɖe jè àgɔ̀a, mì, àmè kèwo Mawu be Gbɔ̃gbɔ̃ le kplɔ̀a, mì ɖè èjì blɛ̀wù la jɔ̀ ɛ̀. Vɔ̀a, kpɔ ɖokoe wò ji nyuɛ̃ ɖe, ne wo mu gbà tè wò ŋutɔ cã kpɔ ò.

²Mì dro mìa nɔ̀nɔwo be àgbã, nènea ye mì la wɔ̀ ɖo Kristò be èsea ji.

³Đo ne àmè ɖe susu be yè nyi ènu ɖe, vɔ̀ mu nyi ènu ɖekpe òa, e le flù ye ɖokoe.

⁴Àmè sia àmè ne do ye ŋutɔ be nuwɔ̀na kpɔ. Ne e wɔ̀ ekèa, e la kpɔ ènu kè mè e la yigò lèa, lè ye ŋutɔ ɖokoe ɖèɖe mè kpò. Vɔ̀a mu gbà sɔ yebe nuwɔ̀na sɔ̀ kudo àmè buwo tɔ̀ ò,

⁵ɖo àmè sia àmè la dro ye ŋutɔ be àgbã.

⁶Àmè kè wo le fiɔ ènu so mawunya ŋutia, ne na àmè kè le fiɔ ɛ̀ ènua ne bèa kpɔ ègomè lè ènu nyuɛ̃ kèwo keŋu lè e sia mè.

⁷Mì mu gbà blè mìa ɖokoe ò. Wo mu flùnà Mawu ò. Ènu kè àmè do a, ye be la yà.

⁸Àmè kè do ènu ɖo ŋutilã be jro jia, ènu kè e la yà so ŋutilã mèa nyi gbegble. Vɔ̀ àmè kè do ènu ɖo Gbɔ̃gbɔ̃ be jro jia, àgbè mà-vɔ ye nyi ènu kè be la yàa.

⁹Ènu nyuɛ̃ wɔ̀wɔ mu gbà tìkɔ̀ na mi ò, ɖo ne mi mu gbɔjɔ òa, mi la va kpɔ àlè lè e mè lè hùenu kè wo ɖoa.

¹⁰Ye ŋutia ekè èmɔnukpɔkpɔ gbà lè mia sia, mì na mia wɔ̀ nyuɛ̃ na àmè sia àmè, veve ɖe a, na miabe èhaviwo lè xɔ̀sè mè.

¹¹Mì kpɔ àlɔ̀nuŋɔ̀ŋlɔ̃ gãgã kèwo nyè ŋutɔ mù sɔ àsi ŋlɔ̀ ɖoɖa mì ɖa!

¹²Àmè kèwo jro be yèwoa jè àgbètɔ be ŋùmè a, woawo ye le do nupo na mì be woa sò èvo na mì. Ènu kè ŋuti kpò wo le wɔ̀ ènu kèa ɖoa, ye nyi be àmèwo mu gbà tĩ woa yomè ɖo Kristò be èku lè àtisòga ŋutia, ŋuti ò.

¹³Đo àmè kèwo wo sò èvo na a ŋutɔ cã, mu wɔ̀nà ɖo èsea ji ò. Ènu kè kpò àmè kèawo le jro be yèwoa wɔ̀a ye nyi be yèwoa yigò be mìawo cã mì nɔ̀ yèwo be èsea gɔ̃mè, to ŋutilã mè be jèsì kèa ji, eye mì na wo sò èvo na mì.

¹⁴Vɔ̀a ènyè ya, nyè mu gbà jro klua be ma yigò na mì so ènu bu ɖekpe ŋuti, wu mia Tɔhonɔ̀ Yesù Kristò be èku lè àtisòga ŋuti ò. Kristò mè ye wo to ka xixea ɖo àtisòga ŋuti na mù, eye Kristò mè ke ye wo ka nyè cã ɖo àtisòga ŋuti na xixea.

¹⁵Đo ne wo sò èvo, àlo wo mu sò èvo òa, e ya mu lè veve ɖe ò, àmè yeye nyinyia ye lè veve ɖe.

¹⁶Mawu ne ku ŋuzĩzĩ na àmè kèwo zɔ̃nà ɖo ɖoɖo kèa ji, eye bèa na wo ŋutifàfa. Ne wɔ̀ ekèa na yebe Izràɛl yeyea cã.

¹⁷So fifìa, àmè ɖekpe mu gbà do nupo na mù ke ò, ɖo ènyè ya àbìkpa kèwo lè ŋuti nyèa, fiɔ be Yesù tɔ̀ mù nyi.

¹⁸Nɔ̀viwo, mia Tɔhonɔ̀ Yesù Kristò be màje ne nɔ̀ ku mìa kpata! * Àmèn.