Read gen Efesòtɔwo 4 Bible Online

Efesòtɔwo 4 - gen bible

Efesòtɔwo 4

¹Ye ŋutia, ènyè, àmè kè lè ègàkpa mè ɖo Tɔhonɔ̀ ŋutia, mù le ɖè kuku na mì, be mìa nɔ̀ àgbè kè la sɔ̀ kudo àgbè kè ŋùkumè wo yɔ mì na a.

²Mì bɔ̀bɔ̀ mìa ɖokoe, ne mìa nyi àmè fàfawo. Mì ɖɔ ku ètù jè ànyi, eye mì sɔ lɔ̃lɔ̃ hɛ̃ àdòdò ku mìa nɔ̀nɔwo.

³Ekè Gbɔ̃gbɔ̃ a bla mì wɔ̀ ɖèkaa, mì do veve ènu, ne mìa nɔ̀ ànyi lè ŋuti fàfa mè.

⁴Ŋutilã ɖèka kpò ye lè, Gbɔ̃gbɔ̃ ɖèka kpò ye lè, nènea ke, ènu ɖèka zaa kpò ye Mawu yɔ mì be mìa va nɔ̀ ŋùɖo mè na.

⁵Tɔhonɔ̀ ɖèka kpò ye lè, xɔ̀sè ɖèka kpò ye lè, eye Mawusi lèle ɖèka kpò ye lè.

⁶Wu ekèa, Mawu ɖèka kpò ye lè, e ye nyi àgbètɔ xòmèa kpata be Ètɔ. E ye kpà àcɛ̀ na ènuwo keŋu, lè wɔ̀ èdɔ to ènuwo keŋu ji, gbà lè ènuwo keŋu mè.

⁷Wo na màje àmè sia àmè lè mia dòmè, sɔ zɔ̃ ɖo Kristò be ènu nana be jije ji.

⁸Ye ŋuti ye wo gblɔ̃ be: “Ekè e yì èji hũia, Àhùale sùgbɔ nɔ̀ e yomè, eye e na ènu àmèwo.”

⁹Fifìa ekè wo gblɔ̃ be: “E yì èjia”, e ze peŋu be e ɖì va yì kaka ànyigbã be ètù mè cã

¹⁰Àmè ɖèka ŋua, kè ye ɖì va ànyia, e ye ke gbà yì èji hũi, be bɔ̀ ènu sia ènu be yèa ɖo nɔ̀pe ɖo woa mè.

¹¹E ye ma yebe ènu nanawo na mi. E na àmè ɖewo nyi *àmèdɔ̃dɔ̃wo, èbuwo nyi Mawu be gblɔ̃ɖɛtɔwo, èbuwo dona àŋɛ̀nyuɛ̃ a, èbuwo nyi èhabɔ̀bɔa be kplɔ̀tɔwo, eye èbuwo nyi ènufiɔtɔwo.

¹²E ma ènu nana kèawo be yèa sɔ jrà àmè kèwo ŋuti wo kɔ̀awo ɖo, ne woa wɔ̀ yèbe èdɔa, eye sɔ yì e jia, yèa gbà sɔ wo tù Kristò be ŋutilã, kè nyi èhabɔ̀bɔa.

¹³Mawu wɔ̀ ekèa, be mia kpata mia va zũ ɖèka lè ènu kè mi xɔ̀sèa mè, eye mia va jèsi Mawu be Èvia keŋu-keŋu. Mia nyi àmè sĩsĩwo, sɔ̀ kudo Kristò, ne yebe nɔ̀nɔmè bliboa ne sù mia si.

¹⁴Eŋuã, mi mu gbà nyi ɖèvi, kèwo ènufiɔfiɔ yeye ɖe sia ɖe be àya sɔna, yìnà, gbɔ̀nàa, eye àyètɔwo blènà, dona woabe àɖàŋù vuɛ̃ mèa ò.

¹⁵Vɔ̀a, ne mi nyi nyàwototɔwo lè lɔ̃lɔ̃ mèa, bòhũa mi la sĩ lè ègo ɖe sia ɖe mè, lè Kristò, kè nyi ètaa mè.

¹⁶E ye le àmèti bliboa be cape capewo ku èkãwo ɖo àsi, ye wo lè ètè, lè ŋutilãa mè, àleke be àmètia be àkpa vòvòvòawo wɔ̀nà èdɔ pɛpɛpɛ, sĩnà, tùnà woa ɖokoe lè lɔ̃lɔ̃ mè.

¹⁷Fifìa, mù le gblɔ̃ na mì, lè Tɔhonɔ̀ be nyikɔ mè, be mì mu gbà nɔ̀ àgbè lè ènunya gbalo mè, sìgbè àlekè àmè kèwo mu nyi Yudàvi ò a nɔ̀nà ɛ̀a nène ò.

¹⁸Woabe susu mè ku ènugɔ̃mèsèse do vìvìti. Ekè woabe èjì ku àtrìa, ènumànya ɖo tèpe lè woa mè, eye wo dìdì lè àlekè Mawu ji be àgbètɔ ne nɔ̀a gbɔ.

¹⁹Woabe *jìjigbè ku àtrì, ye ŋuti èdɛ̃vuɛ̃ wùwu ma do wo, ɖo; wo bìanàŋù ɖo ènumàkɔ̀màkɔ ɖe sia ɖe xòmèvi wɔ̀wɔ ŋuti.

²⁰Mì kpɔɖa, mu nyi ènu kèawo mìawo ya mì kpla so Kristò ŋuti ò.

²¹Ɛ̀ɛ, mù sɔ ɛ̀ be mì sè ènyà so Yesù ŋuti, eye wo fiɔ mì nyàwototo kè lè e mèa.

²²Mì ɖè àsi lè jɔ̀jɔmè xoxo kè nɔ̀ mìa si sãa ŋuti. E ye na be sãa, mì nɔ àmè xoxo be àgbè, kè ènujroàmè kèwo blènà àmèa gblea.

²³Mì trɔ mìabe èjì kudo sùsu wɔ̀ yeye,

²⁴eye mì sɔ nɔ̀nɔmè yeye, kè wo wɔ̀ ɖo Mawu be nɔ̀nɔmè mèa, kudo ènu jɔ̀jɔɛwɔ̀wɔ kè lè kɔ̀kɔ̀ɛ ɖe a, do sìgbè àwù nène.

²⁵Fifìa, mì ɖè àsi lè àjèɖàɖa ŋuti. Àmè sia àmè ne to nyàwo na nɔ̀via, ɖo mìa dòmètɔ ɖe sia ɖe nyi ŋutinu ɖe na àmèti ɖèka ŋua ke.

²⁶Ne mì bijìa, mì mu gbà wɔ̀ ènuvuɛ̃ ò. Èjìbibia mu gbà nɔ̀ ànyi, kaka èzã bèa do ɖo e ji ò.

²⁷Mì mu gbà na èmɔnukpɔkpɔ ɖekpe Legba ò.

²⁸Àmè kè fĩnà èfìa, ne tɔtè èfĩ fìfi. Ne sɔ yebe àlɔ̀ wɔ̀ èdɔ ɖɔ̀hũi ɖe bòhũ, ne ènu ɖe ne nɔ̀ e cã si, ye bèa teŋu na èhiãtɔwo.

²⁹Mì mu gbà na ènyà kpòtoe ɖekpe bèa to so mìabe ènu mè ò. Ne mì pò nupoa, ènyà kè la do àlɔ̀ ènyà sètɔwo, eye be sɔ̀gbè tututua kpò mì la gblɔ̃, àleke be bèa hɛ̃ màje va na àmè kèwo le sè a.

³⁰Mì mu gbà wɔ̀ ènu kè la na Mawu be Gbɔ̃gbɔ̃ Kɔ̀kɔ̀ɛ a la ci àkpɔ̃ mè ò, ɖo e ye wo sɔ do mì jèsìdo, be Mawu la xɔ̀ mì lè ŋùkèkè ŋua ji.

³¹Mì ɖè veve kaɖi kaɖi, àdɔ̀mèze kudo èjìbibi keŋu jo. Nène a kea, mì ɖè àpa dodo, àmè zũzũ kudo susu vuɛ̃ ɖèɖe ɖo àmè ŋuti cã jo.

³²Lè ekèawo tèpea, mìa nɔ̀nɔwo be ènu ne wɔ̀ ŋuzĩzĩ na mì, eye mìa kɔ̀ àdɔ̀mè ɖo mìa nɔ̀nɔwo ŋuti. Mì sɔ ènuvuɛ̃ kè mìa nɔ̀nɔwo, sìgbè àlekè Mawu cã sɔ kè mì lè Kristò mèa nène.