Read gen Efesòtɔwo 2 Bible Online

Efesòtɔwo 2 - gen bible

Efesòtɔwo 2

¹Sãa, mì ku lè mìabe àgɔ̀jèje kudo ènuvuɛ̃ wɔ̀wɔ mè, vɔ̀ fifìa wo gbɔ̀ mì àgbè.

²Lè hùe ŋua nua, mì zãna àgbèa sìgbè xixe kèa mè tɔwo nène. Mì sènà ètonu na gbɔ̃gbɔ̃ vuɛ̃wo be èfìɔ. E ye nyi gbɔ̃gbɔ̃ kè le wɔ̀ èdɔ fifì, lè àmè kèwo gbe be yèwo mu la sè ètonu na Mawu ò a mè.

³Mia kpata mi nɔ̀ sìgbè woawo nène sã. Mi zɔ̃nà ɖo èjro kèwo hɔ̃nà lè miabe ŋutilã mèa nu, eye mi wɔ̀nà ènu kè miabe ŋutilã kudo susu ji be mia wɔ̀a. Ekèa ŋuti ye Mawu do àdɔ̀mèze ɖo mia ŋuti, sìgbè àlekè be do è ɖo àmè ŋuawo ŋutia nène.

⁴Vɔ̀a, Mawu be ŋuzĩzĩkuku na àmè sùgbɔ, kudo lɔ̃lɔ̃ kè be ɖo na mia ŋuti ye,

⁵wàlɛbɛ kè mi ku lè gbɔ̃gbɔ̃ mè ɖo miabe àgɔ̀jèjewo ŋutia, e gbɔ̀ mi àgbè kudo Kristò. Đo, Mawu be màjea mè ye mì kpɔ hlùɛ̃gã lè.

⁶Ekè mi wɔ̀ ɖèka ku Kristò Yesùa, Mawu fɔ̃ mi so èku kudo è, eye be na mi nɔ̀ ànyi ɖo Kristò gbɔ lè jiŋùkusi.

⁷E wɔ̀ ekèa, sɔ ɖè yebe màjea be àdɔ̀kùnu gãa, fiɔ, to yebe àdɔ̀mènyuɛ̃ wɔ̀wɔ, to Kristò Yesù ji, na hùenu kèwo la vaa keŋu.

⁸Đo Mawu be màjea mè ye mì kpɔ hlùɛ̃gã lè, to mìabe xɔ̀sè ji. Ekèa mu so mìa gbɔ ò, Mawu be ènu nana be nyi.

⁹Mu nyi àmè ɖe be àgbàgba jèje ye be nyi, ne bèa sɔ ɛ̀ yigò ò.

¹⁰Đo Mawu ye wɔ̀ mi kudo ye ŋutɔ be àlɔ̀, be mia wɔ̀ ɖèka kudo Yesù Kristò, ne mia wɔ̀ èdɔ nyuɛ̃, kèwo Mawu jrà ɖo ɖɛ na mia.

¹¹Mì ɖo ŋùku e ji, be mu nyi Yudàvi jìjiwo ye mì nyi ò. Yudàvi, àmè kèwo kpɔna woa ɖokoewo be yèwo kpò wo sò èvo na a, yɔna mì be àtɔ̀tɔ̀nɔ̀wo. Sĩ vɔ̀a, *èvosòso kèa, ŋutilãmènu kpò be nyi, eye àgbètɔ kpò ye sɔ àsi wɔ̀ ɛ̀.

¹²Mì ɖo ŋùku e ji, be hùenu ɖe va yìa, mì nɔ̀ àzɔ̀ge na Kristò, eye mì mu nyi Izràɛl dùkɔ̃a be dùmèviwo lè èmɔ ɖekpe nu klua ò. Mì mu nya ènu ɖekpe lè ènu kèwo be èzò Mawu ɖù kudo yebe dùkɔ̃a, kudo ènu kèwo be àjɔ̀gbè be fìã na ɛ̀ ŋuti ò. Wu ekèa, ŋùɖo ɖekpe mu nɔ̀ mìa si ò, eye mì mu jèsi Mawu cã ò.

¹³Vɔ̀ fifìa, lè ɖèkawɔ̀wɔ mè kudo Yesù Kristò, wo kplɔ̀ mì, àmè kèwo nɔ̀ àzɔ̀ge boo sãa, va Mawu gbɔ, to Kristò be vɔsa ji.

¹⁴E ye hɛ̃ fàfa va mia dòmè, bɔ̀ Yudàvi kudo àmè kèwo mu nyi Yudàvi òa wɔ̀ ɖèka, eye e mù màma be èglì kè wɔ̀ mi kɛ̃tɔwoa pu ànyi.

¹⁵E gũ Yudàviwo be èsea kudo yebe ɖoɖowo, gbàkudo yebe ègbèɖèɖewo, ne bèa sɔ kɔ̀ta èvèawo sɔ wɔ̀ dùkɔ̃ yeye ɖèka, lè ɖèka wɔ̀wɔ mè kudo ye ɖokoe. Nène a ye be hɛ̃ fàfa va.

¹⁶Kristò, to èku kè be ku lè àtisòga ŋutia jia, gũ èta na èkɛ̃. E ɖa àvũ lè kɔ̀ta èvèawo dòmè.

¹⁷E va do fàfa be àŋɛ̀a na mì, àmè kèwo nɔ̀ àzɔ̀gea eye be hɛ̃ fàfa va na àmè kèwo lè kpòepeawo.

¹⁸Đo to Kristò ji ye mia kpata, Yudàvi kudo àmè kèwo mu nyi Yudàvi ò a teŋu yì Mawu be ŋùkɔ̀ kudo Gbɔ̃gbɔ̃ Kɔ̀kɔ̀ɛ a be àlɔ̀do.

¹⁹Nène a, mì mu gbà nyi àmèjrowo, àlo èmɔzɔ̃tɔ kèwo va to ànyigbã ɖe ji kpò le yìa ò. Vɔ̀ bòhũa, mìa ku àmè kèwo ŋuti wo kɔ̀a, mì zũ dùkɔ̃ ɖèka be èdùmèviwo kudo Mawu be àxomètɔwo.

²⁰Gɔ̃mèɖokpe kè *àmèdɔ̃dɔ̃wo ku Mawu be gblɔ̃ɖɛtɔwo ɖo ànyia ji, ke ji wo li mì ɖo; eye Kristò Yesù ŋutɔ ye nyi koŋùjikpea.

²¹E ye ji ye wo kpe èxɔ̀tùtua be àkpa vòvòvòawo kpata ɖo, be bla, zũ èxɔ̀ ɖèka, eye kè nana èxɔ̀ bliboa sĩnà ɖo e ji va zũnà mawuxɔ kɔ̀kɔ̀ɛ na Tɔhonɔ̀.

²²Wo sɔ mìawo cã ɖo èxɔ̀a be àkpa ɖe, be ne mìa keŋu mìa zũ àxue na Mawu to Gbɔ̃gbɔ̃ a ji, lè ɖèka wɔ̀wɔ mè ku Kristò.