Read gen Efesòtɔwo 3 Bible Online

Efesòtɔwo 3 - gen bible

Efesòtɔwo 3

¹Ɖo ekèa ŋutia, ènyè Paolò, kè wo do ègàkpa mè ɖo Yesù Kristò ŋutia, na mì àmè kèwo mu nyi Yudàvi òa, mù fãnàkue na Mawu.

²Ta mu nyɔ òa, mì sè àlekè Mawu ku ŋuzĩzĩ na mù, eye be sɔ èdɔ do àsi na mù, be ma wɔ̀ lè mìa dòmèa.

³Sìgbè àlekè mù ŋlɔ̀ ɛ̀, lè xoma kèa mè na mì, va yìa nènea, Mawu ɖè ɖoɖo kè be wɔ̀ ɖɛ lè wawla mèa fiɔ mù.

⁴Ne mì hlɛ̃ xoma kèa, mì la teŋu kpɔ àlekè mù sè ènyà wawla kè lè Kristò mèa be gɔ̃mè ɖoa.

⁵Sãa, wo mu na àgbètɔ xòmèa nya ɖoɖo wawla kèa ò. Vɔ̀ fifìa, Mawu to yebe Gbɔ̃gbɔ̃ a ji ɖè è fiɔ yebe *àmèdɔ̃dɔ̃ kɔ̀kɔ̀ɛawo kudo yebe gblɔ̃ɖɛtɔwo.

⁶E na, to Àŋɛ̀nyuɛ̃ a jia, àmè kèwo mu nyi Yudàvi ò a cã va zũ ècrɔ̃ɖùtɔwo kudo Yudàviwo, ŋutinuwo na ŋutilã ɖèka ŋua ke, eye woa cã, wo va kpɔ gomè fifì lè àjɔ̀gbè fìãfìã kè lè Yesù Kristò mèa mè.

⁷Àŋɛ̀nyuɛ̃ kèa be sumɔ̃vi mù nyi, sɔ zɔ̃ ɖo Mawu be màje be ènu nana kè be na mù to yebe ŋusɛ̃dɔ mèa ji.

⁸Nène a ye, ènyè kè nyi vitɔ̀, lè àmè kèwo ŋuti wo kɔ̀a dòmèa, Mawu ku ŋuzĩzĩ na mù be ma ɖè gbèfã àdɔ̀kùnu gbogbo, kèwo lè Kristò mèa, na àmè kèwo mu nyi Yudàvi ò a.

⁹E dɔ̃ mù ɖoɖa be ma na àgbètɔ xòmèa bèa nya ɖoɖo kè Mawu, àmè kè wɔ̀ ènuwo kpataa, wla ɖɛ so kaka gbè ɖe gbè kea,

¹⁰àleke be woa to èhabɔ̀bɔa ji la ɖè Mawu be ènunya sùgbɔa fiɔ jiɖùɖu kudo ŋusɛ̃ kèwo le ɖùji lè jiŋùkusia.

¹¹Ekèa ye nyi ɖoɖo màvɔ, kè Mawu wɔ̀ dà ɖɛ so gbè ɖe gbè kea. Fifìa e na ɖoɖo kèa va e mè to Kristò Yesù, mia Tɔhonɔ̀a ji.

¹²Lè ɖèka wɔ̀wɔ mè ku Kristò, eye to E ji xɔ̀xɔ̀sè jia, jìdo sù mia si be mi la teŋu dɔ̃ gogo Mawu kudo èjìɖèɖe.

¹³Ye ŋutia, mù le ɖè kuku na mì be, èfũ kèwo mù le kpe ɖo mìa taa, mu gbà na mìa gbɔjɔ ò; ɖo mìabe gogo ye wo nyi.

¹⁴Ekèa ŋuti, mù jènà èklò na Àta,

¹⁵àmè kè gbɔ xòmè kèwo keŋu lè jiŋùkusi kudo ànyigbã jia, xɔ̀nà nyikɔ so.

¹⁶Mù le fãkue be Mawu ne na yebe Gbɔ̃gbɔ̃ a bèa sɔ ŋusɛ̃ kè lè yebe gogo gbãvlũyàyàa mèa, do kaka mìabe ètù mè.

¹⁷Mìabe xɔ̀sè ne na Kristò bèa bɔ̀bɔ̀ nɔ̀ ànyi lè mìabe èjì mè, ne mìabe lɔ̃lɔ̃ ne ɖo èkè, bèa likè goŋu-goŋu,

¹⁸eye ŋusɛ̃ bèa ɖo mìa mè, àleke be mìa ku àmè kèwo ŋuti wo kɔ̀awo keŋu, mìa sè àlekè tututu Kristò lɔ̃ mì ɖoa gɔ̃mè, lekè lɔ̃lɔ̃ kèa kèkè, dìdì, yìji, gbà wɔ̀ ègũ ɖoa!

¹⁹Wu ekèa, Mawu ne na mìa jèsi Kristò be lɔ̃lɔ̃, kè àgbètɔ be ènugɔ̃mèsèse dìdì boo do a, àleke be Mawu be ɖɔɖɔ bèa ɖɔ mì pɔpɔpɔ!

²⁰Mawu ye nyi àmè kè be ŋusɛ̃ le wɔ̀ èdɔ lè mia mèa. E teŋu wɔ̀nà ènu sia ènu na mi, be sùnàgbɔ fuu wu àlekè mi biɔna, àlo ènu kè mi susunaa ŋutɔ cã.

²¹Gogo ne nyi ye tɔ̀, lè èhabɔ̀bɔa kudo Kristò Yesù mè, na jìjimèwo keŋu, so màvɔ mè yì màvɔ mè! * Àmèn.