Read gen Efesòtɔwo 5 Bible Online

Efesòtɔwo 5 - gen bible

Efesòtɔwo 5

¹Ekè mì nyi èvi ɖèvewo na Mawu a, mì srɔ̃ yebe nɔ̀nɔmè.

²Lɔ̃lɔ̃ ne ze lè mìabe àgbènɔ̀nɔ mè, sìgbè àlekè Kristò lɔ̃ mi, eye be sɔ ye ɖokoe na ɖo mia taa nène. Lè ekèa mèa e trɔ zũ ènu nana kè huɛ̃ gbigbli, kè wo sɔ savɔ na Mawu a.

³Àmè kèwo ŋuti wo kɔ̀ keŋu-keŋuã ye mì nyi, so eŋuã ŋutia mu jè klua be woa gbà sè *àhasìwɔ̀wɔ, ènu màkɔ̀ màkɔ wɔ̀wɔ, àlo ŋùbia ɖekpe lè mìa dòmè ò.

⁴Sɔ kpe ɖo ekèa ŋutia, mu jè be mìa gblɔ̃ ènyà ɖekpekpe kè la tɔ èto mè, kè kùnà ɖo àmè be ŋùkpɛ̃pewo ŋuti, àlo ènyà kè mu nyana sèse ò, àlo 'plàsiɖùɖu' be ènyà mà jè èto wo ò. Đo ekèawo gbɔ̃gblɔ̃ tèpea, àkpedodo na Mawu bòhũ ne nɔ̀ mìabe àɖewo ji tɛ̀gbɛ̀.

⁵E mè ne kɔ̀ na mì peŋu be: *àhasì wɔ̀tɔa, ènu màkɔ̀ màkɔ wɔ̀tɔa, àlo ŋùbiatɔa, (lè nyàwo toto mèa, ŋùbiatɔa vòdu sumɔtɔ be nyi) àmè kèawo dòmètɔ ɖe ma kpɔ tèpe lè Kristò kudo Mawu be fìɔdua mè gbèɖe ò.

⁶Mì mu gbà na àmè ɖekpe ne sɔ ènumànya be ènyà ɖekpe blè mì ò, ɖo ènu kèa hati nana Mawu dona àdɔ̀mèze ɖo àmè kèwo trìnà ètoa ŋuti.

⁷Ye ŋutia, mì mu gbà do èha kudo wo ò.

⁸Đo sãa, vìvìti mè ye mì nɔ̀. Vɔ̀ fifìa, mì lè kɔ̀kɔ̀ɛ mè, le do èha kudo Tɔhonɔ̀. Ye ŋutia mì nɔ̀ àgbè sìgbè àmè kèwo lè kɔ̀kɔ̀ɛ mèa nène.

⁹Đo, ènuwɔ̀na kèwo àgbènɔ̀nɔ lè kɔ̀kɔ̀ɛ mè hɛ̃nà vaa ye nyi: ènunyuɛ̃ wɔ̀wɔ, ènujɔ̀jɔɛ wɔ̀wɔ ku nyàwototo.

¹⁰Mì jè àgbàgba, mìa srɔ̃ ènuwɔ̀na kè jènà Tɔhonɔ̀ be ŋùmè a.

¹¹Mì mu gbà kpɔ gomè ɖekpe lè ènu kèwo àmèwo wɔ̀nà lè vìvìti mèa mè ò. Àlè ɖekpe mu lè woa mè ò. Mì ɖè wo sia bòhũ.

¹²Đo e nyi ŋùkpɛ̃ be woa pò nupo lè ènu kè wo wɔ̀nà lè wawla mèa ŋuti cã.

¹³Ènu sia ènu kè wo ɖènà to va kɔ̀kɔ̀ɛ nua, zena wo kpɔna, ɖo kɔ̀kɔ̀ɛ ye nana ènu sia ènu zena peŋu.

¹⁴Ekèa ŋuti wo gblɔ̃ be: “Fɔ̃, èwò àlɔ̃dɔ̃tɔ, fɔ̃ so àmè kukuwo dòmè, eye Kristò la klɛ̃ ɖo ji wò.”

¹⁵Ye ŋutia, mì le ŋùku ɖo mìabe àgbènɔ̀nɔ ŋuti nyuɛ̃ ɖe. Mì mu gbà nɔ̀ sìgbè àmè mànyanuwo nène ò, vɔ̀ bòhũa, sìgbè ènunyatɔwo nène.

¹⁶Mì wɔ̀ èmɔnukpɔkpɔ kè sù mìa si fifìa ŋuti dɔ nyuɛ̃ ɖe, ɖo mi lè ŋùkèkè vuɛ̃wo mè.

¹⁷Ye ŋutia mì mu gbà wɔ̀ ènu sìgbè sùkunɔ̀wo nène ò, vɔ̀ bòhũa, mì jè àgbàgba mìa sè Tɔhonɔ̀ be èjroa gɔ̃mè.

¹⁸Mì mu gbà nù àhà mu ò, ɖo e nana àmè wɔ̀nà ènu bàɖà. Vɔ̀ bòhũa, mì na Gbɔ̃gbɔ̃ a ne ɖɔ mì pɔ.

¹⁹Mì sɔ ènyà kèwo lè Salmɔ̀wo, èhàjìjiwo ku èklàmèhàwo mèa, pò nupo na mìa nɔ̀nɔwo; eye mì sɔ kàfù kafu hàwo ku èhàjìji viviwo kafu Tɔhonɔ̀ lè mìabe èjìwo mè.

²⁰Mì do àkpe na Mawu, Àta lè ènu sia ènu mè, lè mia Tɔhonɔ̀ Yesù Kristò be nyikɔ mè.

²¹Ɖo bùbu kè mì ɖo na Kristò ŋutia, mì bɔ̀bɔ̀ mìa ɖokoewo na mìa nɔ̀nɔwo.

²²Èsrɔ̃-nyɔ̃nùwo, mì bɔ̀bɔ̀ èta ɖo mìa srɔ̃wo gɔ̃mè, sìgbè Tɔhonɔ̀ mì le bɔ̀bɔ̀ èta na nène.

²³Đo ŋusù ye le nyi ètatɔ na nyɔ̃nù, sìgbè àlekè Kristò cã nyi èhabɔ̀bɔa be ètatɔ nène. Kristò ye nyi èhabɔ̀bɔa be hlùɛ̃tɔ; èhabɔ̀bɔ kè nyi yebe ŋutilãa.

²⁴Ye ŋutia, sìgbè àlekè èhabɔ̀bɔa bɔ̀bɔ̀ èta ɖo Kristò gɔ̃mèa, nènea ke nyɔ̃nùwo cã ne bɔ̀bɔ̀ èta ɖo woa srɔ̃wo gɔ̃mè lè ènu sia ènu mè.

²⁵Ŋusùwo, mì lɔ̃ mìa srɔ̃wo, sìgbè àlekè Kristò cã lɔ̃ èhabɔ̀bɔa, eye be sɔ ye ɖokoe na ɖo e taa nène.

²⁶E wɔ̀ ekèa, sɔ kɔ̀ e ŋuti, wàlɛbɛ kè e klɔ ɛ̀ lè èsìlèle mè, to ènyàa mè vɔ̀a,

²⁷ne ye ŋutɔ bèa sɔ ɛ̀ ɖotè, na ye ɖokoe, ne bèa nyi gogo be èhabɔ̀bɔ, kè ŋuti èɖi ɖekpe, àlo àyumàdɛ̃ ɖekpe, àlo ènu kèawo dòmètɔ ɖe mu gbà nɔ̀ ò. Vɔ̀a ne bèa nɔ̀ kɔ̀kɔ̀ɛ, màɖoɖi. Àmè kè lɔ̃ èsrɔ̃aa, lɔ̃ ye ŋutɔ ye ɖokoe.

²⁸Nène a kea, e jè be ŋusùwo ne lɔ̃ woa srɔ̃wo, sìgbè woa ŋutɔwo be ŋutilã nène.

²⁹Đo àmè ɖekpe mu crìnà ye ŋutɔ yebe ŋutilã ò. E nyìnà ɛ̀, kpɔna e ji, sìgbè àlekè Kristò wɔ̀nà na èhabɔ̀bɔa nène,

³⁰ɖo yebe ŋutilã be ŋutinuwo ye mi nyi.

³¹Sìgbè àlekè wo ŋlɔ̀ ɛ̀ ɖɛ be: “Ekèa ŋuti ye ŋusù la gble ètɔa ku ènɔa ɖɛ, la tɛ ɖo èsrɔ̃a ŋuti, eye wo àmè èvèawo la nyi ŋutilã ɖèka.”

³²Àmlìmànu gã ɖe ye nyi ekèa. Eye, mù le gblɔ̃ na mì be Kristò ku èhabɔ̀bɔa ŋuti ye be le pò nupo so.

³³Gãkea, ŋusù ɖe sia ɖe, lè mìa dòmè, ne lɔ̃ èsrɔ̃a sìgbè ye ɖokoe nène. Nène a kea, nyɔ̃nù cã ne do bùbu èsrɔ̃a ŋuti.